Nkuma ĩnjega yuumĩte kĩrĩ Jehova Mũrungu wa kũgwĩrua, ũrĩa wendaga nja ikara igwĩrĩtue. Nĩwe waambĩrĩĩrie ngũrano. Kũgũrana kĩwaatho nĩkũretaga kũgwĩrua ndeene ya nja tontũ nĩgũtũmaga aana barerwa na njĩra ĩrĩna ũkaria. Akristũ babuĩrĩte gũtĩĩa mawaatho ja nthĩ yaao, jegiĩ kwandĩkithia kũgũrana kwao kĩwaatho.—Thooma Luka 2:1, 4, 5.

Nĩatĩa Mũrungu onaga ngũrano? Endaga ĩthĩrwa ĩrĩ ngwatanĩro ya gũtũũra, gatĩgatĩ ka muntũmũrũme na mũka. Jehova endaga mũkũrũ na mwekũrũ bethĩrwe betĩkeenie. (Ahibirania 13:4) Nathwĩre antũ bagũrene gũtigana. (Malaki 2:16) Ĩndĩ netĩkĩrĩĩtie Akristũ gũtigana, na kũgũrana kaĩrĩ kana kũgũrwa, rĩrĩa ũmwe athithia ũthũngĩĩri.—Thooma Mathayo 19:3-6, 9.

Jehova oombĩre muntũmũrũme na muntũmũka nĩkenda bateethanagia ndeene ya mũranũ. (Kiambiriria 2:18) Arĩ kĩongo kĩa nja, ntomũrũme abuĩrĩte gũtongeeria kwiingia mobatu ja kĩmwĩrĩ ja njewe, na kũbaritana mantũ ja Mũrungu. Nabuĩrĩte kwiritanĩria mono kwenda mwekũrũ waawe. Mũkũrũ na mwekũrũ babuĩrĩte kwendana na kweejana gĩtĩĩo. Tontũ mũkũrũ na mwekũrũ batĩũjũri, nĩbabuĩrĩte kũrekanagĩra, nĩyo njĩra ya kũreta kũgwĩrua ndeene ya nja.—Thooma Aefeso 4:31, 32; 5:22-25, 33; 1 Petero 3:7.

Mũranũ jwenu jũkeeja kũgĩa mathĩĩna, bubaĩrĩ bũbuĩrĩte gũciũmia kũthithanĩria mantũ na njĩra ya wendo. (1 Akorintho 13:4, 5) Rũteto rwa Mũrungu rũtĩĩtĩkagĩĩria gũtigana,  ĩrĩ njĩra ya kũthiria mathĩĩna jarĩa jaumagĩra ndeene ya mũranũ.—Thooma 1 Akorintho 7:10-13.

Jehova endaga bwĩthĩrwa bũgwĩrĩtue. Nabwejaga mataaro jameega jarĩa joomba gũtũma bũgwĩrĩrua wĩthĩ bwenu. Endaga bũteetheka kuumania na ũũme na ũmenyo bwa aciari beenu. (Akolosai 3:20) Jehova endaga bwona kũgwĩrua kũrĩa kuumanagia na kũthithia wendi bwa Mũũmbi weenu, na Mũtaana waawe.—Thooma Mutumiiria 11:9–12:1; Mathayo 19:13-15; 21:15, 16.

Bũbuĩrĩte kũrita ngũgĩ na wĩru nĩkenda bwonera aana beenu biakũrĩa, nguũ na gĩkaro. (1 Timotheo 5:8) Ĩndĩ nĩkenda aana beenu boona kũgwĩrua, bũbuĩrĩte kũbaritana kwenda Mũrungu na bairitane mantũ jaawe. (Aefeso 6:4) Ngerekano yaaku ya kwenda Mũrungu, no ĩringithie mono nkoro ya mwana waaku. Ũgĩtumagĩra Rũteto rwa Mũrungu, mooritani jaaku jakagarũra mathũganio ja mwana waaku na njĩra ĩnjega.—Thooma Kuriikanithia Maathana 6:4-7; Njuno 22:6.

Aana nĩbateethekaga mono rĩrĩa ũkũbekĩra inya na kũbacookeria nkaatho. Kinya nĩbendaga kwoneerua na gũkanũkua. Ũritani ta bũbũ nĩbũbakaragia kuumania na mĩĩtĩre ĩrĩa yũũmba kũbaata kũgwĩrua. (Njuno 22:15) Ĩndĩ, batĩbuĩrĩte gũkanũkua na mũthũũro kana marũrũ.—Thooma Akolosai 3:21.

Akũũjĩ ba Jehova nĩbacabĩte mauku jamaingĩ jarĩa jethagĩrwa jarĩ ja gũteethia aciari na aana. Mantũ jarĩa jarĩ maukune jau, jaumĩte kĩrĩ Bibiria.—Thooma Zaburi 19:7, 11.