KUNKU KIA 8
Adieyi Nufwete Vanga Avo Sumbula Kinubwididi?
“Kufwila wau ko, owau muna kolo kiandwelo, ovo wau, numwesesenwa mpasi muna mpukumunwa za mpila mu mpila.”—1 Petelo 1:6
Kana nkutu ovangidi mawonso muna kala ye longo ye zingu kia nzo kiakiese, valenda bwa mambu ma kinsalukisa malenda kulula kiese kieno. (Kimpovi 9:11) Nzambi muna zola kwawonso okutusadisanga vava tukalanga mu mpasi. Avo olemvokele nkanikinu mia Bibila milende, ngeye ye esi nzo aku nulenda zizidila konso mpasi zilenda kunubwila.
1 BUNDA YAVE E VUVU
ADIEYI BIBILA KIVOVANGA? “O nteleko eno a moyo awonso, nusia wo muna yandi, e kuma kadi, yeno kasidi o moyo.” (1 Petelo 5:7) Sungamena vo Nzambi ke nkwa kuma ko muna mpasi zaku. (Yakobo 1:13) Yave otoma kusambula ekolo okumfinama. (Yesaya 41:10) “Nutendwela ntima mieno kuna kena.”—Nkunga 62:8.
O fiaulwiswa muna longokanga Bibila lumbu yawonso. Mawonso mama mekusadisa mu mona una Yave ‘kekutufiaulwisilanga muna mpasi zeto zawonso.’ (2 Korinto 1:3, 4; Roma 15:4) Yave osianga nsilu vo okuvana “luvuvamu lua Nzambi, luna luviokele nyindu wawonso.”—Filipi 4:6, 7, 13.
ADIEYI OLENDA VANGA?
-
Lomba lusadisu lwa Yave muna sambu kimana wakala ye ngindu zavuvama yo toma yindula
-
Nufimpulula nkubika zeno yo sadila zina numona vo zambote
2 UKILUNGA-LUNGA Y’ESI NZO AKU
ADIEYI BIBILA KIVOVANGA? “O ntim’a mbakuzi ubaka zayi; o kutu kwa nkwa ngangu kuvava zayi.” (Ngana 18:15) Vava zaya mawonso. Vava zaya nsatu za konso muntu muna nzo. Mokenanga yau yo kubawunikina.—Ngana 20:5.
Adieyi ofwete vanga avo nzolw’aku ofwidi? Kumoni nsoni za dila ko. Sungamena vo ‘Yesu wadila.’ (Yoane 11:35; Kimpovi 3:4) Diambote mpe wavundanga yo toma leka. (Kimpovi 4:6) Ediadi dikusadisa mu sunda lukendalalu.
ADIEYI OLENDA VANGA?
-
Kala ye fu kia mokena ye esi nzo aku una vonza ke kibwidi ko. Avo vonza kibwidi, esi nzo aku ke bekala yo lukatikisu ko lwa mokena yaku
-
Mokena ye awana babwila kala diambu diadi
3 NUVAVA LUSADISU NUVWIDI O MFUNU
ADIEYI BIBILA KIVOVANGA? “O nkundi ozolanga ntangwa zawonso, o mpangi muna mpasi kawutukila.” (Ngana 17:17) Akundi aku bazolele kusadisa, kansi nanga ke bazeye ko dina bafwete vanga. Muna kuma kiaki, ubazayisa dina ovwidi mfunu. (Ngana 12:25) Lomba mpe lusadisu lwa mwanda kw’awana betoma bakulanga Diambu dia Nzambi. O luludiku bekuvana lulenda kusadisa.—Yakobo 5:14.
Otambula lusadisu ovwidi mfunu avo okele ntwadi ntangwa zawonso y’awana bena yo lukwikilu muna Nzambi ye bebundanga vuvu muna nsilu miandi. Ofiaulwiswa mpe avo osadisi ana bena mu mpasi, samuna nsilu mia Yave kw’akaka yo lukwikilu lwaku muna yandi. Ukivana muna sadisa akaka, kuyivaula ko y’awana bekuzolanga yo kuvwa mfunu.—Ngana 18:1; 1 Korinto 15:58.
ADIEYI OLENDA VANGA?
-
Mokena yo nkundi obundanga e vuvu, yambula vo kasadisa
-
Vova ye ziku kiawonso mana ovwidi o mfunu
