Yave ovavanga vo twasonga ‘kwikizi.’ (Mika 6:8) Ediadi mfunu kibeni dina, kadi avo kwikizi nkatu muna longo, ke nubundaziana vuvu ko. Kadi vuvu zola kuwokesanga.

O unu, ayingi ke besonganga kwikizi ko muna longo. Muna tanina longo lwaku, mambu mole ofwete vanga.

ADIEYI BIBILA KIVOVANGA? ‘Nuzaya oma masundidi o mfunu.’ (Filipi 1:10) Longo lwaku i dimosi muna mambu masundidi o mfunu muna zingu kiaku. Ozevo, ofwete lo sia va fulu kiantete.

Yave ozolele vo wasianga sungididi kwa nkaz’aku yo “mwena moyo o wete” kumosi. (Kimpovi 9:9) Yave ovovanga vo kuvezi nkaz’aku ko, kansi nuvavanga zaya una nulenda wokesela kiese kia muntu yo nkw’andi. (1 Korinto 10:24) Songa kwa nkaz’aku vo mfunu kikilu okumvwanga.

ADIEYI OLENDA VANGA?:

• Kalanga vamosi yo nkaz’aku, toma kunsianga sungididi

• Kuyindula kaka oma ma “ngeye kibeni” ko, kansi oma ma “yeno wole”

ADIEYI BIBILA KIVOVANGA? “Konso on’otungununa nkento, kanlengokelw’o moyo, zumba kia nsi a ntima katele yandi.” (Matai 5:28) Avo muntu okwamanananga yindula mambu ma nsoni, disongele vo kesonganga kwikizi kwa nkaz’andi ko.

Yave ovovanga vo “toma lunga-lunga ntim’aku.” (Ngana 4:23; Yeremiya 17:9) Muna wo vanga, ofwete lunga-lunganga meso maku. (Matai 5:29, 30) Tanginina mbandu a Yobi ona wakanga e kangu ye meso mandi mu lembi tala nkento akaka ye kani diambi. (Yobi 31:1) Baka nzengo zalembi tala mambu ma nsoni. Venga fu kia songa nzola kwa muntu una vo ke nkaz’aku ko.

ADIEYI OLENDA VANGA?

• Songa kwa wantu akaka vo nkaz’aku kaka ozolanga

• Zitisanga e ngindu za nkaz’aku, yambula vana vau konso kikundi kilenda kunkendeleka