Kuna kwa Esi Filipi 4:1-23
4 Dianu vo, e mpangi zame, ana izolanga yo lakukila moyo, oyeno i kiese ye kolowa kiame,+ nusikila+ e nsikila yayi muna Mfumu, azolw’ame.
2 Nkasakese Ewodia, nkasakese mpe Suntuki kimana bakala yo nyindu umosi muna Mfumu.+
3 Elo, idodokele mpe, ongeye nkwame wakieleka muna salu,* kwamanana sadisa akento awaya befuntukanga yame muna diambu dia nsangu zambote, kumosi yo Kelemento ye ankaka mpe akwame muna salu, ana bena vo e nkumbu zau zina muna nkand’a moyo.+
4 Nuyangalalanga muna Mfumu ntangwa zawonso. Mpovele wo diaka vo, Nuyangalalanga!+
5 O ntim’eno anleka+ yambula wazayakana kw’awonso. O Mfumu wina omu ngenga.
6 Ke nutelama ntima muna konso diambu ko,+ kansi muna mambu mawonso, muna sambu ye ludodokelo ye matondo, nuzayisa e ndomba zeno kwa Nzambi;+
7 o luvuvamu+ lwa Nzambi luna luviokele umbakuzi wawonso luyingila ntima mieno+ ye makani meno muna Kristu Yesu.
8 Kuna diaka e sambu ampangi, mawonso maludi, mawonso mazitu, mawonso mansongi, mawonso mavelela, mawonso ma zolakana, mawonso mevovelwanga e mbote, mawonso mambote ye mawonso ma lusanisinu, nukwamanana badika mambu mama.+
9 O mambu mana nualongoka, mana nuatambula ye mana nuawá yo mona omu mono, i mau nuvanga,+ o Nzambi a luvuvamu okala yeno.
10 Ngiangalele kikilu muna Mfumu wau vo nungindwidi diaka.+ Kana una vo nuatokanenanga wete diame, ke nuakala ye lau diasonga wo ko.
11 Ke sia ko vo wau nkondelo i mpovele wo, kadi yalongoka yangalela konso kina ngina kiau muna mambu mawonso.+
12 Nzeye zingu kia kala ye lekwa yakete;+ nzeye zingu kia kala ye lekwa yayingi. Muna mambu mawonso ye ntangwa zawonso yalongoka mbumb’a kala wayukuta yo fwa nzala, kala ye ulolo ye kondwa lekwa.
13 Muna mambu mawonso ngina ye nkuma muna ndiona okunkumikanga.+
14 Kansi, diambote nuavanga wau nuakala yame entwadi muna mpasi zame.
15 Ozevo, yeno esi Filipi nuzeye wo mpe vo vava nuawa e nsangu zambote mu nkumbu antete, vava yakatuka oku Makedonia, ke vakala nkutakani ko yakala yame ntwadi muna diambu dia vana yo tambula, yeno kaka;+
16 kadi vava yakala kuna Tesalonika, nuantwikila lekwa muna diambu dia nsatu zame, ke nkumbu mosi kaka ko kansi nkumbu miole.
17 Ke sia ko vo lukau ivavanga, kansi mbongo ikunutwasila nluta miayingi nzolele.
18 Kadi, ngina ye lekwa yawonso mvuidi o mfunu, yo wokela nkutu. Kikondele lekwa ko wau ntambwidi kwa Epaferodito+ ina nuantwikidi, e nsunga zambote,+ kimenga kiatondakana, kia luyangalalu kuna kwa Nzambi.
19 Kuna diak’e sambu, o Nzambi ame olungisa emvimba e nsatu zeno zawonso+ mun’owu wa nkembo a umvuama wandi muna Kristu Yesu.
20 Kuna kwa Nzambi eto yo Se nkembo yamu mvu ya mvu. Amen.
21 Nuvana mavimpi kwa avauki awonso muna Kristu Yesu. Ampangi ana bena yame banutumini mavimpi.
22 Avauki awonso banutumini mavimpi, musungula awana bena muna nzo a Kaisa.+
23 E nsambu za Mfumu Yesu Kristu zakala ye mwanda nusonganga.
Mvovo vana yand'a lukaya
^ Mvovo wa sina: “nkwame wakieleka muna vangu.”
