Vava mwana kewutukanga, dilenda twasa kiese yovo mpasi kwa mase. Wau vo nukitukidi mase, ntangwa ayingi ye ngolo divava muna lunga-lunga mwana eno. O lembi leka ye mambu makaka, dilenda twasa ntantani muna longo lweno. Nufwete vanga nsobani muna zingu mu siamisa longo lweno ekolo nulunga-lunganga mwana. Aweyi e Bibila kilenda kunusadisila muna diambu diadi?

ADIEYI BIBILA KIVOVANGA? ‘O zola kuna yo luzindalalu yo walakazi.’ Kivovanga mpe vo zola ‘ke kuvava wete wa yandi kibeni ko, ke kufunga makasi mu nzaki ko.’ (1 Korinto 13:4, 5) Wau vo se u ngudi, divava vo wasia sungididi kwa mwan’aku. Ediadi dilenda fila nkaz’aku mu yindula vo kukumvwanga diaka mfunu ko, ozevo kuyambula sia sungididi kwa nkaz’aku ko. Kuna luzindalalu ye ngemba, olenda sadisa nkaz’aku mu mona vo mfunu okumvwanga ye mpe lusadisu lwandi ovwidi mfunu muna sansa mwan’eno.

‘Yeno akala mpe . . . nukadila yau kuna zayi.’ (1 Petelo 3:7) Sungamena vo nkento aku ngolo zayingi kevanganga muna lunga-lunga mwana eno. E diadi dilenda kunyoyesa yo kunkendeleka. Kuna kulanda, olenda kufungila makasi, kansi diambote wasonganga lulembamu, kadi “nkwa ntim’evunda, osundidi ekesa.” (Ngana 16:32) Kala yo umbakuzi, umvana lusadisu kavwidi mfunu.—Ngana 14:29.

ADIEYI OLENDA VANGA?

• Se: Sadisa nkaz’aku mu lunga-lunga mwana kana nkutu mu mpimpa. Kulula e ntangwa oviokesanga mu mambu makaka kimana wakala ye ntangwa yafwana muna kala yo nkaz’aku yo mwana

• Ngudi: Avo yakala diaku ukivene muna lunga-lunga mwana, tambulwila lusadisu lwandi. Avo e salu kavangidi kuyangalele kio ko, kuntumbi ko kansi kuna zola kwawonso unlonga una kafwete kio vangila

ADIEYI BIBILA KIVOVANGA? “Bekala nitu mosi.” (Etuku 2:24) Kana una vo wutidi mwana, sungamena vo ngeye yo nkaz’aku nu “nitu mosi.” Ozevo, nuvanga mawonso muna siamisa longo lweno.

Akento, luyangalelanga lusadisu lwa akazi eno. E mvovo mieno miambote milenda ‘wuka.’ (Ngana 12:18) Ayakala, nuzayisanga akento eno vo mfunu nukubavwanga ye nukubazolanga. Sanisina nkento aku muna mpila kelunga-lungilanga e nzo.—Ngana 31:10, 28.

“O muntu kavavi wete wa yandi kibeni ko, owu wa nkw’andi kaka.” (1 Korinto 10:24) Vanganga mana meyangidikanga nkaz’aku ntangwa zawonso. Nuvaulanga e ntangwa muna mokena, wunikina yo kuyisanisina. Avo nkaz’aku luzolo lwa vukana kena lwau, kunyimina ko. Lungisanga nsatu za nkaz’aku. Bibila kivovanga vo: ‘Ke nuyinaziana ko, nanga mu kolo kiakete kaka kina nuwizanene.’ (1 Korinto 7:3-5) Nutoma mokenena diambu dia vukana. O luzindalalu ye umbakuzi dikunusadisa mu kumika longo lweno.

ADIEYI OLENDA VANGA?

• Vaulanga ntangwa mu kala vamosi yo nkaz’aku

• Songanga zola kwa nkaz’aku muna kumvangilanga mambu makete nze kuntwikila mensagem yovo kumsumbila lekwa

ADIEYI BIBILA KIVOVANGA? “Tuka muna kinsedia, ozeye e sono yavelela, ina ilenda kuvana ngangu yamuna luvuluku.” (2 Timoteo 3:15) Nuvanga nkubika muna longa mwan’eno. Mwana olenda longoka mambu una kawutukidi ko. Olenda mpe wá ndinga aku ekolo kena mu vumu. Untangilanga mambu ekolo kena nsedia. Kana una vo kebakula mana otanganga ko, ediadi dilenda kunsadisa mu yangalela tanga vava kekituka mbuta.

Unlonganga mambu ma Nzambi kana una vo nsedia. Kalanga yandi vava osambanga kwa Yave. (Nsiku 11:19) Vava osambanga yikanga mana Nzambi kevanganga. (Nkunga 78:3, 4) Vava mwan’aku kekolanga omona zola kwaku muna Yave, yandi mpe okunzola.

ADIEYI OLENDA VANGA?

• Lomba ngangu za longela mwan’aku muna sambu

• O vutukilanga mambu ma sina, disadisa mwa’aku mu longoka muna kinsedia