Yave * wa Nzambi yandi wasikidisa longo lwantete. Bibila kivovanga vo vava Yave kavanga nkento antete ‘wantwasa kwa yakala.’ Adami watoma yangalala yo vova vo: “Ndioyù tu, i visi kia visi yame, ye nitu a nitu ame.” (Etuku 2:22, 23) Yave ozolele mpe vo akazi bakala ye zingu kiakiese.

Vava muntu kekazalanga, olenda yindula vo mambu mawonso mambote kaka mekala. Kansi, e ludi i kiaki: Kana nkutu vo nkento yo yakala betoma zolananga, ntantani ke zikondwa ko. (1 Korinto 7:28) Mu nkanda wau muna ye nkanikinu mia Bibila milenda kitula longo ye nzo aku se yakiese, avo osadidi mio.—Nkunga 19:8-11.

ADIEYI BIBILA KIVOVANGA? O yakala i ntu muna nzo.—Efeso 5:23.

Avo u yakala, Yave ozolele vo wasadila e wisa kiaku kuna ngemba. (1 Petelo 3:7) Yave wavanga o nkento kimana kaka se nsadisi aku, Nzambi ozolele vo wanzitisanga yo kunzola. (Etuku 2:18) Ofwete zolanga nkaz’aku muna sianga e nsatu zandi va fulu kiantete.—Efeso 5:25-29.

Avo u nkento, Yave ozolele vo watoma zitisanga yakala diaku yo kunsadisa muna lungisa kiyekwa kiandi kia kintu. (1 Korinto 11:3; Efeso 5:33) Lemvokelanga nzengo kebakanga, yikama yakala diaku ye nsi a ntima wawonso. (Kolosai 3:18) Avo ovangidi wo, nkento a ntalu okituka vana meso ma nkaz’aku ye ma Yave.—1 Petelo 3:1-6.

ADIEYI OLENDA VANGA?

• Yuvula nkaz’aku dina olenda vanga mu kala yakala yovo nkento ambote. Wá ye sungididi kiawonso yo vanga konso nsobani ivwilu o mfunu

• Songa luzindalalu. Ntangwa divava mu zaya edi nufwete vanga muna yangidika muntu yo nkw’andi

ADIEYI BIBILA KIVOVANGA? Ofwete tokanenanga e wete dia nkaz’aku. (Filipi 2:3, 4) Zitisanga nkaz’aku, sungamena vo Yave ozolele vo selo yandi bakala ‘alembami.’ (2 Timoteo 2:24) “Vena ye mpov’a losola-losola nze ntoba za nsosolo: O lubini lu’akwa ngangu, wuka luwukanga.” Muna kuma kiaki, ofwete solanga mana ovova. (Ngana 12:18) Mwand’avelela Yave ulenda kusadisa mu vova kuna ngemba yo zola.—Ngalatia 5:22, 23; Kolosai 4:6.

ADIEYI OLENDA VANGA?

• Lomba lusadisu muna sambu kimana wakala ye ngindu zavuvama vitila wamokena mambu mamfunu yo nkaz’aku

• Toma yindula mana ovova ye mpila ovovela mo

ADIEYI BIBILA KIVOVANGA? Avo okazalele, okitukidi “nitu mosi” yo nkaz’aku. (Matai 19:5) Kansi, nwakinu wantu wole ye ngindu zaswaswana. Ozevo, nufwete sia ngolo mu kala yo nyindu mosi ye makani mamosi. (Filipi 2:2) E ngwizani mfunu ina vava nubakanga nzengo. Bibila kivovanga vo: ‘Muna mbokena, makani mesikila.’ (Ngana 20:18) Vava nubakanga e nzengo zamfunu, nuyambula vo nkanikinu mia Nzambi mianufila.—Ngana 8:32, 33.

ADIEYI OLENDA VANGA?

• Mokenanga yo nkaz’aku, unsonga ngindu zaku

• Teka mokena yo nkaz’aku vitila wasilana nsilu yo wantu ankaka