Nkand’a Yakobo 1:1-27
1 Yakobo,+ wa ntaudi a Nzambi yo Mfumu Yesu Kristu, kuna kwa makanda 12 mana mamwangana:
Mavimpi meno!
2 E mpangi zame, vava nubwilwanga e ntonta za mpila mu mpila, nubadikila dio se diambu diakiese,+
3 kadi nuzeye wo vo, o lukwikilu lweno lwazikukila muna ntonta, luzindalalu lutwasanga.+
4 Vo i luzindalalu, yambula lwalunganesa e salu kiandi, kimana nuakala nuafwana yo zikuka muna mawonso, yo lembi kondwa e lekwa.+
5 Dianu vo, avo mosi muna yeno okondelo ngangu, yambula kakwamanana lomba kwa Nzambi,+ ona ovaninanga kuna mvevo kw’awonso yo lembi semba,+ zivewa kwa yandi.+
6 Kansi, yambula kalombelanga muna lukwikilu,+ ke mu lukatikisu ko,+ kadi ndiona okatikisanga una nze mavuku ma kalunga metumpaniswanga yo vevomonua kwa tembwa.
7 O muntu a mpila yayi kabanzi ko vo lekwa ketambula kwa Yave;*
8 nkwa nyindu miole,+ yo lembi sikila muna ngienda zandi zawonso.
9 Kansi o mpangi una vo nsukami, yambula kayangalala* wau katundidikilu,+
10 vo i mvuama yambula kayangalala wau kakulwilu,+ kadi ovempoka nze luvuma lwa mpatu.
11 Kadi wauna ntangwa ivaikilanga ye mbangazi andi yo yumisa e titi yo sotola mvuma zandi, o vienga kwandi mpe kwayifwila, i una mpe o mvuama kefwila muna salu yandi.+
12 Nkwa kiese ndiona ozindalalanga muna ntonta,+ kadi wau kesunda muna ntonta, otambula kolow’a moyo,+ ina Yave* kasila o nsilu kw’awana bekunzolanga.+
13 Ke vakadi muntu ko otontwanga kavova vo: “Nzambi untontele.” Kadi Nzambi kalendi tontwa mu mambu mambi ko, ngatu yandi kibeni katonta muntu.
14 Kansi konso muntu otontwanga wau kefilakeswanga yo vukumunua* kwa zolela ya yandi kibeni.+
15 E zolela avo iwokele, iwutidi e sumu; e sumu avo divangamene, diwutidi o lufwa.+
16 Ke nuvunginikwa ko, e mpangi zame azolwa.
17 Konso lukau lwambote ye konso lukau lwalunga kuna ntandu lutukanga,+ kadi kwa Se dia ntemo a zulu lukulumukanga,+ ona kena ye soba-soba ko nze nzietomok’a kini.*+
18 Muna luzolo lwandi katuwutila muna diambu dia ludi,+ kimana twakala se ntomoni* muna vangwa yandi.+
19 Nuzaya ediadi, mpangi zame azolwa: Konso muntu yambula kakalanga ye nzaki za wá, kansi kakadinge ye nzaki za vova ko,+ kafunginge mpe makasi mu nzaki ko,+
20 kadi o makasi ma muntu ke metwasanga unsongi wa Nzambi ko.+
21 Dianu vo, nuyambula usafu yo bi wawonso,+ nutambulwila kuna lulembamu e diambu dina dikuninu muna yeno edi dilenda kunuvuluza.*
22 Nulemvokelanga diambu+ ke wa kaka ko yo kuyivunginika muna ngindu zaluvunu.
23 Kadi avo muntu owanga kaka diambu, kansi ke lemvokelanga dio ko,+ una nze muntu otalanga e ndose andi muna pelo.
24 Vava kayitadidi yo katuka, vana vau ovilakene mpila muntu kena.
25 Vo i ndiona otoma fimpanga o nsiku alunga+ utwasanga luvevoko yo kwamanana mo, ke wanga kaka ko yo vilakana, kansi olemvokelanga diambu; okalanga ye kiese muna mana kevanganga.+
26 Konso muntu obanzanga vo Nzambi kesambilanga,* kansi ke kebanga lubini lwandi ko,+ ntim’andi kevunanga, e nsambil’andi mpe yampavala.
27 E nsambila ina yavelela yo kondwa usafu vana ndose a Nzambi wa Se dieto i yayi: lunga-lunga wan’a nsona+ ye akento bafwilwa akala+ muna mpasi zau,+ yo kondwa e tona muna mambu ma nza.+
Mvovo vana yand'a lukaya
^ Mvovo wa sina: “kayisana.”
^ Yovo “bakilwa muna nekwa.”
^ Yovo “ninga.”
^ Yovo “wantu antete.”
^ Yovo “vuluza mioyo mieno.”
^ Yovo “obenze vo munkwikizi.”
