တၢ်ဒိးဘျၢထံန့ၣ် မ့ၢ်မနုၤလဲၣ်
လံာ်စီဆှံတဲဝဲဒ်လဲၣ်
တၢ်ဒိးဘျၢထံန့ၣ် အဲၣ်ဒိးတဲဝဲ ဖဲပှၤတဂၤဒိးဘျၢထံအခါ အဝဲအမိၢ်ပှၢ်ဒီတဂၤညါ လီၤဘျၢလၢထံအဖီလာ်. a လံာ်စီဆှံပာ်ဖျါထီၣ်ဝဲ တၢ်ဒိးဘျၢထံအဂ့ၢ်အါမး. (မၤတၢ် ၂:၄၁) လၢအကျါန့ၣ် အပၣ်ဃုာ်ဒီး ယ့ၣ်ၡူးဒိးဘျၢထံလၢ ထံကျိယၢ်ဒ့ၣ်အဂ့ၢ်. (မးသဲ ၃:၁၃, ၁၆) နံၣ်တဖၣ်ပူၤကွံာ်ဝံၤအလီၢ်ခံ ပှၤအဲၤသံအီးပးဖိတဂၤ အဒိးဘျၢထံလၢ “တၢ်လီၢ်လၢအအိၣ်ဒီး ထံတတီၤ” လၢကျဲကပၤ.—မၤတၢ် ၈:၃၆-၄၀.
ယ့ၣ်ၡူးသိၣ်လိဝဲလၢ အပျဲၢ်အဘီၣ်န့ၣ် ကဘၣ်ဒိးဘျၢထံ. (မးသဲ ၂၈:၁၉, ၂၀) ဒီးဖဲတၢ်မၢဖိပီလူး သိၣ်လိတၢ်အခါ အဝဲပာ်ဖျါထီၣ်က့ၤဝဲတၢ်ဂ့ၢ်အံၤ လီၤတံၢ်လီၤဆဲး.—၁ ပ့းတရူး ၃:၂၁.
တၢ်မၤလိတခါအံၤ ကပာ်ဖျါထီၣ်န့ၢ်ပှၤလၢ
တၢ်ဒိးဘျၢထံန့ၣ် မ့ၢ်မနုၤလဲၣ်
ဖဲပှၤတဂၤ ဒိးဘျၢထံအခါ မ့ၢ်ဝဲအပာ်ဖျါထီၣ်ဝဲလၢ ပှၤဂၤမဲာ်ညါလၢ အပီၢ်ယၢ်လီၤသးလၢ အတၢ်ဒဲးဘး ဒီးအအၢၣ်လီၤဝဲလၢ တၢ်အိၣ်သးမ့ၢ်အိၣ် ဒ်လဲၣ်ဂ့ၤဒ်လဲၣ်ဂ့ၤ အကမၤကစၢ်ယွၤ အတၢ်ဘၣ်သး. အဃိ အဝဲသ့ၣ် ကဘၣ်ဒိကနၣ် ယဟိဝၤယွၤ ဒီးယ့ၣ်ၡူး အတၢ်မၤလိာ် လၢအတၢ်အိၣ်မူအပူၤ ကိးသနၢၣ်ဒဲး. ပှၤလၢအဒိးဘျၢထံန့ၣ် အဝဲသ့ၣ်စးထီၣ်အိၣ်မူဝဲဒ် ကစၢ်ယွၤအတၢ်ဘၣ်သးအသိး အဃိ လီၤဂာ်လၢ အဝဲသ့ၣ် စးထီၣ်လဲၤတၢ်လၢ တၢ်မူအကျဲလံ.
ပှၤတဂၤ ဆီတလဲအတၢ်အိၣ်မူန့ၣ် ဘၣ်တၢ်ထိၣ်သတြီၤအီၤဒီး ပှၤလီၤဘျၢလၢထံဖီလာ်န့ၣ် အကြၢးဝဲဘၣ်ဝဲ. ဘၣ်မနုၤအဃိ ပတဲဒ်န့ၣ်လဲၣ်. တၢ်ဒိးဘျၢထံန့ၣ် လံာ်စီဆှံ ထိၣ်သတြီၤဝဲဒ် တၢ်ခူၣ်လီၤပှၤသံအသိး. (ရိမ့ၤ ၆:၄; ကလီးစဲ ၂:၁၂) ဖဲပှၤတဂၤ ဒိးဘျၢထံအခါ အပာ်ဖျါထီၣ်လၢ အပာ်တ့ၢ်ကွံာ်အတၢ်အိၣ်မူလီၢ်လံၤ အဃိ လီၤဂာ်ဒ်သိးဒီး အတၢ်အိၣ်မူလီၢ်လံၤန့ၣ် သံကွံာ်ဝဲလံ. ဒီးဖဲအဝဲဟဲက့ၤထီၣ်လၢ ထံကျါအခါ လီၤဂာ်ဒ်သိးဒီး အစးထီၣ်အိၣ်မူက့ၤ တၢ်အိၣ်မူလၢအသီ ဒ်ခရံာ်ဖိလၢ အဟ့ၣ်လုၢ်ထီၣ်အသးတဂၤအသိးလံ.
ဘၣ်ဃးဒီး ဖိသၣ်ဆံးဆံးဖိတဖၣ် ဒိးဘျၢထံန့ၣ် လံာ်စီဆှံတဲဝဲဒ်လဲၣ်
လံာ်စီဆှံ တသိၣ်လိဝဲလၢ ဖိသၣ်ဆံးဆံးဖိတဖၣ် ကြၢးဒိးဘျၢထံဘၣ်. b လံာ်စီဆှံပာ်ဖျါထီၣ်ဝဲလၢ ဒ်သိးပှၤတဂၤ ဒိးဘျၢထံကန့ၢ်အဂီၢ် တၢ်လၢအကဘၣ်မၤဝဲအိၣ်တနီၤ. အဒိ, အကဘၣ်သ့ၣ်ညါဝဲ လံာ်စီဆှံ အတၢ်သိၣ်လိ အခီၣ်ထံးခီၣ်ဘိ ဒီးမၤထွဲဝဲ. အဝဲကဘၣ် ပီၢ်ယၢ်လီၤအသးလၢ အတၢ်ဒဲးဘး ဒီးဟ့ၣ်လုၢ်ထီၣ်အသးလၢ ကစၢ်ယွၤအအိၣ်လၢ တၢ်ဃ့ထုကဖၣ်အပူၤ. (မၤတၢ် ၂:၃၈, ၄၁; ၈:၁၂) မ့မ့ၢ် ဖိသၣ်ဆံးဆံးဖိတဖၣ်န့ၣ် မၤဝဲဒ်န့ၣ်တသ့ဘၣ်.
ပှၤဘၣ်ဒိးဘျၢထံလၢ ပၢ် ဒီးဖိခွါ ဒီးသးစီဆှံအမံၤအပူၤန့ၣ် အဲၣ်ဒိးတဲဝဲ အခီပညီဒ်လဲၣ်
ယ့ၣ်ၡူး တဲအပျဲၢ်အဘီၣ်တဖၣ်လၢ လဲၤ “ဒုးကဲထီၣ် . . . လၢယပျဲၢ်ယဘီၣ်တက့ၢ်. ဒီးဒိးဘျၢ အဝဲသ့ၣ်လၢ ပၢ် ဒီးဖိခွါ ဒီးသးစီဆှံအမံၤအပူၤတက့ၢ်. သိၣ်လိအဝဲသ့ၣ် ဒ်သိးအဝဲသ့ၣ်ကမၤထွဲ တၢ်လၢယမၤလိာ်သု ခဲလၢာ်တက့ၢ်.” (မးသဲ ၂၈:၁၉, ၂၀) ပှၤလၢ အဒိးဘျၢထံလၢ ပၢ် ဒီးဖိခွါ ဒီးသးစီဆှံ “အမံၤအပူၤ” န့ၣ် အဲၣ်ဒိးတဲဝဲ အဝဲသ့ၣ်နၢ်ပၢၢ် ဒီးတူၢ်လိာ်ဝဲ ယဟိဝၤယွၤ ဒီးယ့ၣ်ၡူး တၢ်န့ၢ်စိန့ၢ်ကမီၤ ဒီးအလီၢ်အလၤ ဒီးသးစီဆှံန့ၣ် အမူဒါမ့ၢ်မနုၤလဲၣ်. အဒိ စီၤပ့းတရူး တဲဝဲ ပှၤလၢအခီၣ်ဟးဂီၤလၢ အအိၣ်ဖျဲၣ်ထီၣ်လံၤလံၤတဂၤလၢ “လၢပှၤနစၤရ့းဖိ ခရံာ် အမံၤအပူၤန့ၣ် . . . ဆၢထၢၣ်ဟးတက့ၢ်.” (မၤတၢ် ၃:၆) အဃိ ပသ့ၣ်ညါဘၣ်လၢ စီၤပ့းတရူး သ့ၣ်ညါ ဒီးတူၢ်လိာ်ဝဲလၢ ယ့ၣ်ၡူးခရံာ် အိၣ်ဒီးတၢ်န့ၢ်စိန့ၢ်ကမီၤ ဒီးတၢ်သ့တၢ်ဘၣ်လၢ ကမၤဘျါက့ၤပှၤတဂၤန့ၣ် လၢတၢ်လီၤလးအပူၤ.
“ပၢ်” န့ၣ် အဲၣ်ဒိးတဲဝဲ ယဟိဝၤယွၤ. c အဝဲမ့ၢ် တၢ်ဘၣ်တ့ကစၢ်, ယွၤလၢအဟ့ၣ်လီၤ တၢ်သးသမူ, သ့တၢ်လၢာ်ကစၢ် ဒီးအဝဲအိၣ်ဒီး တၢ်န့ၢ်စိန့ၢ်ကမီၤ လၢလၢပှဲၤပှဲၤလၢ တၢ်ခဲလၢာ်အဖီခိၣ်.—၁ မိၤၡ့ ၁၇:၁; လီၣ်ဖျါ ၄:၁၁.
“ဖိခွါ” န့ၣ် မ့ၢ်ဝဲယ့ၣ်ၡူးခရံာ် လၢအဟ့ၣ်လီၤ အသးသမူ လၢပဂီၢ်. (ရိမ့ၤ ၆:၂၃) ဒ်သိးပကန့ၢ်ဘၣ် တၢ်အုၣ်က့ၤခီၣ်က့ၤအဂီၢ် ပကဘၣ်သ့ၣ်ညါ ဒီးတူၢ်လိာ် ယ့ၣ်ၡူးအမူဒါဖးဒိၣ်လၢ ဘၣ်ဃးဒီး ကစၢ်ယွၤအတၢ်တိာ်ပာ်လၢ ပှၤဟီၣ်ခိၣ်ဖိအဂီၢ်.—ယိၤဟၣ် ၁၄:၆; ၂၀:၃၁; မၤတၢ် ၄:၈-၁၂.
“သးစီဆှံ” န့ၣ် မ့ၢ်ဝဲ ကစၢ်ယွၤအတၢ်စိတၢ်ကမီၤလၢ အသူဝဲဒ်သိး ကမၤတၢ်တမံၤမံၤအဂီၢ်. d ကစၢ်ယွၤ သူဝဲအသးစီဆှံ ဒ်သိးကတ့လီၤတၢ်, ကဟ့ၣ်လီၤသးသမူ, ကဒုးသ့ၣ်ညါ ဝံတဖၣ် မ့တမ့ၢ် ပှၤတနီၤလၢ တၢ်ဂ့ၢ်တမံၤမံၤ ဒီးကဟ့ၣ်အဝဲသ့ၣ် တၢ်ဂံၢ်တၢ်ဘါ ဒ်သိးအဝဲသ့ၣ်မၤ ကစၢ်ယွၤအတၢ်ဘၣ်သး ကန့ၢ်အဂီၢ်. (၁ မိၤၡ့ ၁:၂; ယိၤဘး ၃၃:၄; ရိမ့ၤ ၁၅:၁၈, ၁၉) ယဟိဝၤယွၤ သူစ့ၢ်ကီး အသးစီဆှံ ဒ်သိးကထိၣ်ဟူးထိၣ်ဂဲၤထီၣ် ပှၤကွဲးလံာ်စီဆှံဖိတဖၣ်အသးလၢ ကကွဲးလီၤ ကစၢ်ယွၤအတၢ်ဆိကမိၣ်အဂီၢ်.—၂ ပ့းတရူး ၁:၂၁.
ပှၤမ့ၢ်ဒိးဘျၢထံ အါန့ၢ်ဒံးတဘျီန့ၣ် အကမၣ်ဧါ
ပှၤအါဂၤန့ၣ် အဝဲသ့ၣ်ဆီတလဲ အတၢ်ဘူၣ်တၢ်ဘါ. ဘၣ်ဆၣ် အဝဲသ့ၣ်တနီၤန့ၣ် ဒိးဘျၢထံလၢ အတၢ်ဘူၣ်တၢ်ဘါ လၢညါတခါဝံၤလံအဃိ အဝဲသ့ၣ် မ့ၢ်ဒိးဘျၢကဒီးထံန့ၣ် အကမၣ်ဧါ. ပှၤတနီၤန့ၣ် ခီဖျိလၢ အ့းဖ့းစူး ၄:၅ တဲဝဲလၢ “ကစၢ်တဂၤဃီ, တၢ်နာ်တမံၤဃီ, တၢ်ဒိးဘျၢတမံၤဃီ” အဃိ အဝဲသ့ၣ်နာ်ဝဲလၢ ပှၤမ့ၢ်ဒိးဘျၢထံအါန့ၢ်ဒံးတဘျီန့ၣ် အကမၣ်. ဘၣ်ဆၣ် လံာ်စီဆှံတဆၢအံၤ တအဲၣ်ဒိးတဲဝဲဒ်န့ၣ်ဘၣ်. ဘၣ်မနုၤအဃိ ပတဲဒ်န့ၣ်သ့လဲၣ်.
တၢ်ဂ့ၢ်လၢအဖီခိၣ် ဒီးအဖီလာ်. ပမ့ၢ်ဖးကွၢ် တၢ်ဂ့ၢ်လၢအဖီခိၣ် ဒီးအဖီလာ်န့ၣ် ဖဲ အ့းဖ့းစူး ၄:၅ န့ၣ် စီၤပီလူး အဲၣ်ဒိးတဲဝဲ ဘၣ်ဃးဒီး ခရံာ်ဖိလၢအမ့ၢ်အတီတဖၣ် ကဘၣ်အိၣ်ဒီး တၢ်ဃူတၢ်ဖိး ဒီးအတၢ်စူၢ်တၢ်နာ် ကဘၣ်ဒ်သိးလိာ်အသး. (အ့းဖ့းစူး ၄:၁-၃, ၁၆) အဃိ အဝဲသ့ၣ်ကဘၣ်ပိာ် ယ့ၣ်ၡူးခရံာ်အခံ, အတၢ်စူၢ်တၢ်နာ် ဒီးအတၢ်နၢ်ပၢၢ် ဘၣ်ဃးဒီး လံာ်စီဆှံန့ၣ် ကဘၣ်ဒ်သိးလိာ်အသး ဒီးအဝဲသ့ၣ် ကဘၣ်မၤထွဲဝဲ လံာ်စီဆှံ အတၢ်သိၣ်လိ အခီၣ်ထံးခီၣ်ဘိ တမံၤဃီ ဒ်သိးအဒိးဘျၢထံကန့ၢ်အဂီၢ်.
ပှၤတနီၤန့ၣ် အဒိးဘျၢထံဝံၤလံ ဘၣ်ဆၣ် အဝဲသ့ၣ် တနၢ်ပၢၢ်ဝဲ ခရံာ်ဖိ အတၢ်သိၣ်လိတဖၣ် ဂ့ၤဂ့ၤဘၣ်အဃိ တၢ်မၢဖိပီလူး ဟ့ၣ်ဂံၢ်ဟ့ၣ်ဘါဝဲ အဝဲသ့ၣ်လၢ ကဒိးဘျၢကဒီးထံ လၢအသီတဘျီ.—မၤတၢ် ၁၉:၁-၅.
ပှၤဒိးဘျၢထံကန့ၢ်အဂီၢ် ဘၣ်မၤမနုၤလဲၣ်. ဒ်သိး ကစၢ်ယွၤကတူၢ်လိာ် ပတၢ်ဒိးဘျၢထံအဂီၢ် ပကဘၣ်နၢ်ပၢၢ် လံာ်စီဆှံတၢ်မ့ၢ်တတီ လီၤတံၢ်လီၤဆဲး. (၁ တံၤမသ့း ၂:၃, ၄) ပှၤတဂၤ မ့ၢ်ဒိးဘျၢထံ ခီဖျိလၢ တၢ်ဘူၣ်တၢ်ဘါ အတၢ်သိၣ်လိလၢ အထီဒါလိာ်သးဒီး လံာ်စီဆှံန့ၣ် ကစၢ်ယွၤ တတူၢ်လိာ် အတၢ်ဒိးဘျၢထံဘၣ်. (ယိၤဟၣ် ၄:၂၃, ၂၄) အမ့ၢ်ဆိကမိၣ်ဝဲလၢ အမၤတၢ်လၢအဘၣ် သနာ်က့ နီၢ်ကီၢ်န့ၣ် အဝဲတမၤတၢ်လၢအဘၣ်ဒ် “တၢ်မ့ၢ်တၢ်တီ လီၤတံၢ်လီၤဆဲး” အသိးဘၣ်. (ရိမ့ၤ ၁၀:၂) အဃိ ဒ်သိး ကစၢ်ယွၤ ကတူၢ်လိာ် အတၢ်ဒိးဘျၢထံအဂီၢ် အဝဲကဘၣ်မၤလိ လံာ်စီဆှံ တၢ်မ့ၢ်တၢ်တီ, အိၣ်မူမၤထွဲ တၢ်လၢအမၤလိဘၣ်, ဟ့ၣ်လုၢ်ထီၣ်သးလၢ ကစၢ်ယွၤအအိၣ် ဒီးဒိးဘျၢကဒီးထံလၢ အသီတဘျီ. အဝဲမ့ၢ် ဒိးဘျၢကဒီးထံ ဒ်အံၤန့ၣ် တကမၣ်ဘၣ် မ့ၢ်ဝဲ အမၤတၢ်လၢအဘၣ်ဟီ.
တၢ်ဒိးဘျၢအဂၤလၢ လံာ်စီဆှံ ပာ်ဖျါထီၣ်ဝဲ
လံာ်စီဆှံ ပာ်ဖျါထီၣ်ဝဲ တၢ်ဒိးဘျၢအဂၤလၢ အခီပညီ လီၤဆီလိာ်အသးဒီး ခရံာ်ဖိတဖၣ် အတၢ်ဒိးဘျၢထံ. ပကကွၢ်သကိးတၢ်အဒိတနီၤ.
စီၤယိၤဟၣ် အတၢ်ဒိးဘျၢ. e ပှၤယူဒၤဖိ ဒီးကလုာ်ဂၤလၢ အဟဲနုာ်လီၤလၢ ပှၤယူဒၤဖိအတၢ်ဘါန့ၣ် ဒိးဘျၢထံလၢ စီၤယိၤဟၣ်အအိၣ် ဒ်သိးကပာ်ဖျါထီၣ်ဝဲလၢ အဝဲသ့ၣ် ပီၢ်ယၢ်လီၤက့ၤသး လၢအမၤကမၣ်ဘၣ် စီၤမိၤၡ့ အတၢ်သိၣ်တၢ်သီလၢ ကစၢ်ယွၤ ဟ့ၣ်လီၤပှၤအံၣ်စရ့လးဖိ. စီၤယိၤဟၣ် အတၢ်ဒိးဘျၢန့ၣ် အမၤစၢၤပှၤဂၤ ဒ်သိးအဝဲသ့ၣ် ကသ့ၣ်ညါ ဒီးတူၢ်လိာ်မ့းၡံအၤ လၢအမ့ၢ် ပှၤနစၤရ့းဖိ ယ့ၣ်ၡူး.—လူၤကၣ် ၁:၁၃-၁၇; ၃:၂, ၃; မၤတၢ် ၁၉:၄.
ယ့ၣ်ၡူး ဒိးဘျၢထံ. ယ့ၣ်ၡူး အတၢ်ဒိးဘျၢထံန့ၣ် လီၤဆီလိာ်သးလၢ တၢ်ဒိးဘျၢလၢအဂၤ. ယ့ၣ်ၡူးန့ၣ် အကဲပှၤလၢပှၤပှဲၤ ဒီးအတၢ်ဒဲးဘးတအိၣ်ဘၣ်. (၁ ပ့းတရူး ၂:၂၁, ၂၂) အဃိ အဝဲကဒိးဘျၢထံအဂီၢ် အတလိၣ် ပီၢ်ယၢ်လီၤက့ၤအသးဘၣ် ဒီးအတလိၣ် ‘ဃ့လၢကစၢ်ယွၤအအိၣ် ဒ်သိး အကဒိးန့ၢ်ဘၣ် သးလၢအသ့ၣ်ညါဒၣ်တၢ် လၢအကဆှီ’ အဂီၢ်ဘၣ်. (၁ ပ့းတရူး ၃:၂၁) အတၢ်ဒိးဘျၢထံန့ၣ် ပာ်ဖျါထီၣ်ဝဲလၢ အဝဲဟ့ၣ်လုၢ်ထီၣ်အသးလၢ ယဟိဝၤယွၤအအိၣ် လၢကမၤကစၢ်ယွၤ အတၢ်ဘၣ်သး ဒ်မ့းၡံအၤအသိးအဂီၢ်. ကစၢ်ယွၤ အတၢ်ဘၣ်သးအကျါန့ၣ် ပၣ်ဃုာ်ဒီး ခရံာ်ကဘၣ်ဟ့ၣ်လီၤ အသးသမူလၢပဂီၢ်.—ဧ့ၤဘြံၤ ၁၀:၇-၁၀.
တၢ်ဒိးဘျၢလၢ သးစီဆှံ. စီၤယိၤဟၣ် ဒီးယ့ၣ်ၡူး တဲဝဲဘၣ်ဃးဒီး တၢ်ဒိးဘျၢလၢ သးစီဆှံအဂ့ၢ်. (မးသဲ ၃:၁၁; လူၤကၣ် ၃:၁၆; မၤတၢ် ၁:၁-၅) ဘၣ်ဆၣ် တၢ်ဒိးဘျၢတခါအံၤန့ၣ် အခီပညီ တဒ်သိးဒီး တၢ်ဒိးဘျၢလၢ သးစီဆှံအမံၤအပူၤဘၣ်. (မးသဲ ၂၈:၁၉) မ့မ့ၢ်ဒ်န့ၣ်န့ၣ် အခီပညီဒ်လဲၣ်.
ယ့ၣ်ၡူးအပျဲၢ်အဘီၣ်လၢ အဒိးဘျၢသးလၢ သးစီဆှံန့ၣ် အိၣ်ထဲတနီၤလီၤ. အဝဲသ့ၣ်န့ၣ် အကဲပှၤလၢ အဘၣ်တၢ်ဒိးဖှူအီၤလၢ သးစီဆှံ မ့ၢ်လၢ ကစၢ်ယွၤ ဃုထၢထီၣ်အဝဲသ့ၣ် ဒ်သိးအကမၤသကိးတၢ်ဒီးခရံာ် လၢမူခိၣ် ဒ်စီၤပၤ ဒီးပှၤလုၢ်တၢ်အဒိၣ်တဖၣ်အသိး. ဒီးကပၢဝဲ ဟီၣ်ခိၣ်ဒီဘ့ၣ်. f (၁ ပ့းတရူး ၁:၃, ၄; လီၣ်ဖျါ ၅:၉, ၁၀) အဝဲသ့ၣ် ကပၢဘၣ်ဝဲ ယ့ၣ်ၡူးအပျဲၢ်အဘီၣ်လၢ အကကွဲၢ်တဖၣ် လၢအအိၣ်ဒီးတၢ်မုၢ်လၢ်လၢ ကအိၣ်မူဘၣ်လီၤထူလီၤယိာ်လၢ ဟီၣ်ခိၣ်ပၤရၤဒံစူးအပူၤ.—မးသဲ ၅:၅; လူၤကၣ် ၂၃:၄၃.
တၢ်ဒိးဘျၢလၢ ယ့ၣ်ၡူးခရံာ်အပူၤ ဒီးအတၢ်သံအပူၤ. ပှၤလၢအဘၣ်တၢ်ဒိးဘျၢအီၤလၢ သးစီဆှံတဖၣ်န့ၣ် “ဒိးဘျၢအသးလၢ ယ့ၣ်ၡူးခရံာ်အပူၤ” စ့ၢ်ကီး.” (ရိမ့ၤ ၆:၃) အဃိ ယ့ၣ်ၡူးအပျဲၢ်အဘီၣ်လၢ အဘၣ်တၢ်ဒိးဖှူအီၤ လၢအကပၢတၢ်ဒီးအီၤ လၢမူခိၣ်န့ၣ် ဒိးဘျၢအသးလၢ ယ့ၣ်ၡူးခရံာ်အပူၤ. ခီဖျိလၢ အဝဲသ့ၣ် ဒိးဘျၢအသးလၢ ယ့ၣ်ၡူးခရံာ်အပူၤအဃိ အဝဲသ့ၣ် ပၣ်ဃုာ်ဘၣ်လၢ ခရံာ်ဖိတၢ်အိၣ်ဖှိၣ်လၢ ဘၣ်တၢ်ဒိးဖှူအီၤအကျါ. ယ့ၣ်ၡူးမ့ၢ်ဝဲ ခိၣ် ဒီးအဝဲသ့ၣ် မ့ၢ်ဝဲ ယ့ၣ်ၡူးခရံာ်အနီၢ်ခိ.—၁ ကရံၣ်သူး ၁၂:၁၂, ၁၃, ၂၇; ကလီးစဲ ၁:၁၈.
ခရံာ်ဖိလၢ အဘၣ်တၢ်ဒိးဖှူအီၤတဖၣ်န့ၣ် ‘ဒိးဘျၢအသးလၢ [ယ့ၣ်ၡူးအ] တၢ်သံအပူၤ’ စ့ၢ်ကီး. (ရိမ့ၤ ၆:၃, ၄) အဝဲသ့ၣ် ကွၢ်လိယ့ၣ်ၡူး ဒီးပာ်ဆိ ကစၢ်ယွၤ အတၢ်ဘၣ်သး အါန့ၢ်ဒံး အနီၢ်ကစၢ် အတၢ်ဘၣ်သး ဒီးအဝဲသ့ၣ် ပာ်တ့ၢ်ကွံာ် အတၢ်မုၢ်လၢ်လၢ ကအိၣ်မူဘၣ်လၢ ဟီၣ်ခိၣ်ချၢ လီၤထူလီၤယိာ်. ဖဲအဝဲသ့ၣ် သံဒီးဂဲၤဆၢထၢၣ်သမူထီၣ်က့ၤ လၢမူခိၣ် ဒ်ပှၤနီၢ်သးဖိတဂၤအသိးအခါ အဝဲသ့ၣ် အတၢ်ဒိးဘျၢတခါအံၤ လၢထီၣ်ပှဲၤထီၣ်ဝဲ.—ရိမ့ၤ ၆:၅; ၁ ကရံၣ်သူး ၁၅:၄၂-၄၄.
တၢ်ဒိးဘျၢလၢမ့ၣ်အူ. ပှၤဘျၢတၢ် စီၤယိၤဟၣ်တဲဘၣ် ပှၤဒိကနၣ်အီၤတဖၣ်လၢ “အဝဲ [ယ့ၣ်ၡူး] ကဒိးဘျၢသုလၢ သးစီဆှံ ဒီးလၢမ့ၣ်အူလီၤ. အနီၣ်တရီာ်ဘုန့ၣ် အိၣ်လၢအစုပူၤလံ. အဝဲကမၤကဆှီထီၣ်ကွံာ် အကြဲၢ်ပူၤပျီပျီ ဒီးကပာ်ဖှိၣ်အဘု လၢဘုဖီပူၤလီၤ. မ့မ့ၢ်ဘုဘ့ၣ်န့ၣ် အဝဲကဒွဲၣ်အူကွံာ်ဝဲလၢ မ့ၣ်အူလၢ အလီၤပံာ်တသ့ဘၣ်အပူၤလီၤ.” (မးသဲ ၃:၁၁, ၁၂) ပာ်သူၣ်ပာ်သးလၢ တၢ်ဒိးဘျၢလၢမ့ၣ်အူ ဒီးတၢ်ဒိးဘျၢလၢ သးစီဆှံန့ၣ် လီၤဆီလိာ်အသး. စီၤယိၤဟၣ် တဲဝဲတၢ်အဒိတခါန့ၣ်န့ၣ် အဲၣ်ဒိးတဲဝဲမနုၤလဲၣ်.
ဘုန့ၣ်အဲၣ်ဒိးတဲဝဲ ပှၤလၢအကဒိကနၣ် ယ့ၣ်ၡူးအကလုၢ်. ဒီးအဝဲသ့ၣ်န့ၣ် အိၣ်ဒီးတၢ်မုၢ်လၢ်လၢ ကဘၣ်တၢ်ဒိးဘျၢအီၤလၢ သးစီဆှံ. မ့မ့ၢ် ဘုဘ့ၣ်န့ၣ် အဲၣ်ဒိးတဲဝဲ ပှၤလၢအတဒိကနၣ် ယ့ၣ်ၡူးအကလုၢ်. အဝဲသ့ၣ်န့ၣ် ကဘၣ်တၢ်ဒိးဘျၢအီၤလၢမ့ၣ်အူ. အအဲၣ်ဒိးတဲဝဲ အဝဲသ့ၣ် ကတုၤလၢ တၢ်ဟးဂီၤလီၤထူလီၤယိာ်.—မးသဲ ၃:၇-၁၂; လူၤကၣ် ၃:၁၆, ၁၇.
a Vine’s Complete Expository Dictionary of Old and New Testament Words ပာ်ဖျါထီၣ်ဝဲဒၣ်လၢ ကြံးအတၢ်ကတိၤလၢအမ့ၢ် “တၢ်ဒိးဘျၢထံ” န့ၣ်အခီပညီမ့ၢ်ဝဲ “ပှၤလဲၤနုာ်လီၤလၢထံကျါ ဒီးပှၤဘျၢလီၤသးလၢထံကျါ ဒီတဂၤဝံၤ ဟဲက့ၤပၢၢ်ထီၣ်လၢထံကျါ.”
b “ပှၤဒိးဘျၢ ဖိသၣ်ဆံးဆံးဖိတဖၣ်ထံ” န့ၣ်အဲၣ်ဒိးတဲဝဲ တၢ်လၢ တၢ်ဘူၣ်တၢ်ဘါတနီၤမၤဝဲဖဲ အယုၢ်န့ၢ်ပှၤဖိသၣ်အီနုၢ်အမံၤ ဒီးပှၤဖှံလီၤထံ မ့တမ့ၢ် လူလီၤထံလၢ ပှၤဖိသၣ်အခိၣ်လိၤအခါ.
c ယဟိဝၤန့ၣ် မ့ၢ်ဝဲ ကစၢ်ယွၤအမံၤ. (စံးထီၣ်ပတြၢၤ ၈၃:၁၈) ဖးကွၢ် တၢ်ဂ့ၢ်လၢအမ့ၢ် “ယဟိဝၤယွၤန့ၣ် မ့ၢ်မတၤလဲၣ်.”
d ဖးကွၢ် တၢ်ဂ့ၢ်လၢအမ့ၢ် “သးစီဆှံန့ၣ် မ့ၢ်မနုၤလဲၣ်.”
f ဖးကွၢ် တၢ်ဂ့ၢ်လၢအမ့ၢ် “မတၤတဖၣ် ကလဲၤထီၣ်ဘၣ်လၢ မူခိၣ်လဲၣ်.”
g တဘျီတခီၣ် လံာ်စီဆှံ သူဝဲတၢ်ကတိၤလၢအမ့ၢ် “ဒုးဘျၢ” ဒ်သိး ကပာ်ဖျါထီၣ် တၢ်ဂ့ၢ်ဘၣ်ဃးဒီး ပှၤကမၤကဆှီ တၢ်ဖိတၢ်လံၤ လၢတၢ်ဘူၣ်ထီၣ်ဘါထီၣ်အပူၤ ဒ်သိးဒီး ဘျၢလီၤ တၢ်ဖိတၢ်လံၤတဖၣ် လၢထံကျါ. (မၢ်ကူး ၇:၄; ဧ့ၤဘြံၤ ၉:၁၀) ဘၣ်ဆၣ် တၢ်ဂ့ၢ်တဖၣ်အံၤန့ၣ် လီၤဆီလိာ်အသးဒီး ယ့ၣ်ၡူး ဒီးအပျဲၢ်အဘီၣ်တဖၣ် အတၢ်ဒိးဘျၢထံ.
You May Also Like
တၢ်သံကွၢ်တဖၣ်လၢ အတၢ်စံးဆၢအိၣ်လၢ လံာ်စီဆှံပူၤ
တၢ်ဘူၣ်တၢ်ဘါခဲလၢာ်န့ၣ် မ့ၢ်အဒ်သိးသိးဧါ, မ့ၢ်ကစၢ်ယွၤ တူၢ်လိာ်ဝဲခဲလၢာ်ဧါ
လံာ်စီဆှံ ပာ်ဖျါထီၣ်ဝဲ တၢ်ဂ့ၢ်ခိၣ်သ့ၣ်ခံထံၣ်.
ESSENTIAL BIBLE TEACHINGS
မ့ၢ်ကစၢ်ယွၤ တူၢ်လိာ် တၢ်ဘူၣ်တၢ်ဘါခဲလၢာ်ဧါ
ပှၤအါဂၤနာ်ဝဲလၢ နမ့ၢ်အိၣ်လၢ တၢ်ဘူၣ်တၢ်ဘါ တခါဂ့ၤတခါဂ့ၤန့ၣ် အရ့တဒိၣ်ဘၣ်.
လံာ်စီဆှံ အတၢ်သိၣ်လိတဖၣ်
မၤလိကွၢ် လံာ်စီဆှံဒီးပှၤ
မၤလိသကိး တၢ်မၤလိလံာ်စီဆှံ လၢတလိၣ်ဟ့ၣ်စ့ဘၣ်ဒီး ပှၤလၢအကမၤလိနၤ လံာ်စီဆှံတဂၤ.