جاستاردىڭ ساۋالدارى
مەن بولەك تۇرۋعا دايىنمىن با؟
ۇيدەن كوشۋ ٴبىر جاعىنان قىزىق بولسا، ٴبىر جاعىنان قورقىنىشتى بولۋى مۇمكىن. ٶز بەتىڭشە ٶمىر سۇرۋگە دايىنسىڭ با، جوق پا — ونى قالاي انىقتاي الاسىڭ؟
سەبەبىن انىقتاپ ال
ۇيدەن كەتۋدى شەشۋىڭە وتە كوپ نارسە سەبەپ بولۋى مۇمكىن. ولاردىڭ كەيبىرى ٴتىپتى اقىلدىلىققا دا جاتپايدى. مىسالى، ماريو ەسىمدى جىگىت بىلاي دەيدى: «ۇيدەن كەتكىم كەلگەن سەبەبى — ٷي شارۋالارىنان قۇتىلعىم كەلگەن ەدى».
شىندىعىنا كەلگەندە، ۇيدەن كەتسەڭ، ەركىندىگىڭ ازايماسا، كوبەيمەيدى. 18 جاسار ونيا بىلاي دەيدى: «بولەك تۇرساڭ، تۇراتىن جەرىڭدى ٶزىڭ جينايسىڭ، تاماقتى ٶزىڭ پىسىرەسىڭ، شىعىندارىڭدى ٶزىڭ تولەيسىڭ. مۇنداي كەزدە قاسىڭدا كومەكتەسە سالاتىن اتا-اناڭ بولمايدى».
ويتۇيىن: دايىن، دايىن ەمەسىڭدى ٴبىلۋ ٷشىن، ۇيدەن نە سەبەپتى كوشىپ كەتكىڭ كەلەتىنىن تۇسىنۋىڭ كەرەك.
شىعىندى ەسەپتەپ ال
يسا بىلاي دەگەن: «ارالارىڭداعى بىرەۋ مۇنارا سالعىسى كەلسە، قۇرىلىسىن اياقتاۋعا قاراجاتى جەتەر-جەتپەسىن ٴبىلۋ ٷشىن، الدىمەن شىعىنىن ەسەپتەپ الماي ما؟» (لۇقا 14:28). ۇيدەن كوشپەس بۇرىن شىعىنىڭدى قالاي ەسەپتەپ الساڭ بولادى؟ كەلەسى سالالاردى قاراستىرىپ، ٶزىڭدى تەكسەرىپ كور.
اقشانى اقىلمەن جۇمساي بىلەسىڭ بە؟
كيەلى كىتاپتا: «اقشا ادامدى قورعايدى»،— دەلىنگەن (ۋاعىزداۋشى 7:12).
اقشانى ۇنەمدەپ ۇستاۋ سەن ٷشىن قيىن با؟
اقشانى وڭدى-سولدى شاشقاندى ۇناتاسىڭ با؟
وزگەلەردەن ٴجيى قارىز الاسىڭ با؟
وسى سۇراقتاردىڭ كەز كەلگەن بىرەۋىنە «ٴيا» دەپ جاۋاپ بەرسەڭ، جەكە ٶمىر سۇرسەم دەگەن ٴتاتتى ارمانىڭ اشتى ومىرگە اينالىپ كەتۋى مۇمكىن.
«اعام 19 جاسىندا ۇيدەن كەتىپ، بولەك تۇردى. ول ٴبىر جىلدىڭ ىشىندە بار جيعان-تەرگەنىن تاۋىستى، اقشاسىن تولەمەگەنى ٷشىن كولىگىنەن ايىرىلدى، ەش جەردەن نەسيە دە الا المادى. اقىر سوڭىندا، ونىڭ ۇيگە قايتۋدان باسقا امالى قالمادى» (دانيەللا).
قازىردەن باستاپ بىلاي ىستەپ كور: اتا-اناڭنان اي سايىنعى شىعىندارى قانشا ەكەنىن سۇراپ كورسەڭ بولادى. ولار اي سايىن قانداي شىعىنداردى تولەيدى، كىرىستى قالاي جوسپارلايدى، اقشانى قالاي ۇنەمدەيدى — وسىنىڭ ٴبارىن سۇراپ ٴبىل.
ويتۇيىن: ۇيدە تۇرىپ جاتقان كەزىڭدە اقشانى دۇرىس جۇمساۋدى ۇيرەنسەڭ، بولەك كەتكەندە ومىردە بولىپ تۇراتىن قارجىلاي قيىندىقتارعا دايىن بولاسىڭ.
ٶزىڭدى تارتىپكە سالاسىڭ با؟
كيەلى كىتاپتا: «اركىم ٶز جۇگىن ٶزى كوتەرەدى»،— دەلىنگەن (عالاتتىقتارعا 6:5).
ىستەردى كەيىنگە ىسىرۋعا بەيىمسىڭ بە؟
ٷي تىرلىكتەرىن ىستەۋدى اتا-اناڭ ساعان قايتا-قايتا ايتىپ وتىرا ما؟
ۇيگە اتا-اناڭ بەلگىلەگەن ۋاقىتتان كەش كەلەسىڭ بە؟
وسى سۇراقتاردىڭ كەز كەلگەن بىرەۋىنە «ٴيا» دەپ جاۋاپ بەرسەڭ، بولەك تۇرعان كەزدە مىندەتتەرىڭدى اتقارۋ ساعان قاتتى قيىن بولۋى مۇمكىن.
«جەكە ٶزىڭ تۇرعاندا، كەيبىر نارسەلەردى ىستەۋ ونشا ۇناماۋى مۇمكىن، ٴبىراق ىستەۋ كەرەك بولعاندىقتان ىستەيسىڭ. قاسىڭدا انانى ىستە، مىنانى ىستە دەيتىن ەشكىم بولماعاندىقتان، كۇندەلىكتى ىستەردى ىستەۋگە وزدىگىڭنەن تالپىنعانىڭ ماڭىزدى» (دجەسسيكا).
قازىردەن باستاپ بىلاي ىستەپ كور: ٴبىر اي بويى ۇيدە مۇمكىندىگىنشە كوپ ٸستى ٶز موينىڭا الۋعا تىرىس. مىسالى، ٷيدى ٶزىڭ جينا، كيىمدەرىڭدى جۋ، ازىق-تۇلىكتى ٶزىڭ ساتىپ ال، كۇندە تاماق ٴپىسىر، ىدىس-اياق جۋ. وسىلاي ەتىپ كورسەڭ، بولەك تۇرعاندا ٶمىرىڭنىڭ شامامەن قانداي بولاتىنىن بىلە الاسىڭ.
ويتۇيىن: ەشكىمگە تاۋەلدى بولماي ٶمىر سۇرگىڭ كەلسە، ٶز-ٶزىڭدى تارتىپكە سالۋ اسا ماڭىزدى.
ەش دايىندىقسىز ۇيدەن كەتىپ بولەك تۇرۋ ٴپاراشيۋتتى قالاي قولدانۋدى بىلمەي جاتىپ ۇشاقتان سەكىرىپ كەتۋمەن تەڭ
مىنەزىڭ سابىرلى ما؟
كيەلى كىتاپتا: «اشۋ، ىزاقورلىق، جاماندىق، قورلىق سوزدەر سياقتى نارسەنىڭ بارىنەن ارىلىڭدار»،— دەلىنگەن (قولوستىقتارعا 3:8).
ٶزگەلەرمەن ٴتىل تابىسۋ سەن ٷشىن قيىن با؟
ۇستامدىلىق تانىتۋ قيىنعا سوعا ما؟
ٴبارى ۇنەمى ٶزىڭ قالاعانداي بولۋ ٷشىن ايتقانىڭدا تۇرىپ الاسىڭ با؟
وسى سۇراقتاردىڭ كەز كەلگەن بىرەۋىنە «ٴيا» دەپ جاۋاپ بەرسەڭ، ساعان ٴبىر بولمەدەگى كورشىڭمەن نەمەسە بولاشاقتا كۇيەۋىڭمەن نە ايەلىڭمەن بىرگە تۇرۋ قيىن بولۋى مۇمكىن.
«ٴبىر بولمەدەگى كورشىممەن تۇرعاندا، مىنەزىم بار ەكەنىن بايقادىم. سترەسكە ۇشىراعان كەزدە كوڭىل كۇيىم بۇزىلىپ كەتەدى ەكەن. ٴبىراق مەن باسقالار بۇل مىنەزىمە شىداۋعا مىندەتتى ەمەس ەكەنىن ٴتۇسىندىم. سوندىقتان سترەسكە قارسى تۇرۋدىڭ دۇرىس جولىن تابۋىم كەرەك دەپ شەشتىم» (حەلەنا).
قازىردەن باستاپ بىلاي ىستەپ كور: اتا-اناڭمەن جانە باۋىرلارىڭمەن ٴتىل تابىسۋدى ۇيرەن. سەبەبى قازىرگى ۋاقىتتا ٷي ىشىندەگىلەردىڭ كەمشىلىكتەرىنە قالاي قارايتىن بولساڭ، الداعى ۋاقىتتا بىرگە تۇراتىن ادامداردىڭ كەمشىلىكتەرىنە تۋرا سولاي قارايتىن بولاسىڭ.
ويتۇيىن: بولەك تۇرۋ — جاۋاپكەرشىلىكتەن قاشۋدىڭ جولى ەمەس، دايىندىق پەن ەپتىلىكتى تالاپ ەتەتىن قادام. بولەك تۇرۋدىڭ نە ەكەنىن بىلەتىن اداممەن سويلەسىپ كورسەڭ بولادى. ولاردان: «ۋاقىتتى ارتقا قايتارسا، نەنى باسقاشا ىستەر ەدىڭ؟ سول كەزدە بىلگەنىمدە عوي دەگەن نارسەلەر بار ما؟»— دەپ سۇراپ كور. كەز كەلگەن ۇلكەن قادام جاساماس بۇرىن وسىلاي اقىلداسقانىڭ دۇرىس.
قىزىقتى بولار مالىمەتتەر
جاستاردىڭ ساۋالدارى
اقشانى دۇرىس جۇمساۋدى قالاي ۇيرەنە الامىن؟
دۇكەنگە جاي ارالاپ شىعۋ ٷشىن بارىپ، ٴبىراق قىمبات زات ساتىپ الىپ قايتقان كەزىڭ بولعان با؟ سولاي بولسا، وسى ماقالا سەن ٷشىن.
