Thimo 14:1-35
14 Mũtumia ũrĩa mũũgĩ kũna nĩ gwaka akaga nyũmba yake,+No ũrĩa mũkĩgu amĩmomoraga na moko make mwene.
2 Mũndũ ũrĩa ũthiaga na mĩthiĩre ya ũrũngĩrĩru nĩ etigĩrĩte Jehova,No ũrĩa ũthiaga na njĩra cia wara* nĩ amũnyararĩte.
3 Rũthanju rwa mwĩtĩo rũkoragwo kanua-inĩ ga kĩrimũ,No mĩromo ya andũ arĩa ogĩ nĩ ĩrĩmagitagĩra.
4 Kũndũ kũrĩa gũtarĩ ng’ombe mũharatĩ ũkoragwo ũrĩ mũtheru,No hinya wa ndegwa nĩ ũrehaga magetha maingĩ.
5 Mũira mwĩhokeku ndaheenanagia,No mũira wa maheeni aheenanagia hĩndĩ ciothe.+
6 Mũndũ wa kĩnyũrũri acaragia ũũgĩ no ndawonaga,No ũmenyo nĩ wonekaga na njĩra hũthũ harĩ mũndũ ũrĩa ũrĩ na ũtaũku.+
7 Ikara haraya na kĩrimũ,Tondũ ndũkuona ũmenyo mĩromo-inĩ yakĩo.+
8 Nĩ ũndũ wa ũũgĩ-rĩ, mũndũ mũũgĩ nĩ ataũkagĩrũo nĩ njĩra ĩrĩa aragerera,No andũ arĩa akĩgu maheenagio nĩ* ũrimũ wao ene.+
9 Irimũ cionaga gũkorũo ihĩtĩtie* ta arĩ o ithaako,+No harĩ andũ arĩa arũngĩrĩru, nĩ hakoragwo na wendi wa kũiguithania.*
10 Ngoro nĩyo ĩmenyaga ruo rwayo,Na gũtirĩ mũndũ ũngĩ ũngĩnyitanĩra nayo gĩkeno-inĩ kĩayo.
11 Nyũmba ya andũ arĩa aganu nĩ ĩkaanangwo,+No hema ya andũ arĩa arũngĩrĩru nĩ ĩkaagaacĩra.
12 Kũrĩ njĩra yonekaga ĩrĩ njagĩrĩru harĩ mũndũ,+No marigĩrĩrio-inĩ ĩtongoragia gĩkuũ-inĩ.+
13 O na hĩndĩ ya gũtheka, ngoro no ĩkorũo na ruo,Na gĩkeno no kĩrĩkĩrĩrie na kĩeha.
14 Mũndũ ũrĩa mũremi ngoro-inĩ nĩ arĩgethaga moimĩrĩro ma mĩthiĩre yake,+No mũndũ ũrĩa mwega nĩ agĩaga na ngerenwa ya maũndũ marĩa ekaga.+
15 Mũndũ ũrĩa ũtarĩ na ũũgĩ* etĩkagia kiugo o gĩothe,No ũrĩa mũũgĩ nĩ ecũranagia ikinya o rĩothe.+
16 Mũndũ mũũgĩ nĩ emenyagĩrĩra na agatigana na ũndũ mũũru,No ũrĩa mũkĩgu ndamakagio nĩ ũndũ na akoragwo eĩtĩkĩtie mũno.
17 Mũndũ ũrĩa ũrakaraga na ihenya ekaga maũndũ na ũrimũ,+No mũndũ ũrĩa wĩcũranagia maũndũ* nĩ athũirũo.
18 Andũ arĩa matarĩ ogĩ* marĩgayaga o ũrimũ,No andũ arĩa ogĩ mahumbagwo thũmbĩ ya ũmenyo.+
19 Andũ arĩa oru no mũhaka makaainamĩrĩra andũ arĩa ega,Nao arĩa aganu nĩ makaainamĩrĩra ihingo-inĩ cia andũ arĩa athingu.
20 Mũndũ mũthĩni amenagwo nginya nĩ andũ arĩa marigainie nake,+No mũndũ ũrĩa mũtongu akoragwo na arata aingĩ.+
21 Mũndũ ũrĩa ũnyararaga mũndũ ũrĩa ũngĩ nĩ kwĩhia ehagia,No ũrĩa ũcayagĩra arĩa matarĩ hinya nĩ akoragwo na gĩkeno.+
22 Na githĩ andũ arĩa mabangaga maũndũ moru matirĩhĩtagia njĩra?
No arĩa mendaga gwĩka wega nĩ marĩamũkagĩra wendo* o na wĩhokeku.+
23 Wĩra o wothe mũritũ nĩ ũkoragwo na ũguni,No mĩario mĩtheri ĩrehaga wagi.+
24 Ũtonga wa andũ arĩa ogĩ nĩguo thũmbĩ yao;No ũrimũ wa andũ arĩa akĩgu no ũrimũ mũtheri.+
25 Mũira wa ma nĩ ahonokagia mĩoyo,No mũira ũtarĩ wa ma aheenanagia hĩndĩ ciothe.
26 Gwĩtigĩra Jehova nĩ gũtũmaga mũndũ akorũo na mwĩhoko mũrũmu,+Na nĩ gũgaatuĩka rĩũrĩro harĩ ciana ciake.+
27 Gwĩtigĩra Jehova nĩ itherũkĩro rĩa muoyo,Nĩ kũgarũraga mũndũ kuuma mĩtego-inĩ ya gĩkuũ.
28 Kĩrĩndĩ kĩnene nĩkĩo riri wa mũthamaki,+No mwathani ũtarĩ na andũ a gwatha nĩ mwanangĩku.
29 Mũndũ ũrĩa ũtahiũhaga kũrakara akoragwo na ũtaũku mũnene,+No ũrĩa ũtarĩ ũkirĩrĩria onanagia ũrimũ wake.+
30 Ngoro hooreru nĩ ĩheaga mwĩrĩ muoyo,*No ũiru nĩ ũbuthagia mahĩndĩ.+
31 Ũrĩa ũhinyagĩrĩria mũndũ ũtarĩ hinya nĩ Mũũmbi wake arumaga,+No ũrĩa ũcayagĩra arĩa athĩni nĩ Mũũmbi wao agoocithagia.+
32 Mũndũ ũrĩa mwaganu arĩgũithagio nĩ ũũru wake mwene,No ũrĩa mũthingu nĩ arĩonaga rĩũrĩro nĩ ũndũ wa wĩkindĩru wake.+
33 Ũũgĩ ũikaraga ũhooreire ngoro-inĩ ya mũndũ ũrĩa ũkoragwo na ũtaũku,+Ĩndĩ gatagatĩ-inĩ ka andũ arĩa akĩgu no nginya wĩmenyithanie.
34 Ũthingu nĩ ũtũũgagĩria rũrĩrĩ,+No mehia nĩ gĩconoko harĩ kĩrĩndĩ kĩa andũ.
35 Mũthamaki nĩ akenagio nĩ ndungata ĩrĩa ĩkaga maũndũ na ũtaũku,+No erekagĩria mang’ũrĩ make kũrĩ ndungata ĩrĩa ĩkaga maũndũ ma thoni.+
Tũũhoro twa magũrũ-inĩ
^ Kana “njogomu.”
^ Kana hihi, “arĩa akĩgu maheenagia arĩa angĩ na.”
^ Kana “kũrũnga maũndũ.”
^ Kana “nĩ hakoragwo na wendi mwega.”
^ Kana “ũmenyeru.”
^ Kana “mũndũ ũrĩa ũhũthagĩra ũhoti wa gwĩciria.”
^ Kana “matarĩ ũmenyeru.”
^ Kana “wendo mwĩhokeku.”
^ Kana “ũgima mwega.”
