Thimo 10:1-32
10 Thimo cia Suleimani.+
Mwana mũũgĩ atũmaga ithe akene+No mwana mũkĩgu atũmaga nyina agĩe na kĩeha.
2 Mĩthithũ yumanĩte na waganu ndĩkoragwo na ũguni,No ũthingu nĩguo ũhonokagia mũndũ kuuma gĩkuũ-inĩ.+
3 Jehova ndagaatũma mũndũ mũthingu ahũte,+No arĩa aganu nĩ arĩmaimaga kĩrĩa meriragĩria.
4 Moko magũtaru marehaga ũthĩni,+No moko marĩ kĩyo marehaga ũtonga.+
5 Mwana ũrĩa ũhũthagĩra ũtaũku acokanagĩrĩria irio hĩndĩ ya ũrugarĩ,No mwana ũrĩa wĩkaga maũndũ ma thoni akoragwo toro hĩndĩ ya magetha.+
6 Irathimo ikoragwo mũtwe-inĩ wa mũndũ ũrĩa mũthingu,+No kanua ka mũndũ ũrĩa mwaganu kahithaga maũndũ ma ũhinya.
7 Kĩririkano kĩa* mũndũ ũrĩa mũthingu nĩ gĩkaarathimwo,+No rĩĩtwa rĩa andũ arĩa aganu nĩ kũbutha rĩkaabutha.+
8 Mũndũ ũkoragwo na ngoro ĩrĩ na ũũgĩ nĩ etĩkĩraga motaaro,*+No mũndũ ũrĩa waragia maũndũ ma ũrimũ nĩ akaarangĩrĩrio thĩ.+
9 Mũndũ ũrĩa ũthiaga na wĩkindĩru arĩthiaga arĩ na thayũ,+No ũrĩa wogomagia njĩra ciake nĩ akaamenyeka.+
10 Mũndũ ũrĩa uunaga riitho rĩake na wara atũmaga kũgĩe na kĩeha,+Na mũndũ ũrĩa waragia maũndũ ma ũrimũ nĩ akaarangĩrĩrio thĩ.+
11 Kanua ka mũndũ ũrĩa mũthingu nĩ kĩhumo kĩa muoyo,+No kanua ka mũndũ ũrĩa mwaganu kahithaga maũndũ ma ũhinya.+
12 Rũmena nĩruo rũcogagĩra ngũĩ,No wendo nĩ ũhumbagĩra mehia mothe.+
13 Ũũgĩ ũkoragwo mĩromo-inĩ ya mũndũ ũrĩa ũrĩ na ũtaũku,+No rũthanju nĩ rwa mũgongo wa mũndũ ũrĩa ũtarĩ wĩcirio.*+
14 Andũ arĩa ogĩ nĩ meigagĩra ũmenyo ũrĩ ta mũthithũ,+No kanua ga kĩrimũ kerehagĩra mwanangĩko.+
15 Ũtonga wa* mũndũ mũtongu nĩ itũũra rĩake rĩrĩ na ũgitĩri.
Mwanangĩko wa andũ arĩa athĩni nĩ ũthĩni wao.+
16 Mawĩra ma mũndũ ũrĩa mũthingu matongoragia muoyo-inĩ;No maciaro ma mũndũ ũrĩa mwaganu matongoragia mehia-inĩ.+
17 Mũndũ ũrĩa wathĩkagĩra ũtaaro nĩ njĩra ya muoyo,*No ũrĩa ũtetĩkagĩra kũrũngwo nĩ ahĩtithagia andũ arĩa angĩ.
18 Mũndũ ũrĩa ũhithaga rũmena rwake nĩ maheeni aragia,+Na mũndũ ũrĩa ũtheremagia maũndũ ma njambanio* nĩ mũkĩgu.
19 Hĩndĩ ĩrĩa ciugo ciaingĩha, mehia matingĩĩthemwo,+No mũndũ ũrĩa ũgiragĩrĩria mĩromo yake akoragwo na ũũgĩ.+
20 Rũrĩmĩ rwa mũndũ ũrĩa mũthingu rũtariĩ ta betha ĩrĩa njega biũ,+No ngoro ya mũndũ ũrĩa mwaganu ndĩrĩ bata mũnene.
21 Mĩromo ya mũndũ ũrĩa mũthingu nĩ ĩhũnagia* andũ aingĩ,+No andũ arĩa akĩgu makuaga nĩ kwaga wĩcirio.+
22 Kĩrathimo kĩa Jehova nĩkĩo gĩtongagia mũndũ,+Na ndarĩ ruo* onganagĩrĩria nakĩo.
23 Gwĩka maũndũ ma thoni nĩ ta mũthaako harĩ mũndũ ũrĩa mũkĩgu,No ũũgĩ nĩ wa mũndũ ũrĩa ũkoragwo na ũtaũku.+
24 Mũndũ ũrĩa mwaganu nĩ agaakorũo nĩ ũndũ ũrĩa etigagĩra;No andũ arĩa athingu nĩ makaahingĩrio merirĩria mao.+
25 Rĩrĩa kĩhuhũkanio kĩahĩtũka, mũndũ ũrĩa mwaganu ndakoragwo kuo rĩngĩ,+No mũndũ ũrĩa mũthingu atũũraga atariĩ ta mũthingi tene na tene.+
26 O ta thiki ĩrĩ magego-inĩ, na ndogo ĩrĩ maitho-inĩ,No taguo kĩgũũta gĩtariĩ harĩ mũndũ ũrĩa ũgĩtũmaga.*
27 Gwĩtigĩra Jehova nĩ gũtũmaga matukũ ma ũtũũro wa mũndũ mongerereke,+No mĩaka ya andũ arĩa aganu nĩ ĩkaanyihio.+
28 Kĩĩrĩgĩrĩro kĩa andũ arĩa athingu kĩrehaga gĩkeno,+No kĩĩrĩgĩrĩro kĩa andũ arĩa aganu nĩ gĩgaathira.+
29 Njĩra ya Jehova nĩ mwĩgitio harĩ mũndũ ũrĩa ũtarĩ ũcuke,+No nĩ mwanangĩko harĩ arĩa mekaga maũndũ moru.+
30 Mũndũ ũrĩa mũthingu gũtirĩ hĩndĩ akaagwa,+No andũ arĩa aganu matigaacoka gũtũũra thĩinĩ wa thĩ.+
31 Kanua ka mũndũ ũrĩa mũthingu karagia* ũũgĩ,No rũrĩmĩ rũrĩa rwaragia maũndũ moru nĩ rũkaaniinwo.
32 Mĩromo ya mũndũ ũrĩa mũthingu nĩ ĩmenyaga maũndũ marĩa mega,No kanua ka andũ arĩa aganu karagia maũndũ moru.
Tũũhoro twa magũrũ-inĩ
^ Kana “Ngumo ya.”
^ Ũkk., “maathani.”
^ Kana “ũkoragwo na ngoro ĩtarĩ na ũtaũku.”
^ Kana “Kĩndũ kĩrĩa kĩa goro kĩa.”
^ Kana hihi, “arĩ njĩra-inĩ ya muoyo.”
^ Kana “mũhuhu.”
^ Kana “ĩtongoragia.”
^ Kana “kĩeha; moritũ.”
^ Kana “ũkĩandĩkĩte.”
^ Kana “gaciaraga maciaro ma.”
