Medyo lawig na kamo nga naga-date, pero daw nagaduhaduha ka. Padayunon mo bala ang inyo relasyon ukon indi? Ini nga artikulo makabulig sa imo nga makadesisyon.

Sa sini nga artikulo

•  Pag-atubang sa mga pangduhaduha

•  Paghimo sing desisyon

•  Kon magdesisyon ka nga makig-break

 Kon malawig na nga naga-date ang isa ka pamatan-on nga lalaki kag babayi, posible matalupangdan nila nga indi sila pareho sa pila ka butang. Halimbawa:

•   Ang isa nanamian sa baybay; ang isa nanamian mag-hike.

•   Ang isa extrovert; ang isa mahuluy-on.

•   Ang isa pirme nagabinutig; ang isa honest.

 Binagbinaga nga indi pareho ang kada sitwasyon. Ang una nga sitwasyon indi pareho ang inyo interes; ang ikaduha indi kamo pareho sing batasan; kag ang ikatlo indi pareho ang inyo prinsipio.

 Pamensari ini: Para sa imo, diin sa tatlo ka sitwasyon ang pinakamabudlay atubangon kon mag-asawahay na kamo? Kon may ara, diin sa sini ang masarangan ninyo i-adjust?

 Ang bana kag asawa indi pareho sing interes ukon batasan, pero puede gihapon mangin malipayon ang ila pag-asawahay. Kay man, ang pagka-compatible indi buot silingon nga pareho gid. Sa pila ka sitwasyon, ang bana kag asawa makatuon sa isa kag isa sa ila batasan kag sa mga nanamian nila. a

 Sa pihak nga bahin, importante man nga pareho kamo sang prinsipio sang imo mapangasawa ukon mapamana. Halimbawa, dapat pareho ang inyo pagpati parte sa relihion kag ang inyo pagtan-aw sa kon ano ang husto kag sala. Kay kon indi, basi senyales na ini nga kinahanglan mo tapuson ang inyo relasyon.

 Halimbawa, indi pareho ang inyo ginapatihan. Ang libro nga Fighting for Your Marriage nagsiling: “Base sa research, ang kalabanan nga mag-asawa nga indi pareho sing pagpati may daku nga tsansa nga mag-divorce.”

 Prinsipio sa Biblia: “Indi kamo magpares sa pagpangabudlay upod sa mga di-tumoluo, kay indi ini mahimo.”—2 Corinto 6:14, Maayong Balita nga Biblia.

 Ang Biblia nagasiling nga ang nagapangasawa ukon nagapamana “may ara sing kasakit kag kabudlayan.” (1 Corinto 7:28, The New English Bible) Gani indi makibot kon amo sina ang nabatyagan mo subong samtang naga-date pa lang kamo.

 Kon nakaeksperiensia kamo sang indi pag-intiendihanay, indi buot silingon nga katapusan na ini sang tanan. Ang pamangkot, Masarangan bala ninyo ini masolbar sing mainayuhon? Kinahanglan ninyo ina nga ikasarang kon mag-asawahay na kamo.

 Prinsipio sa Biblia: “Mangin mainayuhon kamo sa isa kag isa, mangin maluluy-on, nga nagapatawad sing kinabubut-on sa isa kag isa.”—Efeso 4:32.

 Sa pihak nga bahin, kon pirme kamo wala naga-intiendihanay basi senyales ini nga indi kamo compatible nga duha. Kon amo sina ang nagakatabo, mas maayo na lang nga mabal-an mo ini subong sangsa ulihi na ang tanan!

 Ang punto: Kon nagaduhaduha ka sa tawo nga imo gina-date ukon para sa imo indi ka pa handa mangasawa ukon mamana, pamensari ini sing maayo.

 Prinsipio sa Biblia: “Makita sang tawo nga maalamon ang katalagman kag nagapanago sia, apang ang kulang sing kinaalam nagadiretso lang kag nagaantos sang malain nga resulta.”—Hulubaton 22:3.

 Masakit gid kon mag-break kamo. Pero, kon ang isa sa inyo ukon kamo nga duha may sigesige kag serioso nga mga problema parte sa inyo relasyon, basi mas maayo nga tapuson na lang ninyo ini.

 Paano mo ina mahimo? Kon posible, likawi nga makig-break paagi sa text ukon email. Magpili sang insakto nga tion kag lugar para maistoryahan ninyo ining serioso nga butang.

 Prinsipio sa Biblia: “Maghambal kamo sing matuod sa isa kag isa.”—Zacarias 8:16.

 Kon nag-break kamo, buot bala silingon nga nagsala ka sa ginhimo mo nga desisyon? Indi gid. Dumduma nga ang pag-date makabulig sa imo para makahimo ka sing desisyon, kon bala pakaslan mo sia ukon indi. Bisan pa nga natapos na ang inyo relasyon, makatuon ka gihapon sang importante nga mga leksion sa sini nga eksperiensia.

 Pamangkuta ang imo kaugalingon: ‘Ano ang natun-an ko parte sa akon kaugalingon sa sini nga relasyon? Ini bala nga eksperiensia nagtudlo sa akon nga may pila pa ka butang nga dapat ko matun-an antes magpakasal? Ano ang kinahanglan ko bag-uhon kon makig-date ako liwat?’