PAMANGKOT SANG MGA PAMATAN-ON
Creation Ukon Evolution—Bahin 2: Ngaa Dapat Mo Duhaduhaan ang Evolution?
Nagalibog ang ulo ni Alex. Halin sang una, nagapati gid sia sa Dios kag sa creation. Pero, ang iya maestro sa biology nagsiling nga matuod gid ang evolution, nga nabase ini sa masaligan nga research sang siensia. Nabudlayan si Alex, kay gusto niya patihan ang ginasiling sang siensia nga “napamatud-an” nga husto. ‘Kay man,’ siling niya sa iya kaugalingon, ‘kon napamatud-an sang mga sientista nga husto ang evolution, sin-o ako para duhaduhaan sila?’
Pareho ka man bala kay Alex? Ayhan sa bilog mo nga kabuhi, nagapati ka sa ginasiling sang Biblia: “Sa ginsuguran gintuga sang Dios ang mga langit kag ang duta.” (Genesis 1:1) Pero subong, ginatinguhaan sang mga tawo nga kumbinsihon ka nga ang creation sugidsugid lang kag ang evolution amo ang husto. Mapati ka bala sa ila? Ngaa dapat mo duhaduhaan ang evolution?
Duha ka rason kon ngaa dapat mo duhaduhaan ang evolution
Ang mga sientista wala nagaugyunay parte sa mga detalye sang evolution. Bisan pa tinuig na sila nga naga-research, ang mga sientista wala gihapon nakakita sing paathag parte sa evolution nga ginaugyunan nila tanan.
Binagbinaga ini: Kon ang mga sientista wala nagaugyunay parte sa evolution—kag sila ang ginapatihan nga eksperto sa sini—sala ka bala kon duhaduhaan mo ini nga teoriya?—Salmo 10:4.
Importante kon ano ang imo ginapatihan. “Kon natabuan lang ang pagluntad sang kabuhi, buot silingon ang aton kabuhi—kag ang tanan nga butang sa uniberso—wala sing pulos,” siling ni Zachary. May punto gid sia. Kay man, kon husto ang evolution, ang kabuhi masiling nga wala sing matuod nga katuyuan. (1 Corinto 15:32) Sa pihak nga bahin, kon matuod ang creation, makita naton ang mga sabat sa mga pamangkot parte sa katuyuan sang kabuhi kag sa matabo sa palaabuton.—Jeremias 29:11.
Binagbinaga ini: Ano ang epekto sa imo kabuhi kon mahibaluan mo ang kamatuoran parte sa evolution kag creation?—Hebreo 11:1.
Mga pamangkot nga dapat binagbinagon
ANG GINASILING NILA: ‘Ang tanan nga butang sa uniberso resulta sang big bang.’
Sin-o ukon ano ang ginhalinan sang big bang?
Ano ang mas mapatihan—ang tanan nga butang wala sing ginhalinan ukon ang tanan nga butang may ginhalinan ukon may isa nga naghimo?
ANG GINASILING NILA: ‘Ang tawo naghalin sa sapat.’
Kon ang tawo naghalin sa sapat—halimbawa, halin sa amu—ngaa daku gid ang kinalain sang kaalam sang tawo sa amu? a
Ngaa bisan ang “pinakasimple” nga porma sang kabuhi tuman ka komplikado? b
ANG GINASILING NILA: ‘Napamatud-an na nga husto ang evolution.’
Gin-usisa bala mismo sang nagasiling sini ang mga ebidensia?
Daw ano kadamo ang nagapati sa evolution bangod lamang ginsilingan sila nga amo sini ang ginapatihan sang mga maalam?
a Ang iban mahimo magsiling nga ang mga tawo mas maalam bangod mas daku ang ila utok sangsa amu. Pero, para makita mo ang mga rason kon ngaa indi husto ini nga argumento, tan-awa ang brosyur nga The Origin of Life—Five Questions Worth Asking, pahina 28.
b Tan-awa ang brosyur nga The Origin of Life—Five Questions Worth Asking, pahina 8-12.
Basi Manamian Ka Man
WORKSHEET
Ngaa Nagapati Ako nga May Dios?
Mangin handa sa pagpaathag sang imo pagpati sing matinahuron, nga wala nahadlok ukon nahuya.
PAMANGKOT SANG MGA PAMATAN-ON
Creation Ukon Evolution—Bahin 1: Ngaa Dapat Magpati nga May Dios?
Gusto mo bala nga may kompiansa ka sa pagpaathag kon ngaa nagapati ka nga may Dios? Mga tip kon ano ang puede mo isabat kon pamangkuton ka parte sa imo pagpati.
PAMANGKOT SANG MGA PAMATAN-ON
Creation Ukon Evolution—Bahin 3: Ngaa Dapat Magpati sa Creation?
Kon nagapati ka sa creation, buot bala silingon wala ka nagaugyon sa siensia?
PAMANGKOT SANG MGA PAMATAN-ON
Creation Ukon Evolution?—Bahin 4: Paano Ko Ipaathag ang Akon Pagpati sa Creation?
Indi mo kinahanglan nga mangin genius sa siensia para mapaathag kon ngaa nagapati ka nga ang creation amo gid ang husto nga paathag parte sa pagluntad sang kalibutan. Gamita ang simple nga paathag sang Biblia.
