Areru 77:1-20
Te kaetieti nakon te mataniwi n te anene i aon te Ierutun.* Ana areru Ataba.+ Te anene.
77 N na takarua nakon te Atua ni bwanaau,N na takarua nakon te Atua ao e na ongo irou.+
2 I kakaaea Iehova ni bongin rawawatau.+
A teimatoa* baiu n aroraki nakoina n te bong.
I aki kona ni kabebeteaki.
3 Ngkana I uringa te Atua ao I ngirangira,+I a aki rau ao e a kerikaaki korakorau.+ (Tiera)
4 Ko taui kunin matau bwa a na ure,I a raraoma ao I a aki kona n taetae.
5 A a oki rikaaki au iango nakoni boong ake ngkoa,+Ao ririki ake a a bwakanako.
6 I uringa au anene* n te bong+Ao I iaiango raoi i nanou,+Ao I ukeuke mwaaka.
7 Te koaua bwa e na tewenakoira Iehova n aki toki?+
Ao e na aki manga kaota ana akoi?+
8 Te koaua bwa e a roko raoi n tokina ana tangira ae koaua?*
E nang akea bongan ana berita ibukia rooro ni kabane?
9 E a mwaninga te Atua ni kaota ana akoi,+Ke e a toki ana nanoanga ibukin unna? (Tiera)
10 Te koaua bwa I riai n teimatoa ni kangai, “Aei te bwai ae karawawataai:*+
Ae e a bitaki aron* Teuare Moan te Rietata nakoira”?
11 N na uringi ana mwakuri Iah,N na uringi am mwakuri aika kamimi ake ko karaoi ngkoangkoa.
12 Ao N na kananoa au iango i aon am mwakuri ni kabane,Ao n iaiangoi raoi baika ko karaoi.+
13 A tabu arom nako ngkoe ae te Atua,Te atua raa ae kakannato ae ai arom ngkoe ae te Atua?+
14 Bon te Atua ae koaua ngkoe ae ko karaoi baika kamimi,+Ko kaota korakoram nakoia botannaomata.+
15 Ko kamaiuia* am aomata ni mwaakam,*+Ake tibun Iakoba ma tibun Ioteba. (Tiera)
16 A noriko raan ngkoe ae te Atua,A noriko raan ao a aki rau,+Ao e kiriwe te ran ae makuakua.
17 A kabwaroi raan taian nang.
E karebwea te baa karawa ae uananginang,Ao a kibakiba kanoan am kainikatebe mai ikai ao mai ikekei.+
18 Karongoaan am baa+ ai aroni wiran taiani kaa ni buaka,A kaotaa te aonnaba ni kabutaa* am iti aika itirua,+E ruru te aonnaba ao e mwaeiei.+
19 A mena kawaim ribuakon taari,+Ao kawaim ae ko totoua ribuakon raan aika bati,Ma a aki kona ni kakaaeaki mwin nako mwanekam.
20 Ko kairiia am aomata n ai aron te nanai,+I aan aia tararua* Mote ma Aaron.+
Taiani Kabwarabwara Mai Nano
^ Nora Nanon Taeka.
^ Ebera, “rikirake n aki namakinaaba.”
^ Ke, “kuuna mani bwaai ni katangitang aika iai karaiia.”
^ Ke, “tangira ae kona n onimakinaki.”
^ Ebera, “baina are te atai.”
^ Ke, “ewarai.”
^ Ebera, “manga kabooia.”
^ Ebera, “anganibaim.”
^ Ke, “te aba ae maiureirei.”
^ Ebera, “Ni baini.”
