Anɔkwa Nyɔŋmɔ lɛ ji mɔ ni bɔ nibii fɛɛ. Ebɛ shishijee ni ebɛ naagbee hu. (Lala 90:2) Sane kpakpa ni yɔɔ Biblia lɛ mli lɛ jɛ eŋɔɔ. (1 Timoteo 1:11) Akɛni Nyɔŋmɔ ni hã wɔ wala hewɔ lɛ, esa akɛ wɔjá lɛ pɛ.​—Kanemɔ Kpojiemɔ 4:11.

Adesa ko enako Nyɔŋmɔ pɛŋ ejaakɛ Nyɔŋmɔ lɛ Mumɔ ni, ni tsɔɔ akɛ wala ni eyɔɔ lɛ nɔ kwɔ kwraa fe bɔɔ nii ni yɔɔ shikpɔŋ lɛ nɔ lɛ anɔ. (Yohane 1:18; 4:24) Ni kɛ̃lɛ, nibii ni Nyɔŋmɔ bɔ lɛ hãa wɔnaa esui. Akɛ nɔkwɛmɔnɔ lɛ, aduawai kɛ fɔfɔi srɔtoisrɔtoi ni efee lɛ hãa wɔnaa akɛ eyɛ suɔmɔ kɛ nilee. Jeŋ muu lɛ fɛɛ dalɛ hãa wɔnaa akɛ eyɛ hewalɛ.​—Kanemɔ Romabii 1:20.

Kɛ́ wɔkane Biblia lɛ, wɔbaanyɛ wɔle Nyɔŋmɔ sui lɛ ahe nii babaoo. Akɛ nɔkwɛmɔnɔ lɛ, Biblia lɛ hãa wɔleɔ nibii ni Nyɔŋmɔ sumɔɔ kɛ nibii ni esumɔɔɔ, bɔ ni ekɛ mɛi yeɔ ehãa, kɛ bɔ ni etsuɔ shihilɛi srɔtoi ahe nii ehãa.​—Kanemɔ Lala 103:7-10.

Yesu kɛɛ akɛ: “Wɔ-Tsɛ ni yɔɔ ŋwɛi, ogbɛ́i lɛ he atse.” (Mateo 6:9) Eyɛ mli akɛ Nyɔŋmɔ yɛ gbɛnaa gbɛ́ii pii moŋ, shi eyɛ gbɛ́i kome pɛ. Wiemɔ fɛɛ wiemɔ kɛ bɔ ni amɛtsɛɔ gbɛ́i lɛ amɛhãa. Yɛ Ga mli lɛ, atsɛɔ lɛ “Yehowa.” Shi mɛi komɛi hu tsɛɔ lɛ “Yahweh.”​—Kanemɔ Lala 83:18.

Ajie Nyɔŋmɔ gbɛ́i lɛ kɛje Bibliai babaoo amli ni akɛ gbɛnaa gbɛ́i ni ji Nuŋtsɔ loo Nyɔŋmɔ eto najiaŋ. Shi be ni aŋma Biblia lɛ, Nyɔŋmɔ gbɛ́i lɛ je kpo yɛ mli aaafee shii 7,000. Be ni Yesu tsɔɔ mɛi Nyɔŋmɔ he nii lɛ, ejie Nyɔŋmɔ gbɛ́i lɛ shi etsɔɔ amɛ.​—Kanemɔ Yohane 17:26.

Kwɛmɔ vidio ni ji Ani Nyɔŋmɔ Yɛ Gbɛ́i?

Ani anɔkwale ni eji akɛ adesai babaoo miipiŋ lɛ tsɔɔ akɛ Yehowa Nyɔŋmɔ jwɛŋŋ wɔhe? Mɛi komɛi wieɔ akɛ ehãa wɔpiŋɔ koni ekɛka wɔ ekwɛ, shi ebɛ mli nakai.​—Kanemɔ Yakobo 1:13.

Nyɔŋmɔ bɔ adesai koni amɛ diɛŋtsɛ amɛhala nɔ ni amɛsumɔɔ, ni ekɛ no wo amɛhiɛ nyam. Ani wɔhiɛ esɔɔɔ hegbɛ ni wɔná akɛ wɔ diɛŋtsɛ wɔhala akɛ wɔbaasɔmɔ Nyɔŋmɔ lɛ? (Yoshua 24:15) Shi akɛni mɛi pii halaa akɛ amɛbaafee mɛi krokomɛi nibii fɔji hewɔ lɛ, piŋmɔi efa babaoo. Jalɛ sane ni ayeee nɛɛ dɔɔ Yehowa.​—Kanemɔ 1 Mose 6:5, 6.

Yehowa Nyɔŋmɔ jwɛŋɔ wɔhe. Eesumɔ ni wɔmii ashɛ wɔhe. Etsɛŋ, ebaajie piŋmɔ kɛ mɛi ni hãa apiŋɔ lɛ fɛɛ. Ni kɛ̃lɛ, eyɛ yiŋtoo kpakpa hewɔ ni eŋmɛ piŋmɔ gbɛ be kukuoo lɛ. Wɔbaakase nakai yiŋtoo lɛ he nii yɛ Nikasemɔ 8 lɛ mli.​—Kanemɔ 2 Petro 2:9; 3:7, 13.

Yehowa fɔ̃ɔ wɔ nine ni wɔtsi wɔbɛŋkɛ lɛ kɛtsɔ wiemɔ ni wɔ kɛ lɛ aaawie yɛ sɔlemɔ mli lɛ nɔ. Eyɛ wɔteŋ mɔ fɛɛ mɔ he miishɛɛ. (Lala 65:2; 145:18) Eesumɔ ni ekɛ wɔhe eshai ake wɔ. Enaa mɔdɛŋ ni wɔbɔɔ akɛ wɔsa ehiɛ lɛ, kɛ́ bei komɛi lɛ wɔtɔ̃ɔ po. No hewɔ lɛ, yɛ emuu ni wɔyeee lɛ fɛɛ sɛɛ lɛ, wekukpaa kpakpa baanyɛ ahi wɔ kɛ Nyɔŋmɔ teŋ.​—Kanemɔ Lala 103:12-14; Yakobo 4:8.

Akɛni Yehowa ehã wɔ wala hewɔ lɛ, esa akɛ wɔsumɔ lɛ fe mɔ fɛɛ mɔ. (Marko 12:30) Kɛ́ okase Nyɔŋmɔ he nii babaoo, ni ofee nibii ni etaoɔ ni ofee lɛ, no tsɔɔ akɛ osumɔɔ lɛ, ni obaatsi obɛŋkɛ lɛ kpaakpa.​—Kanemɔ 1 Timoteo 2:4; 1 Yohane 5:3.