Klɛŋklɛŋ Wolo Ni Akɛmaje Timoteo 2:1-15
2 No hewɔ lɛ, klɛŋklɛŋ kwraa lɛ, miiwo hewalɛ akɛ ahiɛ faikpamɔi ni yɔɔ hiɛdɔɔ kɛ sɔlemɔi kɛ mlidaamɔi kɛ shidai amli ahã gbɔmɛi srɔtoi fɛɛ,
2 ahã maŋtsɛmɛi kɛ mɛi fɛɛ ni yɔɔ gbɛhei ni nɔ kwɔlɔ,*+ koni wɔya nɔ wɔkɛ Nyɔŋmɔjamɔ kɛ mɔdɛŋbɔɔ* fɛɛ hu ahi shi kpoo yɛ toiŋjɔlɛ mli.+
3 Enɛ hi, ni esa yɛ Nyɔŋmɔ ni ji wɔ-Yiwalaherelɔ lɛ hiɛ,+
4 mɔ ni sumɔɔ akɛ ahere gbɔmɛi srɔtoi fɛɛ yiwala+ ni agbɛnɛ hu, amɛná anɔkwale lɛ he nilee krɔŋŋ lɛ.
5 Ejaakɛ Nyɔŋmɔ kome yɔɔ,+ kɛ Nyɔŋmɔ kɛ gbɔmɛi ateŋdamɔlɔ+ kome hu,+ Kristo Yesu, ni ji gbɔmɔ+
6 ni kɛ ehe hã akɛ kpɔmɔnɔ ni sa kɛhã mɛi fɛɛ* lɛ+—enɛ ji nɔ ni abaaye he odase yɛ ebe ni sa mli lɛ.
7 Odaseyeli nɛɛ hewɔ+ ahala mi akɛ shiɛlɔ kɛ bɔfo lɛ+—miiwie anɔkwale, mimaleee—jeŋmaji atsɔɔlɔ+ yɛ hemɔkɛyeli kɛ anɔkwale gbɛfaŋ.
8 No hewɔ lɛ, miisumɔ akɛ hii lɛ aya nɔ asɔle yɛ he fɛɛ he ni amɛhole niji ni he tse nɔ,+ ni mlifu+ kɛ ŋwanejei akahi mli.+
9 Nakai nɔŋŋ yei lɛ hu, amɛkɛ atade ni sa* kɛ hiɛ ni gboɔ nɔ kɛ hiɛshikamɔ* awula amɛhe, jeee kɛ yigbɔi srɔtoi kɛ shika tsuru loo adiagbai* loo atade ni jara wa waa,+
10 shi moŋ kɛ nitsumɔi kpakpai ni sa yei ni tsɛɔ amɛhe akɛ Nyɔŋmɔ jálɔi lɛ.+
11 Yoo afee diŋŋ* kɛkase nii yɛ heshibaa fɛɛ mli.+
12 Mihãaa yoo hegbɛ akɛ etsɔɔ nii loo eye nuu nɔ, shi moŋ eya nɔ efee diŋŋ.*+
13 Ejaakɛ Adam klɛŋklɛŋ abɔ, no sɛɛ lɛ, Hawa.+
14 Agbɛnɛ hu, jeee Adam alaka lɛ; shi yoo lɛ, alaka lɛ kwraa,+ ni etsɔ mlatɔlɔ.
15 Shi kɛ́ yoo tee nɔ ehi shi* yɛ hemɔkɛyeli kɛ suɔmɔ kɛ hetsemɔ mli, ni ekɛ ejwɛŋmɔ tsu nii jogbaŋŋ* hu kɛfata he lɛ,+ abaatsɔ biiafɔmɔ nɔ abaa eyi shweshweeshwe.+
Shishigbɛ Niŋmaa
^ Ni tsɔɔ akɛ, wɔkɛ nibii akafee shwɛmɔ.
^ Loo “mɛi fɛɛ ni yɔɔ hegbɛi.”
^ Loo “gbɔmɛi srɔtoi fɛɛ.”
^ Loo “ni bulɛ yɔɔ he.”
^ Loo “jwɛŋmɔ kpakpa.”
^ Blɔfo mli lɛ, pearl.
^ Loo “kpoo.”
^ Loo “eya nɔ efee kpoo.”
^ Greek sht. ŋm., “kɛ́ amɛtee nɔ amɛhi shi.”
^ Loo “ekɛ hiɛshikamɔ tsu nii.”
