Petro Wolo Ni Ji Enyɔ Lɛ 2:1-22
2 Shi amale gbalɔi hu te shi yɛ Israelbii lɛ ateŋ, tamɔ bɔ ni amale tsɔɔlɔi baaba nyɛ hu nyɛteŋ lɛ.+ Mɛnɛɛmɛi kɛ jamɔ kui ni kɛ hiɛkpatamɔ baa baababote mli nigii, ni amɛbaaje nuŋtsɔ lɛ ni hé amɛ lɛ sɛɛ po,+ ni amɛkɛ hiɛkpatamɔ ni he yɔɔ oya baaba amɛ diɛŋtsɛ amɛnɔ.
2 Agbɛnɛ hu, mɛi babaoo baanyiɛ amɛjeŋbai gbohii ni efeee amɛ hiɛgbele* lɛ asɛɛ,+ ni amɛhewɔ lɛ, abaawie anɔkwale gbɛ lɛ he efɔŋ.+
3 Agbɛnɛ hu, amimyeli hewɔ lɛ, amɛbaatsɔ lakamɔ wiemɔi anɔ amɛná nyɛhe sɛɛ. Shi amɛkojomɔ lɛ, akpɛ mli ato kɛjɛ blema beebe,+ ni eshashaooo shi, ni amɛhiɛkpatamɔ lɛ wɔɔɔ.+
4 Ekã shi faŋŋ akɛ Nyɔŋmɔ eŋɔɔɔ ŋwɛibɔfoi ni fee esha lɛ ahe ekeee amɛ,+ shi moŋ eshɛrɛ amɛ eshwie Tartaro,*+ ekɛ duŋ kpii tsein* fimɔ amɛ* koni akɛ amɛ ato ahã kojomɔ.+
5 Ni ekɛ blema je lɛ he ekeee lɛ,+ shi moŋ ebaa Noa, jalɛ shiɛlɔ lɛ,+ kɛ mɛi kpawo krokomɛi ayi,+ be ni ekɛ nu afua ba mɛi ni ebuuu Nyɔŋmɔ lɛ aje lɛ nɔ lɛ.+
6 Ni ebu maji ni ji Sodom kɛ Gomora lɛ fɔ be ni ehã amɛtsɔ lamulu lɛ,+ ni ekɛfee nibii ni baaba lɛ ahe nɔkwɛmɔnɔ ehã mɛi ni ebuuu Nyɔŋmɔ lɛ.+
7 Ni ejie Lot,+ jalɔ lɛ, mɔ ni hao babaoo yɛ jeŋba gbonyo ni efeee mɔ hiɛgbele* ni nɔtɔlɔi lɛ kɛ amɛhe wo mli lɛ hewɔ lɛ—
8 ejaakɛ nakai jalɔ lɛ piŋ esusuma* ni ja lɛ daa gbi yɛ nifeemɔi ni mla eŋmɛɛɛ gbɛ ni ena ni enu be ni eyɔɔ amɛteŋ lɛ hewɔ.
9 No hewɔ lɛ, Yehowa* le bɔ ni efeɔ ejieɔ mɛi ni jáa Nyɔŋmɔ lɛ kɛjeɔ shihilɛ ni mli wa mli,+ shi mɛi ni ejaaa lɛ, ekɛ amɛ toɔ kɛhã hiɛkpatamɔ* yɛ kojomɔ gbi lɛ nɔ,+
10 titri lɛ mɛi ni taoɔ akɛ amɛbule mɛi krokomɛi aheloo lɛ,+ ni amɛbuuu nɔyeli lɛ.*+
Amɛtsui esa ni amɛyeɔ amɛtsuinaa sane, amɛsheee gbeyei akɛ amɛbaawie anunyam gbɔmɛi ahe efɔŋ,
11 shi, eyɛ mli akɛ ŋwɛibɔfoi lɛ yɛ nyɛmɔ kɛ hewalɛ fe amɛ moŋ, shi amɛwieee amɛhe efɔŋ kɛkojooo amɛ, yɛ bulɛ ni amɛyɔɔ kɛhã Yehowa* lɛ hewɔ.*+
12 Shi nɛkɛ gbɔmɛi nɛɛ wieɔ nibii ni amɛleee he nɔ ko lɛ ahe efɔŋ, amɛtamɔ kooloi ni bɛ jwɛŋmɔ ni hiɔ shi yɛ amɛfɔmɔ su naa ni abɔ amɛ* koni amɔmɔ amɛ ni akpãtã amɛhiɛ.+ Amɛ diɛŋtsɛ amɛgbɛ ni kɛ mɔ yaa hiɛkpatamɔ mli lɛ baakpãtã amɛhiɛ,
13 awuiyeli gbɛ ni amɛ diɛŋtsɛ amɛkɔ lɛ yeɔ amɛ awui.
Amɛbuɔ amɛhiɛ ni amɛshwɛɔ babaoo shwane fintiŋŋ lɛ po akɛ nii ni ŋɔɔ.+ Amɛji muji kɛ kpajei, mɛi ni náa miishɛɛ kɛtekeɔ nɔ yɛ amɛlakamɔ tsɔɔmɔi lɛ amli* be mli ni amɛkɛ nyɛ feɔ ekome kɛyeɔ nii lɛ.+
14 Amɛhiŋmɛii eyimɔ obɔbɔ kɛ gbalafitemɔ+ ni amɛnyɛɛɛ amɛkpa eshafeemɔ, ni amɛlakaa mɛi* ni nane mɔko shi lɛ. Amɛyɛ tsui ni atsɔse lɛ yɛ amimyeli mli. Amɛji bii ni alomɔ.
15 Akɛni amɛje gbɛ trɔmɔɔ lɛ nɔ hewɔ lɛ, ahã amɛdu gbɛ. Amɛnyiɛ Beor binuu Bileam gbɛ lɛ nɔ,+ mɔ ni sumɔ efɔŋfeemɔ he nyɔmɔwoo,+
16 shi ajaje lɛ yɛ mla ni lɛ diɛŋtsɛ etɔ̃ lɛ hewɔ lɛ.+ Nitsumɔ kooloo ni leee wiemɔ lɛ kɛ gbɔmɔ gbee wie kɛtsĩ sɛkɛyeli gbɛ ni gbalɔ lɛ kɔ lɛ naa.+
17 Mɛnɛɛmɛi ji nuhiŋmɛii ni nu bɛ mli, kɛ afuai ni ahum ni naa wa kpalaa amɛ, ni akɛ duŋ ni yɔɔ kpii fe fɛɛ eto ehã amɛ.+
18 Amɛwieɔ wiemɔi wuji ni sɛɛnamɔ ko bɛ he. Amɛtsɔɔ nibii ni heloo lɛ shweɔ+ kɛ jeŋbai gbohii ni efeee mɔ hiɛgbele lɛ* anɔ amɛlakaa mɛi ni je mɛi ni baa amɛjeŋ yɛ nɔfɔŋfeemɔ mli lɛ adɛŋ etsɛko lɛ.+
19 Amɛwoɔ amɛ shi akɛ amɛbaahã amɛye amɛhe, shi amɛ diɛŋtsɛ lɛ fitemɔ nyɔji ji amɛ;+ ejaakɛ kɛ́ mɔ ko ye mɔ ko nɔ lɛ, mɔ ni aye enɔ lɛ etsɔ nyɔŋ ehã mɔ ni ye enɔ lɛ.*+
20 Ekã shi faŋŋ akɛ, kɛ́ amɛtsɔ Nuŋtsɔ kɛ Yiwalaherelɔ Yesu Kristo he nilee krɔŋŋ nɔ amɛjo je lɛ bulemɔ nii lɛ anaa foi,+ ni sɛɛ mli lɛ amɛkɛ amɛhe yawo nibii nɛɛ nɔŋŋ amli ekoŋŋ ni nibii nɛɛ ye amɛnɔ lɛ, amɛnaagbee shihilɛ lɛ etsɔ efɔŋ fe tsutsu nɔ lɛ.+
21 Eji amɛnáaa amɛle jalɛ gbɛ lɛ jogbaŋŋ kulɛ ehi, fe nɔ ni amɛbaale ni sɛɛ mli lɛ amɛtsi amɛhe kɛje kitã krɔŋkrɔŋ ni amɛnine shɛ nɔ lɛ he.+
22 Nɔ ni anɔkwa abɛ lɛ kɛɔ lɛ eba mli yɛ amɛnɔ akɛ: “Gbee lɛ eku esɛɛ kɛtee lɛ diɛŋtsɛ eshwee he, ni kpolotoo ni aju ehe lɛ esaa eyakoklo ŋmɔtɔ lɛ mli.”+
Shishigbɛ Niŋmaa
^ Loo “amɛnyɛnyɛŋtswibɔi.” Greek wiemɔ ni ji a·selʹgei·a lɛ piifeemɔ. Kwɛmɔ Wiemɔi Titrii Amligbalamɔ lɛ.
^ Kwɛmɔ Wiemɔi Titrii Amligbalamɔ lɛ.
^ Loo “kɔsɔŋkɔsɔi.”
^ Shishitsɔɔmɔi komɛi kɛɔ akɛ, “ekɛ amɛ ewo duŋ kpii bui amli.”
^ Loo “nyɛnyɛŋtswibɔɔ.” Greek, a·selʹgei·a. Kwɛmɔ Wiemɔi Titrii Amligbalamɔ lɛ.
^ Kwɛmɔ Wiemɔi Titrii Amligbalamɔ lɛ.
^ Kwɛmɔ Saji Krokomɛi A5 lɛ.
^ Greek sht. ŋm., “koni efolɔ amɛ eshwie.”
^ Loo “amɛnyaŋeɔ nuŋtsɔyeli lɛ.”
^ Kwɛmɔ Saji Krokomɛi A5 lɛ.
^ Loo “yɛ Yehowa hiɛ.”
^ Loo “ni yɛ adebɔɔ naa lɛ afɔɔ amɛ.”
^ Loo “mɛi ni kɛ miishɛɛ ni eteke nɔ tsɔɔ amɛlakamɔ tsɔɔmɔi lɛ.”
^ Loo “susumai.”
^ Loo “nyɛnyɛŋtswibɔi.” Greek wiemɔ ni ji a·selʹgei·a lɛ piifeemɔ. Kwɛmɔ Wiemɔi Titrii Amligbalamɔ lɛ.
^ Loo “kɛ́ nɔ ko ye mɔ ko nɔ lɛ, mɔ lɛ etsɔ nɔ ni ye enɔ lɛ nyɔŋ.”
