Yeremia 29:1-32
29 Wolo ni gbalɔ Yeremia kɛmaje kɛjɛ Yerusalem kɛyahã onukpai ni eshwɛ ni yɔɔ mɛi ni aŋɔ amɛ nom lɛ ateŋ lɛ, osɔfoi lɛ, kɛ gbalɔi lɛ, kɛ maŋbii lɛ fɛɛ, mɛi ni Nebukadnezar ŋɔ amɛ nom kɛjɛ Yerusalem kɛtee Babilon lɛ mli wiemɔi nɛ;
2 ekɛmaje be ni Maŋtsɛ Yekonia,+ kɛ maŋnyɛ lɛ,+ kɛ maŋtsɛ shĩa onukpai lɛ, kɛ Yuda kɛ Yerusalem lumɛi lɛ, kɛ ŋaalɔi lɛ, kɛ sɔ̃lɔi* lɛ eje Yerusalem etee lɛ sɛɛ.+
3 Ekɛ wolo lɛ hã Elasa, Shafan+ binuu lɛ, kɛ Gemaria, Hilkia binuu lɛ, mɛi ni Yuda maŋtsɛ Zedekia+ tsu kɛtee Babilon maŋtsɛ Nebukadnezar ŋɔɔ yɛ Babilon lɛ ni amɛkɛyahã amɛ. Aŋma yɛ mli akɛ:
4 “Nɔ ni Yehowa, taiatsɛ lɛ, Israel Nyɔŋmɔ lɛ, kɛɔ maŋbii lɛ fɛɛ ni aŋɔ amɛ nom lɛ, mɛi ni mihã aŋɔ amɛ nom kɛjɛ Yerusalem kɛtee Babilon lɛ nɛ,
5 ‘Nyɛmamɔa tsũi ni nyɛhia mli. Nyɛfea abɔi ni nyɛyea amɛmli yibii.
6 Nyɛkpea yei ni nyɛkɛ amɛ afɔa bihii kɛ biyei; nyɛkpea yei nyɛhãa nyɛbihii lɛ ni nyɛkɛ nyɛbiyei lɛ ahãa gbãla koni amɛ hu amɛná bihii kɛ biyei. Nyɛyi afaa yɛ jɛmɛ, ni nyɛnɔ akagbɔa.
7 Ni nyɛtaoa toiŋjɔlɛ nyɛhãa maŋ ni miŋɔ nyɛ nom kɛtee mli lɛ, nyɛsɔlea nyɛhãa Yehowa nyɛhãa maŋ lɛ, ejaakɛ kɛ́ toiŋjɔlɛ yɛ maŋ lɛ mli lɛ, nyɛ hu nyɛbaaná toiŋjɔlɛ.+
8 Ejaakɛ nɔ ni Yehowa, taiatsɛ lɛ, Israel Nyɔŋmɔ lɛ kɛɛ nɛ: “Nyɛkahãa nyɛgbalɔi kɛ nyɛklamɔfoi ni yɔɔ nyɛteŋ lɛ miilaka nyɛ,+ ni nyɛkaboa lamɔi ni amɛlaa lɛ atoi.
9 Ejaakɛ ‘amɛmiigba amalei amɛmiitsɔɔ nyɛ yɛ migbɛ́i mli. Mitsuko amɛ,’+ Yehowa kɛɛ.”’”
10 “Ejaakɛ nɔ ni Yehowa kɛɛ nɛ, ‘Kɛ́ afii 70 shɛ yɛ Babilon lɛ, magbala mijwɛŋmɔ kɛba nyɛnɔ,+ ni mahã shi ni miwo akɛ mikɛ nyɛ baaku sɛɛ kɛba biɛ lɛ aba mli.’+
11 “‘Ejaakɛ mi lɛ, mile jwɛŋmɔi ni mijwɛŋɔ yɛ nyɛhe lɛ jogbaŋŋ,’ Yehowa kɛɛ, ‘toiŋjɔlɛ jwɛŋmɔi ni, shi jeee sane fɔŋ,+ koni ahi ahã nyɛ wɔsɛɛ ni nyɛná hiɛnɔkamɔ.+
12 Ni nyɛbaatsɛ mi, ni nyɛbaaba nyɛbasɔle nyɛhã mi, ni mabo nyɛ toi.’+
13 “‘Nyɛbaatao mi ni nyɛbaana mi,+ ejaakɛ nyɛkɛ nyɛtsui fɛɛ baatao misɛɛ gbɛ.+
14 Ni mahã nyɛna mi,’+ Yehowa kɛɛ. ‘Ni mabua nyɛ mɛi ni aŋɔ amɛ nom lɛ anaa, mabua nyɛnaa kɛjɛ jeŋmaji fɛɛ kɛ hei ni mishwie nyɛ kɛtee lɛ,’+ Yehowa kɛɛ. ‘Ni mikɛ nyɛ baaku sɛɛ kɛba he ni mihã aŋɔ nyɛ nom kɛjɛ kɛtee lɛ.’+
15 “Shi nyɛkɛɔ akɛ, ‘Yehowa etee gbalɔi ashi ehã wɔ yɛ Babilon.’
16 “Ejaakɛ nɔ ni Yehowa kɛɔ maŋtsɛ ni ta David maŋtsɛ sɛi lɛ nɔ,+ kɛ maŋbii fɛɛ ni yɔɔ maŋ nɛɛ mli, nyɛnyɛmimɛi ni kɛ nyɛ eyaaa nomŋɔɔ lɛ mli lɛ nɛ,
17 ‘Nɔ ni Yehowa, taiatsɛ lɛ kɛɛ nɛ: “Naa, miitsu klante, kɛ hɔmɔ, kɛ tsɛŋemɔ hela ni gbeɔ mɔ kɛmiiba amɛŋɔɔ,+ ni mahã amɛtsɔ tamɔ agbami ni ekpɔtɔ* ni ehiii aahu akɛ ehiii yeli.”’+
18 “‘Ni mikɛ klante,+ kɛ hɔmɔ, kɛ tsɛŋemɔ hela ni gbeɔ mɔ baatiu amɛ, ni mahã amɛtsɔ nɔ ko ni hãa mɔ he jɔ̃ɔ ehe kɛhã shikpɔŋ lɛ nɔ maŋtsɛyelii lɛ fɛɛ,+ kɛ loomɔ, kɛ nɔ ko ni hãa mɔ naa kpɛɔ ehe, kɛ nɔ ko ni hãa mɔ boɔ tsia,*+ kɛ ahorabɔɔ nɔ yɛ jeŋmaji fɛɛ ni mishwie amɛ kɛtee amɛŋɔɔ lɛ ateŋ,+
19 ejaakɛ amɛbooo miwiemɔi ni mikɛtsu mitsuji gbalɔi lɛ kɛtee amɛŋɔɔ lɛ atoi,’ Yehowa kɛɛ, ‘mitsuɔ amɛ daa kɛ daa.’*+
“‘Shi nyɛbooo toi,’+ Yehowa kɛɛ.
20 “No hewɔ lɛ, nyɛ mɛi fɛɛ ni aŋɔ nyɛ nom, nyɛ mɛi ni mishwie nyɛ kɛje Yerusalem kɛtee Babilon lɛ, nyɛboa Yehowa wiemɔ lɛ toi.
21 Nɔ ni Yehowa, taiatsɛ lɛ, Israel Nyɔŋmɔ lɛ, kɛɔ yɛ Ahab, Kolaia binuu lɛ, kɛ Zedekia, Maaseia binuu lɛ, mɛi ni gbaa amalei amɛtsɔɔ nyɛ yɛ migbɛ́i mli lɛ ahe nɛ,+ ‘Naa, mikɛ amɛ miiwo Babilon maŋtsɛ Nebukadnezar* dɛŋ, ni ebaatswa amɛ nɔ yɛ nyɛhiɛ.
22 Ni nɔ ni baaba amɛnɔ lɛ, Yudabii fɛɛ ni aŋɔ amɛ nom ni yɔɔ Babilon lɛ kɛbaalomɔ akɛ: “Yehowa afee bo tamɔ Zedekia kɛ Ahab, mɛi ni Babilon maŋtsɛ lɛ shã amɛ yɛ la mli lɛ!”
23 ejaakɛ amɛfee hiɛgbejianii yɛ Israel,+ amɛkɛ amɛhe gbɔmɛi aŋamɛi fiteɔ gbãla ni amɛwieɔ amale wiemɔi yɛ migbɛ́i mli, ni mifãko amɛ.+
“‘“Miji mɔ ni le, ni miji odasefonyo,”+ Yehowa kɛɛ.’”
24 “Ni Shemaia+ ni jɛ Nehelam lɛ hu, kɛɛmɔ lɛ akɛ,
25 ‘Nɔ ni Yehowa, taiatsɛ lɛ, Israel Nyɔŋmɔ lɛ kɛɛ nɛ: “Okɛ woji maje yɛ ogbɛ́i mli kɛyahã mɛi fɛɛ ni yɔɔ Yerusalem, kɛ Zefania,+ Maaseia binuu lɛ, ni ji osɔfo lɛ, kɛ osɔfoi lɛ fɛɛ akɛ,
26 ‘Yehowa ewó bo osɔfo yɛ osɔfo Yehoiada najiaŋ koni okwɛ Yehowa shĩa lɛ nɔ, ni okwɛ sɛkɛyelɔ fɛɛ sɛkɛyelɔ ni feɔ enii tamɔ gbalɔ lɛ nɔ, ni obɔ lɛ apã ni owo ekuɛ gboklɛi;+
27 no hewɔ lɛ, mɛni hewɔ okãaa Yeremia ni jɛ Anatot,+ mɔ ni feɔ ehe gbalɔ ehãa nyɛ lɛ hiɛ lɛ?+
28 Ejaakɛ etsu kɛba wɔŋɔɔ yɛ Babilon abakɛɛ akɛ: “Esɛɛ baatsɛ! Nyɛmamɔa tsũi ni nyɛhia mli. Nyɛfea abɔi ni nyɛyea amɛmli yibii,+—”’”’”
29 Be ni osɔfo Zefania+ kane wolo nɛɛ yɛ gbalɔ Yeremia toiiaŋ lɛ,
30 Yehowa kɛɛ Yeremia* akɛ:
31 “Tsu ni ayakɛɛ mɛi ni aŋɔ amɛ nom lɛ fɛɛ akɛ, ‘Nɔ ni Yehowa kɛɔ yɛ Shemaia ni jɛ Nehelam lɛ he nɛ: “Akɛni Shemaia gba etsɔɔ nyɛ, ni mitsuko lɛ ni ebɔ mɔdɛŋ koni ehã nyɛkɛ nyɛhiɛ afɔ̃ amalei anɔ hewɔ lɛ,+
32 nɔ ni Yehowa kɛɔ nɛ, ‘Naa, miigbala mijwɛŋmɔ kɛmiiba Shemaia ni jɛ Nehelam lɛ kɛ eseshibii lɛ anɔ. Eseshibii lɛ ateŋ mɔ ko mɔ ko yi náŋ wala yɛ maŋbii nɛɛ ateŋ, ni enaŋ ekpakpa ni mafee mahã mimaŋbii lɛ,’ Yehowa kɛɛ, ‘ejaakɛ ewo mɛi hewalɛ koni amɛtse Yehowa hiɛ atua.’”’”
Shishigbɛ Niŋmaa
^ Shishitsɔɔmɔi komɛi kɛɔ akɛ, “gbogbotswalɔi.”
^ Shishitsɔɔmɔi komɛi kɛɔ akɛ, “mli egba.”
^ Hebri sht. ŋm., “mɔ kpãa bɛlɛ.”
^ Hebri sht. ŋm., “miteɔ shi leebi maŋkpa ni mitsuɔ amɛ.”
^ Hebri sht. ŋm., “Nebukadrezar,” gbɛ kroko ni aŋmaa egbɛ́i lɛ.
^ Loo “Yehowa wiemɔ ba Yeremia ŋɔɔ.”
