Nɔ Ni Luka Ŋma 3:1-38
3 Kaisare Tiberio nɔyeli afi ni ji 15 lɛ mli, be ni Pontio Pilato ji Yudea amralo, ni Herode*+ ji kpokpaa nɔyelɔ* yɛ Galilea, ni enyɛmi nuu Filipo ji kpokpaa nɔyelɔ yɛ Iturea kɛ Trakoniti shikpɔji lɛ anɔ, ni Lisania ji kpokpaa nɔyelɔ yɛ Abilene,
2 yɛ Ana, ni ji osɔfo hiɛnaanɔbii lɛ ateŋ mɔ kome kɛ agbɛnɛ hu Kaiafa+ gbii lɛ amli lɛ, Nyɔŋmɔ kɛ Yohane,+ Zakaria binuu lɛ wie yɛ ŋa lɛ nɔ.+
3 No hewɔ lɛ, etee kpokpaa ni bɔle Yordan he lɛ fɛɛ nɔ, ni eyashiɛ baptisimɔ ni feɔ tsuitsakemɔ ni hãa akɛ eshai keɔ lɛ he okadi lɛ,+
4 tamɔ bɔ ni aŋma yɛ wolo ni gbalɔ Yesaia wiemɔi lɛ yɔɔ mli lɛ mli akɛ: “Aanu mɔ ko gbee miibo kɛmiijɛ ŋa lɛ nɔ miikɛɛ: ‘Nyɛsaa Yehowa* gbɛ lɛ! Nyɛgbaa egbɛjegbɛi lɛ trɔmɔɔ.+
5 Atsĩ jɔɔ fɛɛ jɔɔ, ni ahã gɔŋ fɛɛ gɔŋ kɛ gɔŋkpɔ fɛɛ gɔŋkpɔ afee tɛtrɛɛ; gbɛi kɔɔdɔji lɛ afee trɔmɔɔ, ni gbɛi ni nɔ yɔɔ dokoidokoi lɛ anɔ aja;
6 ni heloo fɛɛ* kwa baana Nyɔŋmɔ yiwalaheremɔ lɛ.’”*+
7 No hewɔ lɛ, ebɔi mɛi babaoo ni baa koni ebaptisi amɛ lɛ kɛɛmɔ akɛ: “Onufui ashwiei, namɔ bɔ nyɛ kɔkɔ akɛ nyɛjo mlifu ni baa lɛ naa foi?+
8 No hewɔ lɛ, nyɛwoa yibii ni sa tsuitsakemɔ. Nyɛkabɔia nyɛ diɛŋtsɛ nyɛhe kɛɛmɔ akɛ, ‘Wɔtsɛ ji Abraham.’ Ejaakɛ miikɛɛ nyɛ akɛ, Nyɔŋmɔ baanyɛ atee bii ashi kɛjɛ tɛi nɛɛ amli ehã Abraham.
9 Anɔkwa, lema lɛ kã tsei lɛ ashishifã lɛ nɔ momo. No hewɔ lɛ, tso fɛɛ tso ni wooo yibii kpakpai lɛ, abaafo afɔ̃ shi ni ashɛ afɔ̃ la mli.”+
10 Ni mɛi lɛ bi lɛ akɛ: “No hewɔ lɛ, mɛni esa akɛ wɔfee mɔ?”
11 Ni ehere nɔ ekɛɛ amɛ akɛ: “Mɔ ni yɔɔ atadei enyɔ* lɛ, ekɛ mɔ ni bɛ eko lɛ aja, ni mɔ ni yɔɔ niyenii lɛ hu afee nakai nɔŋŋ.”+
12 Toohelɔi po ba koni abaptisi amɛ,+ ni amɛbi lɛ akɛ: “Tsɔɔlɔ, mɛni esa akɛ wɔfee?”
13 Ekɛɛ amɛ akɛ: “Nyɛkahea too ni fa fe nɔ ni afo afɔ̃ shi lɛ.”+
14 Agbɛnɛ hu, asraafoi biɔ lɛ akɛ: “Mɛni esa akɛ wɔfee?” Ni ekɛɔ amɛ akɛ: “Nyɛkafea mɔ ko hãihãi,* ni nyɛkafoa amale sane nyɛfɔ̃a mɔ ko nɔ,+ shi nyɛhãa nibii ni ahãa nyɛ* lɛ asaa nyɛhiɛ.”
15 Agbɛnɛ, mɛi lɛ miikwɛ gbɛ ni amɛ fɛɛ amɛmiisusu yɛ amɛtsuiiaŋ yɛ Yohane he akɛ, “Ani aleenɔ, lɛ ji Kristo lɛ?”+
16 Yohane hã hetoo ekɛɛ amɛ fɛɛ akɛ: “Mi lɛ, nu mikɛbaptisiɔ nyɛ, shi mɔ ko ni he wa fe mi miiba, misaaa mɔ ni fɛneɔ etokotai anaa kpãi.+ Ekɛ mumɔ krɔŋkrɔŋ baabaptisi nyɛ, ni ekɛ la hu baabaptisi nyɛ.+
17 Ehiɛ esofi* ni akɛshaa nii amli lɛ yɛ edɛŋ koni ekɛbɛɛ eŋmaagbeemɔhe lɛ fitsofitso, ni ekɛbua wiiti lɛ naa ewo enitoohe lɛ, shi wiiti lɛ he totoi lɛ ekɛ la ni anyɛŋ agbe baashã.”
18 Esaa ekɛ wiemɔkɛtsɔɔmɔi krokomɛi babaoo hã ni etee nɔ ejaje sane kpakpa lɛ etsɔɔ mɛi lɛ.
19 Shi akɛni Yohane jaje* Herode, kpokpaa nɔyelɔ lɛ, yɛ Herodia ni ji enyɛmi nuu ŋa lɛ, kɛ nibii fɔji fɛɛ ni Herode efee lɛ ahe hewɔ lɛ,
20 enɛɛmɛi fɛɛ sɛɛ lɛ, efee enɛ efata he: Ewo Yohane tsuŋ.+
21 Agbɛnɛ, be ni abaptisi mɛi lɛ fɛɛ lɛ, abaptisi Yesu hu.+ Be ni esɔleɔ lɛ, ŋwɛi naa gbele,+
22 ni mumɔ krɔŋkrɔŋ lɛ kpeleke shi kɛ su ni tamɔ okpo kɛba enɔ, ni gbee ko jɛ ŋwɛi kɛɛ: “Bo ji mi-Bi ni misumɔɔ lɛ lɛ; miná ohe miishɛɛ.”+
23 Be ni Yesu+ je enitsumɔ lɛ shishi lɛ, eye aaafee afii 30,+ ni tamɔ bɔ ni asusuɔ lɛ, ejiYosef bi,+Heli bi,
24 Matat bi,Levi bi,Melki bi,Yanai bi,Yosef bi,
25 Matatia bi,Amos bi,Nahum bi,Esli bi,Nagai bi,
26 Maat bi,Matatia bi,Semein bi,Yosek bi,Yoda bi,
27 Yohanan bi,Resa bi,Zerubabel+ bi,Shealtiel+ bi,Neri bi,
28 Melki bi,Adi bi,Kosam bi,Elmadam bi,Er bi,
29 Yesu bi,Eliezer bi,Yorim bi,Matat bi,Levi bi,
30 Simeon bi,Yuda bi,Yosef bi,Yonam bi,Eliakim bi,
31 Melea bi,Mena bi,Matata bi,Natan+ bi,David+ bi,
32 Yishai+ bi,Obed+ bi,Boaz+ bi,Salmon+ bi,Nahashon+ bi,
33 Aminadab bi,Arni bi,Hezron bi,Perez+ bi,Yuda+ bi,
34 Yakob+ bi,Isak+ bi,Abraham+ bi,Tera+ bi,Nahor+ bi,
35 Serug+ bi,Reu+ bi,Peleg+ bi,Eber+ bi,Shela+ bi,
36 Kainan bi,Arpakshad+ bi,Shem+ bi,Noa+ bi,Lamek+ bi,
37 Metusela+ bi,Henok bi,Yared+ bi,Mahalalel+ bi,Kainan+ bi,
38 Enos+ bi,Set+ bi,Adam+ bi,Nyɔŋmɔ bi.
Shishigbɛ Niŋmaa
^ Greek mli lɛ, “tetrarke.”
^ Ni ji, Herode Antipa. Kwɛmɔ Wiemɔi Titrii Amligbalamɔ lɛ.
^ Kwɛmɔ Saji Krokomɛi A5 lɛ.
^ Loo “gbɔmɛi fɛɛ.”
^ Loo “baana gbɛ ni Nyɔŋmɔ baatsɔ nɔ ehere yiwala lɛ.”
^ Loo “atade kroko kɛfata nɔ ni ewo lɛ he.”
^ Loo “Nyɛkashɔ̃a mɔ ko nɔ ko.”
^ Loo “nyɛnyɔmɔwoo.”
^ Tso sofi.
^ Ni tsɔɔ akɛ, Yohane hã Herode na etɔmɔ.
