Daniel 7:1-28
7 Babilon maŋtsɛ Belshazar+ nɔyeli afi ni ji klɛŋklɛŋ nɔ lɛ mli lɛ, Daniel na eyitsoŋ lamɔ kɛ ninai be ni ekã esaa lɛ nɔ lɛ.+ Kɛkɛ ni eŋma lamɔ lɛ efɔ̃ shi;+ eŋma emli saji lɛ fɛɛ.
2 Daniel kɛɛ akɛ:
“No mli lɛ, miikwɛ yɛ mininai ni mina nyɔɔŋ lɛ mli, ni naa! ŋwɛi kɔɔyɔi ejwɛ lɛ miihã ŋshɔ kpele lɛ miifee hamahama.+
3 Ni kooloi wuji ejwɛ+ fã kpo kɛjɛ ŋshɔ lɛ mli, esoro eko fɛɛ eko yɛ ekroko he.
4 “Klɛŋklɛŋ nɔ lɛ tamɔ jata,+ ni ehiɛ okropɔŋ fiji.+ Mihiɛ kwɛmɔ aahu kɛyashi akpɔlɔ efiji lɛ, ni awó enɔ kɛje shikpɔŋ lɛ nɔ, ni ahã edamɔ enaji enyɔ nɔ tamɔ gbɔmɔ, ni ahã lɛ gbɔmɔ tsui.
5 “Ni naa! mina kooloo kroko, ni ji enyɔ nɔ, etamɔ oshishibrishi.+ Ewó ehe nɔ yɛ efã kome, ni ŋmawutsei etɛ yɛ enyanyɔji ateŋ yɛ edaaŋ; ni akɛɛ lɛ akɛ, ‘Tee shi, ni oye loo babaoo.’+
6 “Enɛ sɛɛ lɛ, mihiɛ kwɛmɔ aahu, ni naa! mina kooloo kroko, etamɔ kootsɛ,+ shi ehiɛ fiji ejwɛ tamɔ loofɔji afiji yɛ esɛɛ. Ni kooloo lɛ yɛ yitsei ejwɛ,+ ni ahã lɛ hegbɛ koni eye nɔ.
7 “Enɛ sɛɛ lɛ, mihiɛ kwɛmɔ aahu yɛ nyɔɔŋ ninai lɛ amli, ni mina kooloo ni ji ejwɛ nɔ, ehe yɛ gbeyei waa, ni ehãa mɔ tsui fãa, ni ehe wa waa diɛŋtsɛ, ni eyɛ dade nyanyɔji gajagajaa. Eeye ni eejwara nɔ fɛɛ nɔ, ni nɔ ni shwɛɔ lɛ, ekɛ enaji naanaa nɔ.+ Esoro lɛ yɛ kooloi krokomɛi ni tsɔ ehiɛ kɛba lɛ ahe kwraa, ni eyɛ akolontoi nyɔŋma.
8 Be ni mikwɛɔ akolontoi lɛ, naa! akolonto kroko fã kpo yɛ amɛteŋ, eyɛ bibioo,+ ni afamɔ klɛŋklɛŋ akolontoi lɛ ateŋ etɛ yɛ ehiɛ. Ni naa! hiŋmɛii ni tamɔ gbɔmɔ hiŋmɛii yɛ akolonto nɛɛ he, ni eyɛ naabu ni wieɔ wiemɔi wuji.*+
9 “Mihiɛ kwɛmɔ aahu kɛyashi akɛ maŋtsɛ sɛii bamamɔ shi, ni Mɔ Ni Eye Gbii Pii+ lɛ bata shi.+ Etade yɛɔ tamɔ snoo,+ ni eyiteŋ tsɔi tamɔ kooloo hetsɔi yɛŋ. Emaŋtsɛ sɛi lɛ, lalilɛii ni; ehe taii* lɛ, la ni miitso grigri ni.+
10 La ni tamɔ faa miiho kɛmiijɛ ehiɛ.+ Mɛi akpe toi akpei yaa nɔ amɛsɔmɔɔ lɛ, ni mɛi akpei nyɔŋma toi akpei nyɔŋma damɔ ehiɛ.+ Kɔɔtu+ lɛ ta shi,* ni agbele woji anaa.
11 “Mihiɛ kwɛmɔ aahu yɛ nakai be lɛ mli yɛ wiemɔi wuji* ni akolonto lɛ wieɔ lɛ agbɛɛmɔ lɛ hewɔ;+ mihiɛ kwɛmɔ aahu kɛyashi agbe kooloo lɛ ni afite egbonyo lɛ, ni akɛhã koni ashã yɛ la mli.
12 Shi kooloi krokomɛi ni eshwɛ lɛ,+ ahe amɛnɔyelii lɛ yɛ amɛdɛŋ, ni akɛ be kɛ ŋmɛlɛtswaa fata amɛwala gbii lɛ ahe.
13 “Mihiɛ kwɛmɔ aahu yɛ nyɔɔŋ ninai lɛ amli, ni naa! mɔ ko ni tamɔ gbɔmɔ bi*+ kɛ ŋwɛi atatui miiba; ni ahã lɛ gbɛ ni eya Mɔ Ni Eye Gbii Pii+ lɛ ŋɔɔ, ni amɛkɛ lɛ ba nakai mɔ lɛ hiɛ.
14 Ni akɛ nɔyeli,+ kɛ woo,+ kɛ maŋtsɛyeli ko hã lɛ, koni majimaji lɛ, kɛ jeŋmaji lɛ, kɛ wiemɔ kui lɛ fɛɛ asɔmɔ lɛ.+ Enɔyeli lɛ, naanɔ nɔyeli ni hoŋ eyaŋ ni, ni akpãtãŋ emaŋtsɛyeli lɛ hiɛ.+
15 “Shi mi, Daniel lɛ, mimumɔ hao waa yɛ mimli, ejaakɛ miyitsoŋ ninai lɛ hã mitsui fã.+
16 Mitsi mibɛŋkɛ mɛi ni damɔ jɛmɛ lɛ ateŋ mɔ kome koni mabi lɛ nɔ ni nibii nɛɛ tsɔɔ diɛŋtsɛ. No hewɔ lɛ, ekɛ mi wie, ni etsɔɔ mi nibii nɛɛ ashishi.
17 “‘Kooloi wuji nɛɛ, amɛyi ejwɛ lɛ fɛɛ lɛ,+ amɛji maŋtsɛmɛi ejwɛ ni baate shi yɛ shikpɔŋ lɛ nɔ.+
18 Shi Ofe+ lɛ mɛi krɔŋkrɔŋi lɛ anine baashɛ maŋtsɛyeli lɛ nɔ,+ ni maŋtsɛyeli lɛ baatsɔ amɛnɔ+ kɛya naanɔ, hɛɛ, kɛya naanɔi anaanɔ.’
19 “Kɛkɛ ni mitao akɛ male kooloo ni ji ejwɛ ni esoro lɛ yɛ ekrokomɛi lɛ fɛɛ ahe lɛ he saji; ehe yɛ gbeyei waa ni eyɛ dade nyanyɔji ni ewao naa lɛ, akɔɔble ni, ni eyeɔ ni ejwaraa nɔ fɛɛ nɔ, ni nɔ ni shwɛɔ lɛ, ekɛ enaji naanaa nɔ;+
20 kɛ eyiteŋ akolontoi nyɔŋma lɛ,+ kɛ akolonto kroko lɛ ni fã kpo ni etɛ kpɔlɔ yɛ ehiɛ lɛ,+ akolonto ni yɔɔ hiŋmɛii kɛ naabu ni wieɔ wiemɔi wuji* lɛ, ni eda kwraa fe ekrokomɛi lɛ.
21 “Mihiɛ kwɛmɔ aahu kɛyashi nakai akolonto lɛ kɛ mɛi krɔŋkrɔŋi lɛ yawu, ni ebɔi amɛnɔ kunimyeli,+
22 kɛyashi Mɔ Ni Eye Gbii Pii+ lɛ ba, ni akojo akɛ Ofe+ lɛ mɛi krɔŋkrɔŋi lɛ sa,* ni be ni ato koni maŋtsɛyeli lɛ atsɔ mɛi krɔŋkrɔŋi lɛ anɔ lɛ shɛ.+
23 “Nɔ ni ekɛɛ nɛ: ‘Kooloo ni ji ejwɛ lɛ ji maŋtsɛyeli ni ji ejwɛ ni baate shi yɛ shikpɔŋ lɛ nɔ. Ebaasoro lɛ yɛ maŋtsɛyelii krokomɛi lɛ fɛɛ ahe, ni ebaami shikpɔŋ lɛ fɛɛ, ni ebaanaanaa nɔ, ni ebaajwara lɛ.+
24 Ni akolontoi nyɔŋma lɛ ji maŋtsɛmɛi nyɔŋma ni baate shi kɛjɛ nakai maŋtsɛyeli lɛ mli lɛ; ni maŋtsɛ kroko hu baate shi yɛ amɛsɛɛ, ni ebaasoro lɛ yɛ klɛŋklɛŋ maŋtsɛmɛi lɛ ahe, ni ebaaba maŋtsɛmɛi etɛ ashi.+
25 Ebaawie wiemɔi eshi Mɔ Ni Nɔ Kwɔ Fe Fɛɛ lɛ,+ ni ebaaya nɔ ehao Ofe lɛ mɛi krɔŋkrɔŋi lɛ. Ebaato eyiŋ akɛ ebaatsake bei kɛ mla, ni akɛ amɛ baawo edɛŋ kɛyashi be, kɛ bei, kɛ be fã.*+
26 Shi Kɔɔtu lɛ ta shi,* ni amɛhe enɔyeli lɛ yɛ edɛŋ, koni afite lɛ ni akpãtã ehiɛ kwraa.+
27 “‘Ni akɛ maŋtsɛyeli lɛ, kɛ nɔyeli lɛ, kɛ maŋtsɛyelii ni yɔɔ ŋwɛi shishi fɛɛ lɛ agbojee lɛ hã Ofe lɛ mɛi krɔŋkrɔŋi lɛ amaŋ lɛ.+ Amɛmaŋtsɛyeli lɛ, naanɔ maŋtsɛyeli ni,+ ni nɔyelii fɛɛ baasɔmɔ amɛ ni amɛbaabo amɛ toi.’
28 “Sane lɛ naagbee nɛ. Shi mi, Daniel lɛ, misusumɔi lɛ hã mitsui fã waa aahu akɛ mihiɛ shale;* shi mikɛ sane lɛ to mi diɛŋtsɛ mitsui mli.”
Shishigbɛ Niŋmaa
^ Loo “wieɔ naafuu wiemɔi.”
^ Loo “koklolontoi.”
^ Loo “Aho atara shi koni akojo.”
^ Loo “yɛ naafuu wiemɔi.”
^ Aramaik sht. ŋm., “binuu.”
^ Loo “wieɔ naafuu wiemɔi.”
^ Aramaik sht. ŋm., “ni akɛ kojomɔ lɛ hã Ofe lɛ mɛi krɔŋkrɔŋi.”
^ Ni ji, bei etɛ kɛ fã.
^ Loo “aho atara shi koni akojo.”
^ Loo “misu tsake.”
