1-3. a) Ɛsitɛri gwɛrɛtɔ masasigilan na, o koo ye mun lo kɛ a la? b) Masacɛ ye mun lo kɛ tuma min na Ɛsitɛri nana bɔ a ye?

ƐSITƐRI be gwɛrɛla dɔɔni dɔɔni masasigilan na. A dusukun be panpanna. Miiri k’a filɛ: mankan si tɛ mɛnna Pɛrɛsiw ka masaso bonba nin kɔnɔ Suzi dugu la. Yɔrɔ sumanin lo fɔɔ Ɛsitɛri yɛrɛ be se k’a seenw n’a ka fani saramanw mankan mɛn. Kuun t’a la a ka wagati tiɲɛ ka to ka masaso nin yɔrɔ ɲumanw filɛ: a samasen kabakomanw n’a palafɔn cɛɲumanin minw dilanna ni Liban sedere yiriw ye. Cɛɛ min siginin be masasigilan kan, Ɛsitɛri be ale lo filɛra sabu a niin be o cɛɛ bolo.

² Ɛsitɛri natɔ, masacɛ y’a filɛ ka ɲɛ ani a y’a ka bere sanulaman sin a ma. O wale gwansan fɛ, masacɛ y’a yira ko Ɛsitɛri niin kisira. O kɔrɔ ko a yafara Ɛsitɛri ma sabu a donna ale fɛ k’a sɔrɔ a m’a weele. Ɛsitɛri surunyana masasigilan na tuma min na, a y’a bolo sin ka maga masacɛ ka bere la. O cogo la, a y’a yira ko a be masacɛ waleɲuman lɔn.—Ɛsit. 5:1, 2.

³ Masacɛ Asuerus ka fɛɛnw bɛɛ b’a yira ko a ye nafolotigi ni faamanba ye. Pɛrɛsiw ka masacɛw tun be fani minw don o wagati la, u sɔngɔ tun ka gwɛlɛ kosɔbɛ. O sɔngɔ tun be se miliyɔn caaman le ma. Ɛsitɛri y’a ye a cɛɛ ɲɛda fɛ ko a dusu ka di, a b’a lɔn ko a b’ale kanu. Masacɛ y’a fɔ ko: “Masamuso Ɛsitɛri, mun le kɛra? I be mun le fɛ? Hali n’a kɛra ne ka mara tilan kelen ye, ne b’a d’i ma.”—Ɛsit. 5:3.

4. Gwɛlɛya jumanw tun be Ɛsitɛri seen kɔrɔ?

⁴ Ɛsitɛri y’a yira ka ban ko a jaa ka gwɛlɛ ani a limaniyanin lo kosɔbɛ. A donna masacɛ fɛ janko k’a ka siyamɔgɔw tanga nanbarako dɔ ma min latigɛra walisa k’u bɛɛ halaki. Tiɲɛn lo ko a sera ka don masacɛ fɛ hɛɛrɛ la nka koo wɛrɛ b’a seen kɔrɔ min yɛrɛ ka gwɛlɛ ka tɛmɛ tugun. A ka kan ka nin masacɛ yadanin dɛmɛ a k’a faamu ko a ladibaga sɔbɛ ye mɔgɔ jugu ye. O cɛɛ ye masacɛ lafili k’a to a ye saya jalaki ben Ɛsitɛri ka siyamɔgɔw kan. Cogo juman na Ɛsitɛri bena se ka masacɛ dusukun sɔrɔ do? An be kalan juman sɔrɔ a ka limaniya koo la?

5, 6. a) Ɛsitɛri ye Waajulikɛla 3:1, 7 ka miiriya sira tagama cogo di? b) Ɛsitɛri kumana a cɛɛ fɛ cogo min na, o b’a yira cogo di ko a ye muso hakilitigi ye?

⁵ Yala a ka ɲi Ɛsitɛri ka Aman ka koo bɛɛ lakali masacɛ ye bɛɛ ɲɛɛ na wa? N’a y’o kɛ, o be se ka kɛ sababu ye ka masacɛ dɔgɔya, ani a jugu Aman be se ka sira sɔrɔ ka Ɛsitɛri sɔsɔ. O kama, Ɛsitɛri ye mun lo kɛ do? Saan kɛmɛkulu caaman ka kɔn o wagati ɲɛ, Ala ka hakili senu tun ye masacɛ hakilitigi Solomani lasun a k’a sɛbɛ ko: “Koo bɛɛ n’a tuma lo. . . . Jewaati be yen, kumawaati fana be yen.” (Waaj. 3:1, 7). Miiri k’a filɛ, cɛɛ kantigiman Maridose b’o miiriya ɲɔgɔn donna a lamɔden Ɛsitɛri kuun na a denmisɛn tuma na. Siga t’a la, Ɛsitɛri y’a faamu ko a kɔrɔtanin lo ka “kumawaati” sugandi ka ɲɛ.

⁶ Ɛsitɛri y’a fɔ ko: “Ne ye dumuni labɛn masacɛ ye. N’i sɔnna, i ka na ni Aman ye o dumuyɔrɔ la bii.” (Ɛsit. 5:4). Masacɛ sɔnna, ani a ko u ka Aman weele ka na. I y’a kɔrɔsi cogo min na Ɛsitɛri kumana ni hakilitigiya ye wa? A ye danbe la a cɛɛ kan. A fana ye  yɔrɔ bɛnnin ni wagati ɲuman ɲini walisa k’a haminankow fɔ a ye.—Talenw 10:19 kalan.

7, 8. Ɛsitɛri ye fɛti fɔlɔ min labɛn, a koo kɛra cogo di? Nka, mun na a ma kuma masacɛ fɛ o loon na?

⁷ Siga t’a la, Ɛsitɛri y’o fɛti koo labɛn koɲuman. Dumunifɛn minw ka di a cɛɛ ye, a y’a janto u k’u bɛɛ labɛn ka ɲɛ. Diwɛn diiman fana tun be yen walisa ka mɔgɔ ninsɔndiya (Zab. 104:15). Asuerus ye o dumunifɛnw diya bɔ. O kɔ, a ye Ɛsitɛri ɲininga tugun ko a be mun lo fɛ. Yala kumawagati sera Ɛsitɛri fɛ sisan wa?

⁸ Ɛsitɛri y’a jati ko kumawagati ma se fɔlɔ. Nka a y’a fɔ masacɛ ni Aman ye ko u ka kɔsegi ka na dumuni kɛ tugun o dugusagwɛ (Ɛsit. 5:7, 8). Mun na a ye loon wɛrɛ di masacɛ ma do? Kana ɲinɛ ko Aman ye sira sɔrɔ masacɛ fɛ ka sariya dɔ sigi walisa ka Ɛsitɛri siyamɔgɔw bɛɛ halaki. Komi o tun tɛ tulonko ye, Ɛsitɛri y’a jati ko a ka fisa ale ka wagati bɛnnin ɲini ka sɔrɔ ka kuma. O lo kama a ye kɔnɔni kɛ. A ye sababu wɛrɛ ɲini walisa k’a yira ko a b’a cɛɛ bonya kosɔbɛ.

9. Nafa juman b’a la ka muɲuli kɛ? An be se ka Ɛsitɛri ladegi cogo di o koo la?

 ⁹ Ka muɲuli kɛ, bɛɛ tɛ se o la. A nafa do ka bon kosɔbɛ. Hali ni Ɛsitɛri dusu kasinin tun lo ani a kɔrɔtɔnin lo ka kuma, a ye muɲuli kɛ ka wagati bɛnnin ɲini. An be kalan nafaman sɔrɔ a fɛ o koo la. Siga t’a la, an bɛɛ ɲɛɛ lara koo dɔw kan minw ka kan ka lalaga. N’an b’a fɛ ka ɲɛmɔgɔ dɔ lasun a ka koo dɔ ɲɛnabɔ, an ka kan ka Ɛsitɛri ka muɲuli ɲɔgɔn ladegi. Talenw 25:15 b’a fɔ ko: “Muɲuli barika la, mɔgɔ be se kititigɛla kɔrɔ. Kuma diman be se ka mɔgɔ barikaman magaya.” N’an muɲuna ka wagati bɛnnin kɔnɔ ani n’an kumana ni dususuman ye i ko Ɛsitɛri y’a kɛ cogo min na, an be se k’an kɛlɛbaga dusu sɔrɔ. Yala Ɛsitɛri ka Ala Jehova y’a duga a ka muɲuli n’a ka hakilitigiya kosɔn wa?

10, 11. Aman bɔtɔ masaso kɔnɔ, mun na a dusu tiɲɛna? A muso n’a teriw y’a lasun ko a ka mun lo kɛ?

¹⁰ Ɛsitɛri ka muɲuli kɛra sababu ye koo kabakoman dɔw kɛra  ka tugutugu ɲɔgɔn kɔ. O loon fɔlɔ la, “Aman nisɔndiyaninba le bɔra” fɛti la sabu a y’a miiri ko ale koo ka di masacɛ n’a muso ye ka tɛmɛ bɛɛ kan. Nka a bɔtɔ masaso kɔnɔ, a ɲɛɛ lara Maridose kan, o Yahutucɛ min bele t’a fɛ ka biri ale ɲɛɛ kɔrɔ. Komi an y’a ye kalansen tɛmɛnin na, a ma kɛ ko Maridose t’a fɛ ka Aman bonya dɛ. Nka, a t’a fɛ a dusukun k’a kɛlɛ o koo la ani ka kɛ sababu ye k’a ka jɛnɲɔgɔnya tiɲɛ ni Jehova Ala ye. O bɛɛ n’a ta, “Aman dimina Maridose kɔrɔ kosɔbɛ.”—Ɛsit. 5:9.

¹¹ Aman tagara Maridose ka koo lakali a muso n’a teriw ye. U y’a lasun ko a ka lɔgɔjan dɔ turu min janya be se mɛtɛrɛ mugan ni duuru ɲɔgɔn ma ani a ka sira ɲini masacɛ fɛ ka Maridose dulon o lɔgɔ kan. O ladili diyara Aman ye, a sinna ka mɔgɔ ci k’o lɔgɔjan turu.—Ɛsit. 5:12-14.

12. Mun na masacɛ ko u ka masaya ka tarikikow kitabu kalan ale ye? O kalan ye mun lo yira a la?

¹² Nka, o loon suu ni suu tɔɔw ma kɛ kelen ye masacɛ fɛ. Bibulu b’a fɔ ko “masacɛ ma se ka sinɔgɔ.” O kama, a ko u ka masaya ka tarikikow kitabu kalan ale ye. Nanbarako min tun labɛnna Asuerus fagari kama, u tagara bɔ o kan kalan kɛtɔ. Masacɛ hakili jigira o koo la. U tun ye nanbarakɛlaw minɛ k’u faga. Nka Maridose min tun ye masacɛ lasɔmi o koo la, ale do? Masacɛ barila ka ɲiningali kɛ ko u ye mun lo kɛ Maridose ye? U y’a jaabi ko foyi ma kɛ a ye.—Ɛsitɛri 6:1-3 kalan.

13, 14. a) Cogo di koow y’a daminɛ ka tiɲɛ Aman bolo? b) Aman muso n’a teriw ye mun lo fɔ a ye?

¹³ Masacɛ hakili ɲagamina kosɔbɛ. A ye ɲiningali kɛ ko kuntigi juman labilanin lo k’ale dɛmɛ k’o tilenbaliyako lalaga? O y’a sɔrɔ Aman lo tun be yen masaso lukɛnɛ na. A sera yen sɔgɔmada joona fɛ walisa ka sira deli masacɛ fɛ ka Maridose dulon lɔgɔ kan. Nka, sanni a yɛrɛ ka se ka kuma, masacɛ y’a ɲininga ko ni masacɛ b’a fɛ ka mɔgɔ dɔ bonya, mun lo ka kan ka kɛ o tigi ye? Aman y’a miiri ko masacɛ kaan be ale lo ma. O lo kama, a y’a yira o ka kan ka kɛ cogo kabakoman min na. A ko u ka masafani don o tigi kaan na ani k’a tigi sigi masacɛ ka soo kan. O kɔ, kuntigiba dɔ ka yaalayaala n’a ye Suzi dugu kɔnɔ ani k’a tando bɛɛ ɲɛɛ na. Masacɛ ko bonya ka kan ka la cɛɛ min kan, o ye Maridose lo ye. Miiri k’a filɛ Aman ɲɛda yɛlɛmana cogo min na! Ani masacɛ ye jɔn lo sugandi ka Maridose tando ten? Ale Aman yɛrɛ lo!—Ɛsit. 6:4-10.

¹⁴ Aman fɛ, nin tun ye baara kolon yɛrɛ lo ye. Nka a bolomakotɛ, a y’o kɛ ani a ɲɛɛ sisinin teliyara ka taga soo. A muso  n’a teriw y’a fɔ a ye ko, koow be tagara bolo min kan, o tɛ hɛɛrɛko ye a fɛ. U ko a tɛna se Yahutucɛ Maridose kɔrɔ cogo si la.—Ɛsit. 6:12, 13.

15. a) Nafa juman sɔrɔla Ɛsitɛri ka muɲuli la? b) Ka “Ala makɔnɔ,” mun na o ye hakilitigiyako ye?

¹⁵ Komi Ɛsitɛri ye kɔnɔni kɛ ka sɔrɔ k’a kɔnɔko fɔ masacɛ ye, o y’a to Aman y’a yɛrɛ dɔgɔyako labɛn. Ani jɔn b’a lɔn ni Jehova Ala lo m’a to masacɛ ma se ka sinɔgɔ o suu la? (Talenw 21:1). A tɛ bari an na ni Ala ka Kuma b’an jija ko an ka “Ala makɔnɔ.” (Mise 7:7 kalan, ABM). N’an be Ala makɔnɔ, n’a sɔrɔ a bena an ka kunkow ɲɛnabɔ cogo dɔ la an yɛrɛ tun tɛ miiri min na.

16, 17. a) Tuma juman lo Ɛsitɛri y’a jati ko “kumawaati” sera ale fɛ? b) Danfaran juman lo be yen Ɛsitɛri ni masacɛ ka muso fɔlɔ Vasiti cɛ?

¹⁶ Ɛsitɛri tɛ se ka masacɛ ka muɲuli kɔrɔbɔ tugun. Loon filanan na, a ka kan ka koow bɛɛ lakali a ye. Nka, a bena o kɛ cogo di do? Masacɛ yɛrɛ lo ye koow nɔgɔya a ye. A y’a ɲininga tugun ko a be mun lo fɛ (Ɛsit. 7:2). Sisan kɔni, “kumawaati” sera Ɛsitɛri fɛ.

¹⁷ Miiri k’a filɛ, Ɛsitɛri ye Ala deli a yɛrɛ kɔnɔ ani k’a fɔ ko: “E masakɛ, ni ne ko ka di i ye, ni a kɛra ko ɲuman ye masakɛ ɲɛ na, masakɛ ka ne ɲɛnama to, ne ka fɛn delilen filɛ o ye. I ka sɔn ne ka mɔgɔw la, ne hami ko filɛ o ye.” (Ɛsit. 7:3, ABM ). I k’a kɔrɔsi, Ɛsitɛri ko min kɛra koo ɲuman ye masacɛ ɲɛɛ na, ale be sɔn o ma. Ɛsitɛri ni masacɛ ka muso fɔlɔ Vasiti kɔni tɛ kelen ye  fewu. Vasiti tun sɔnna k’a cɛɛ lamaloya! (Ɛsit. 1:10-12). Ka fara o kan, Ɛsitɛri ma masacɛ kɔrɔfɔ ko a ye hakilintanya kɛ k’a jigi la Aman kan. Nka, a ye masacɛ deli ko a k’ale niin tanga saya ma.

18. Cogo juman na Ɛsitɛri y’a ka kunko ɲɛfɔ masacɛ ye?

¹⁸ Siga t’a la, Ɛsitɛri ka kuma barila masacɛ la k’a kabakoya. Jɔn lo be sɔn ka masacɛ ka muso niin bila farati la? Ɛsitɛri y’a fara a kan ko: “Bari ne ni n ka siya feerela, janko u k’an halaki, k’an faga ka ban pewu. N’u yɛrɛ tun y’an feere ka kɛ jɔɔnw ye dama, ne tun tena foyi fɔ, bari o tun tena masacɛ sigɛnkun bɔ.” (Ɛsit. 7:4). I k’a kɔrɔsi ko Ɛsitɛri y’a kɔnɔ gwɛ k’a ka koo lakali. A fana ko n’u tun ye olu feere k’u kɛ jɔɔnw ye dɔrɔn, ale tun tɛna foyi fɔ. Nka, komi ale ka siyamɔgɔw bɛɛ fagari bena kɛ bɔnɛba ye masacɛ fana fɛ, ale tɛ se ka je.

19. N’an b’a fɛ ka mɔgɔ dɔ dusukun sɔrɔ, an ka kan ka Ɛsitɛri ladegi cogo di?

¹⁹ An ka ɲi ka kuma ka mɔgɔw dusukun sɔrɔ cogo min na, an be kalan nafaman sɔrɔ Ɛsitɛri fɛ o koo la. N’an b’a fɛ k’an somɔgɔ dɔ wala ɲɛmɔgɔ dɔ lasun a ka gwɛlɛyaba dɔ ɲɛnabɔ, an ka Ɛsitɛri ladegi: An ka muɲu a tigi kɔrɔ ani an k’an kɔnɔ gwɛ ka kuma a fɛ ni bonya ye.—Talenw 16:21, 23.

20, 21. a) Ɛsitɛri ye Aman ka nanbarako bɔ kɛnɛ kan cogo di? O la, Masacɛ ye mun lo kɛ? b) Komi a yirala ka gwɛ ko Aman ye nanbarakɛlaba ye, a ye mun lo kɛ?

²⁰ Asuerus ye Ɛsitɛri ɲininga ko: “O tigi nin ye jɔn ye? Min b’a fɛ k’o kɛ, ale be min?” Miiri k’a filɛ, Ɛsitɛri y’a bolo sin Aman ma ani k’a fɔ ko: “O cɛnnikɛbaga nin n’o jugu nin ye Aman ye, mɔgɔjugu nin!” Jalaki benna Aman kan! A jaa tigɛra kosɔbɛ.  Sisan, masacɛ bɔra a kala ma ko a ladibaga sɔbɛ Aman y’a lafili. A y’a lasun ka sariya dɔ sigi min tun bena kɛ sababu ye k’ale ka muso kanulen faga. Miiri k’a filɛ masacɛ ɲɛɛ wulenna cogo min na dimikojugu bolo! A dimininba wulila ka taga a ka nankɔ kɔnɔ walisa a hakili ka sigi.—Ɛsit. 7:5-7.

²¹ A yirala ka gwɛ ko Aman ye nanbarakɛlaba ye. A benna masamuso seen kɔrɔ walisa k’a deli ko a ka yafa ale ma. Masacɛ kɔsegira ka na dumunikɛso kɔnɔ ka Aman ye Ɛsitɛri ka lafɛn kan. A dimina k’a jalaki ko a b’a fɛ ka masamuso karaba ka la n’a ye ale yɛrɛ ka soo kɔnɔ. Sisan kɔni, Aman ta banna le! U ye fani biri a ɲɛɛ kan ka bɔ n’a ye. O la, masacɛ ka baaraden dɔ y’a fɔ ko Aman ye lɔgɔjan dɔ turu walisa ka Maridose dulon a kan. Masacɛ Asuerus sinna k’a fɔ ko u ka Aman yɛrɛ dulon o lɔgɔjan kan.—Ɛsit. 7:8-10.

22. Ɛsitɛri ka koo be se k’an dɛmɛ cogo di walisa an jigi kana tigɛ, an kana muruti ani an ka limaniya kana bɔsi an na?

²² Bi, tilenbaliyakow ka ca. An ka teli k’a miiri ko tilennenya tɛna kɛ ka ye. Yala o miiriya ɲɔgɔn delila ka na i kɔnɔ wa? Ɛsitɛri jigi ma tigɛ ka ye, a ma muruti ka ye, a ka limaniya fana ma bɔsi a la fewu. Wagati bɛnnin na, a y’a jaa gwɛlɛya ka kuma walisa tilenninyako ka kɛ. O kɔ, a y’a jigi la Jehova kan ka koo tɔɔ to a bolo. An k’o ɲɔgɔn kɛ fana! Jehova ma yɛlɛma. See b’a ye ka mɔgɔ juguw ni nanbaratɔw minɛ u yɛrɛw ka jaan kɔnɔ. A y’o ɲɔgɔn lo kɛ Aman na.—Zaburuw 7:12-17 kalan.

23. a) Masacɛ ye mun lo kɛ ka Maridose ni Ɛsitɛri sara? b) Yakuba satuma na, a ye kiraya kuma min fɔ Bɛnzamɛn koo la, o dafara cogo di? (Koorilen nin lajɛ: “ Kiraya kuma dɔ dafara.”)

²³ A laban, masacɛ y’a lɔn Maridose ye mɔgɔ min ye. Ale lo tun y’a niin kisi nanbarakɛlaw bolo. A bɔra a kala ma fana ko Maridose ye Ɛsitɛri lamɔfa ye. Masacɛ Asuerus ye Maridose kɛ minisiriw ɲɛmɔgɔ ye Aman nɔɔ na. Masacɛ ye Aman ka soo n’a ka nafoloba bɛɛ di Ɛsitɛri ma. Ɛsitɛri ye Maridose bila o bɛɛ kun na.—Ɛsit. 8:1, 2.

24, 25. a) Mun na Ɛsitɛri tun tɛ se ka sigi ɲɛsuma na hali ni Aman ka nanbarako bɔra kɛnɛ kan? b) Cogo juman na Ɛsitɛri y’a niin bila farati la tugun?

 ²⁴ Sisan kɔni, Ɛsitɛri ni Maridose niin bɔra farati la. Yala masamuso be se ka sigi ɲɛsuma na wa? N’a y’o kɛ, o bena kɛ hasiriyako ye a fɛ. Aman tun ye sariya min sigi ko Yahutuw bɛɛ ka faga, o bele be sen kan masaya yɔrɔ bɛɛ la. Aman tun ye kala la walisa k’a lɔn loon tigitigi min na a ka ɲi ka wuli Yahutuw kama. O kala lali be weele ko Purimu, o ye jinamoriyako dɔ lo ye (Ɛsit. 9:24-26). Tiɲɛn lo ko o loon tun ka jan, kalo damanin tun bena tɛmɛ fɔlɔ. Nka, wagati tun be surunyana. Yala o balawo tun be se ka lasa wa?

²⁵ Ɛsitɛri m’a yɛrɛ nafa dɔrɔn ɲini. A y’a niin bila farati la tugun ka don masacɛ fɛ k’a sɔrɔ a m’a weele. A kasitɔ a siyamɔgɔw kosɔn, a y’a cɛɛ deli ko a ka sariya jugu nin lasa. Nka sariya minw sigira Pɛrɛsiw ka masacɛw tɔgɔ la, u tɛ se ka lasa (Dan. 6:13, 16). O kama, masacɛ ye see di Ɛsitɛri ni Maridose ma ko u ka sariya wɛrɛ sigi sen kan. U y’o sariya kura weleweleda ka sira di Yahutuw ma u k’u yɛrɛ lafasa. Cidenw yɛlɛla soow kan ka teliya k’o kibaro diiman lase Yahutuw ma masaya yɔrɔ bɛɛ la. O kɛra jigitugu ye Yahutuw fɛ (Ɛsit. 8:3-16). Miiri k’a filɛ, masayaba nin yɔrɔ bɛɛ la, Yahutuw be kɛlɛkɛminanw ɲinina k’u yɛrɛ labɛn kɛlɛ kama. Ni sariya kura nin tun ma sigi sen kan, u tun tɛ se k’o kɛ abada. Nka min yɛrɛ kɔrɔtanin  lo, o ye nin ye: Yala “Kɛlɛbolow Matigi” Jehova tun bena u dɛmɛ wa?—1 Sam. 17:45, ABM.

26, 27. a) Jehova y’a ka mɔgɔw dɛmɛ u ye see sɔrɔ u juguw kan fɔɔ ka se hakɛ juman ma? b) Aman ka dencɛw halakira. O ye kiraya kuma juman lo dafa?

²⁶ Sisan, loon latigɛnin sera. Ala ka mɔgɔw labɛnnin lo kɛlɛ kama. Hali Pɛrɛsiw ka faaman caaman ye Yahutuw dɛmɛ sabu a fɔra masaya yɔrɔ bɛɛ la ko Yahutucɛ Maridose lo kɛra minisiriw ɲɛmɔgɔ ye sisan. Jehova y’a ka mɔgɔw dɛmɛ, u ye see sɔrɔ kosɔbɛ u juguw kan. Siga t’a la, a y’a ka mɔgɔw tanga. A m’a to u juguw k’u mɔnɛbɔ u la. *—Ɛsit. 9:1-6.

²⁷ Ka fara o kan, Maridose tun tɛ se ka hɛɛrɛ sɔrɔ Aman ka soo kun na n’o mɔgɔ jugu nin ka dencɛ tan bele be sii la. U ye olu fana faga (Ɛsit. 9:7-10). O cogo la, Bibulu ka kiraya kuma dɔ dafara: Ala tun kɔnna k’a fɔ ko Amalɛkiw bɛɛ ka kan ka halaki sabu u tun juguyara kosɔbɛ ale ka mɔgɔw ma (Deter. 25:17-19). N’a sɔrɔ Aman dencɛw tun ye o siya jalakinin ka mɔgɔw tɔɔ lo ye.

28, 29. a) Mun na Jehova tun y’a ɲini Ɛsitɛri n’a siyamɔgɔw fɛ u k’u seen don kɛlɛko la? b) Mun na Ɛsitɛri ka ɲɛyirali nafa ka bon an fɛ bi?

²⁸ Doniba lara Ɛsitɛri kun k’a sɔrɔ a tɛ mɔgɔkɔrɔba ye. A tun ka kan ka sariya dɔw sigi sen kan masacɛ tɔgɔ la ka ɲɛsin kɛlɛkow ni mɔgɔ fagari koo ma. O ma kɛ koo nɔgɔman ye a fɛ. Nka, Jehova tun b’a fɛ k’a ka mɔgɔw tanga halakili ma. Layidu tun tara Masiya min koo la, ale tun ka ɲi ka bɔ Israɛl siya lo la. Ale Masiya kelenpe lo tun bena kɛ adamadenw bɛɛ jigiya ye (Zɛnɛzi 22:18). Bi, Ala sagokɛlaw ninsɔn ka di k’a lɔn ko tuma min na Masiya Yesu nana dugukolo kan, a y’a fɔ a ka kalandenw ye k’u man kan k’u seen don duniɲa nin ka kɛlɛkow la.—Mat. 26:52.

²⁹ Nka, kerecɛnw b’u seen don Alako kɛlɛ la. Bi, ka tɛmɛ sanga ni wagati bɛɛ kan, Sutana cɛsirinin lo k’an ka limaniya nagasi (2 Korɛntikaw 10:3, 4 kalan). Ɛsitɛri ka ɲɛyirali nafa ka bon an fɛ dɛ! I n’a fɔ Ɛsitɛri, an be se k’a yira ko limaniya b’an na n’an be muɲu ani n’an be kuma ni hakilitigiya ye walisa ka mɔgɔw dusukun sɔrɔ. An k’an jaa gwɛlɛya fana ani an ka kɛ ni yɛrɛsaraka miiriya ye Ala ka mɔgɔw kosɔn.