Kuti Nacita Shani nga Nshatemwa Isukulu?
Ifingakwafwa
Tontonkanya pa busuma bwabamo. Ulingile ukwishiba ico ukusambilila kwawamina. Te fisambililo fyonse fingamoneka ukuti fyalicindama pali ino nshita. Lelo nga waishiba ifisambililo ifingi, uli no kwishiba ifintu pano calo. Ukwishiba ifingi kukakwafwa ‘ukuba ku bantu bonse nge fyo bali,’ e lyo ukeshiba ne fya kulanda na bantu balekanalekana. (1 Abena Korinti 9:22) E lyo kabili, ukalatontonkanya bwino, ne ci, cikakwafwa sana ku ntanshi.
Ukusambilila mpaka wapwisha isukulu kwaba kwati kupansa inshila mu mpanga umwaba imiti iingi—fyonse fibili te kuti fyafye nga pali ifibombelo fyalinga
Ukutemwa bakafundisha bobe. Nga umona kwati bakafundisha bobe balakutendusha, ulebika fye amano ku fyo basambilisha te kuli bena iyo. Wilaba ukuti bakafundisha bobe balisambilisha ifintu fimo fine pa myaka iingi. Kanshi nalimo kuti cabafya ukucincimuka pa kufunda nge fyo balecincimuka kale.
Ifyo wingacita: Ulelemba ifyebo nga balefunda. Uleipusha mu mucinshi ifyo ushumfwikishe, kabili ulemoneka ukuti walitemwa ico cisambililo. Nga ulebikako sana amano, nabo kuti balebikako amano.
Bika amano ku fyo wacenjelamo. Isukulu kuti lyakwafwa ukwishiba ifintu ifyo wacenjelamo mu cifyalilwa fye. Paulo alembeele Timote ati: “[Ulebomfya] sana ica bupe ca kwa Lesa icaba muli iwe.” (2 Timote 1:6) Timote afwile alipeelwe ica bupe ukupitila mu mupashi wa mushilo. Lelo alingile ukulabomfya sana ubu “ubupe” pa kuti amano akwete tayaleonaika. Nomba tatuletila amano wakwata aya ku sukulu ni Lesa e wakupeela. Na lyo line kwaliba ifintu fimo ifyo iwe wacenjelamo. Isukulu kuti lyakwafwa ukwishiba umo wacenjela e lyo no kubika amano kuli ifyo fine wacenjelamo.
