ABACAICE BEPUSHA UKUTI
Bushe Ifintu Fyapangilwe fye Nelyo Fyasangwike fye?—Ulubali 2: Ico Bamo Batwishikila nga Fyasangwike fye?
Alex taishiba ico afwile ukusumina. Ukutula fye na kale aishibe ukuti Lesa e ko aba no kuti e wabumba ifintu fyonse. Lelo bakafundisha bakwe ku sukulu babasambilishe ukuti ifintu fyasangwike fye, no kuti abasambilila sayansi balisanga ifishinka ifilanga ifyo. Alex talefwaya ukumoneka kwati takwata mano. Atile: ‘Nga ca kuti abasambilila sayansi balisanga ifishinka ifilanga ukuti ifintu fyasangwike fye, cinshi ine ningatwishikila?’
Bushe ifi fyalikucitikilapo na iwe? Nalimo ukutula fye na kale, walisumina filya Baibolo itila: “Lesa apangile umuulu e lyo ne sonde.” (Ukutendeka 1:1) Lelo muno nshiku abantu balitendeka ukukweba ati ifintu tafyapangilwe fye, fyasangwike fye. Bushe ulingile ukucetekela ifyo balekweba? Finshi filanga ukuti taufwile ukucetekela abalanda ifyo?
Ifintu fibili ifilenga abantu ukutwishika nga ca kuti ifintu fyasangwike fye
Abasambilila sayansi balalanda ifyapusana pa cisambilisho ca kuti ifintu fyasangwike fye. Nangu ca kuti balifwailishapo pa myaka iingi, abasambilila sayansi tabalondolola fimo fine pa fyo ifintu fisanguka.
Ifya kutontonkanyapo: Nga ca kuti abene abasambilila sana sayansi tabalanda fimo fine pa fyo ifintu fyasangwike, bushe nga watwishika ici cisambilisho ninshi walufyanya?—Amalumbo 10:4.
Ifyo twasumina filakuma ifyo twabela pano calo. Umulumendo umo, Zachary, atile: “Nga ca kuti ifya mweo fyonse fyasangwike fye, ninshi fwe bantu tuli ba fye e lyo ne fya mu muulu na pano isonde na fyo fya fye.” Ico cishinka, pantu nga ca cine ukuti ifintu fyasangwike fye, ninshi te kuti kube umulandu wine wine uo twabela pano calo. (1 Abena Korinti 15:32) Lelo nga ca kuti twabumbilwe fye, ninshi kuti twaishiba ne co twabela pano calo ne fyo ifintu fikaba ku ntanshi.—Yeremia 29:11.
Ifya kutontonkanyapo: Busuma nshi bwaba mu kwishiba nampo nga ifintu fyasangwike fye nelyo fyapangilwe fye?—AbaHebere 11:1.
Amepusho ya kutontokanyapo
IFYO BAMO BASUMINA: ‘Ifintu fyonse pano calo na mu mulu fyaishilebako ilyo kwapuulike fimo.’
Ni nani nelyo cinshi calengele ifintu ukupuulika?
Bushe kuti mwasumina ukuti ifintu fyaishilebako fye ifine nelyo kuti mwasumina ukuti kwali uwafipangile?
IFYO BAMO BASUMINA: ‘Abantu bafuma ku finama.’
Nga ca kuti abantu bafumine ku nama, nalimo kuli bakolwe, mulandu nshi abantu bakwatila sana amano ilyo bakolwe bena tabatontonkanya? a
Mulandu nshi no tuntu twa mweo utunono fye twapangilwa mu nshila ya kupapusha? b
IFYO BAMO BASUMINA: ‘Kwaliba ifilanga ukuti ifintu fyasangwike fye.’
Bushe abalanda ukuti ifintu fyasangwike fye, balisanga ifishinka ifilanga ukuti ca cine?
Bantu banga abasumina ukuti ifintu fyasangwike fye pa mulandu fye wa kuti babeba ukutila bonse abasambilila e fyo basumina?
a Bamo nalimo kuti batila bongobongo ya muntu ikalamba ukucila iya kwa kolwe, e calenga umuntu akwate sana amano. Nga mulefwaya ukwishiba ukuti ifyo balanda te fya cine, belengeni broshuwa itila The Origin of Life—Five Questions Worth Asking, pe bula 28.
b Belengeni broshuwa itila The Origin of Life—Five Questions Worth Asking, amabula 8-12.
Nalimo Kuti Mwatemwako ne fi
APA KULEMBA
Cinshi Calenga Ncetekele Ukuti Lesa E ko Aba?
Ipekanyeni ukulondolwela bambi ifyo mwasuminamo ukwabula umwenso kabili mu mucinshi.
ABACAICE BEPUSHA UKUTI
Bushe Fyapangilwe Fye Nelyo Fyasangwike Fye?—Ulubali 1: Mulandu nshi Ningiile Ukusumina Ukuti Lesa E ko Aba?
Bushe te kuti utemwe ukulaicetekela pa kulondolola umulandu wasuminina muli Lesa? Mona ifyo wingasuka nga bakwipusha umulandu wasuminina muli Lesa.
ABACAICE BEPUSHA UKUTI
Bushe Ifintu Fyapangilwe fye Nelyo Fyasangwike fye?—Ulubali 3: Mulandu Nshi Tulingiile Ukusumina Ukuti Ifintu Fyapangilwe fye?
Bushe nga wasumina ukuti ifintu fyapangilwe fye ninshi kuti wasuula ifyo abasambilila sayansi basanga?
