Limo limo nga mwaleka ukwishishanya cilabapo bwino. Umfwa icacitiike ku mukashana Jill. Atile: “Pa kubala naletemwa umulumendo naleishishanya nankwe nga alesakamana pantu teshibe uko ndi, ifyo ndecita, na bantu ndi nabo. Nomba caishilebipa ica kutila talefwaya ukuti ndeba na bantu bambi kano fye ena. Aaleumfwa ubufuba nangu ni lintu ndi na balupwa lwandi, maka maka batata. Ilyo nalekele ukwishishanya nankwe, nalyumfwile bwino sana!”

 Ifi fine e fyo cali na kuli Sarah. Atampile ukumona ukuti umulumendo uo aleishishanya nankwe, John, aali uwa-afya, kabili takwete no mucinshi. Umfwa icacitike ico Sara ashimike. Atile: “Bushiku bumo pali uko twali no kuya, lelo John aishile ku ng’anda ninshi nacelwa ama-awala yatatu! Ilyo bamayo bafumine ku kuyamona uulekonkonsha ku ciibi, tababikileko amano, anjebele fye ati: ‘Tuleya. Natucelwa.’ Tatile ‘Nincelwa,’ lelo atile ‘Natucelwa.’ Aalingile ukulomba ubwelelo nangu ukulondolola umulandu acelelwe. Lelo icabipishe ca kuti tali no mucinshi kuli bamayo!”

 Kwena tatuletila umunobe nga acita fye cimo ica kukalifya, nangu nga acitapo fye cimo ico ushitemenwe, ninshi ulingile ukuleka ukwishishanya nankwe. (Amalumbo 130:3) Lelo ilyo Sara ailwike ukuti John aali fye uwa musaalula, alilekele ukwishishanya nankwe.

 Kuti wacita shani nga ca kuti na iwe wasangile ukuti umuntu uleishishanya nankwe talingile ukuba umwina mobe nga filya cali kuli Jill na Sara? Ninshi taulingile ukusuulako fye! Nangu ca kuti te kuti canguke, icingawamisha kuleka fye ukwishishanya no yo muntu. Amapinda 22:3 yatila: “Uwasalapuka nga amona ububi alabelama, lelo imbulwa mano shena shiya fye no kukandwa.”

 Ca cine calyafya ukuleka ukwishishanya. Lelo wishibe ukuti nga mwaupana ninshi calaala capwa, tamulingile ukulekana. Nga mwaleka ukwishishanya cikakukalipa fye pa nshita iinono, lelo nga waupana no muntu uushikulingile, lyonse ukulakalipwa no mutima!