Biniigana bi Bibel gwon bi ñéga litehge jés ni maboñok més inyu jam li maéya; yak mahoñol ma ma noñ ha:

•   I ta bé béba i ee ibale mut u ngwés a nwo. Yak banigil ba Yésu ba bi ee bagwéha bap ba ba bi wo. (Yôhanes 11:33-​35, 38; Minson mi baôma 8:2; 9:​39) Jon, di nyoñ bé maéya kiki ngéda i maséé. (Ñañal 3:​1, 4; 7:​1-4) Ndi, di ntehe le maéya ma nti bés pôla i unda ñem ngôô.​​—Rôma 12:15.

•   Bawoga ba nyi bé to yom. Ibabé i béñge litén jés tole bilem gwés, di ntjél maboñok tole bilem bi Bibel i nsôñga, kiki bo le bôt ba nke ni bisu i niñ to i mbus nyemb yap, ni le ba nla ki hôla bayômi. (Ñañal 9:​5, 6, 10) Hala a mbéñge yak mam kiki bo lélhe maéya, ndumbi, i ti salga (hala wee i ti bawoga bijek tole mook), i pôdôs bawoga tole i bat bo mam, i jubus biyik bi bôda tole bi bôlôm i malep. Di ntjél i boñ mam ma momasôna ni bilem bi, inyule Bibel i nti oda le: ‘Jon pama ipôla yap, . . . ni waa yak tihba yom nyega.’​​—2 Korintô 6:​17.

•   Botñem i yé inyu bawoga. Bibel i niiga le bitugne bi ga ba, i kalak ki le ngéda y’a lo le nyemb i ga ba ha bé. (Minson mi baôma 24:15; Masoola 21:4) Botñem i, i nhôla bés le di tumbba bañ iloo héga i kel maéya, ndik kiki botñem i, i bi hôla bikristen bi hiai i bisu.​​—1 Tésalônika 4:​13.

•   Bibel i niiga bés le di bana ñem nsôhga. (Bingéngén 11:2) Di nhoñol bé le maéya ma yé ngéda i bambal “humbulnyuu,” libak ni lingwañ li mut nu a bi wo. (1 Yôhanes 2:​16) Di ntégbaha bé maéya inyu binene tole je ni nyo, ndi to i unda le di nsomb minkuu mi mim ni mambot ma ma nhee die.

•   Di nhélés bé bôt bape i tehe jam li maéya kiki bés. Inyu hala nyen di noñ litiñ lini: “Nyambe a’ kéés hiki wada wés inoñnaga ni maboñok mé.” (Rôma 14:12) Ndi, ibale pôla i nene, di noode toñol i mam di nhémle ikété “ñemlima lôñni njôôñ lipém” wonsôna.​​—1 Pétrô 3:​15.

 Homa maéya ma ntagbene: Ibale ngim lihaa i nkit le i ntégbaha maéya, ma nla tagbene to hee. Kiki hihéga, ma nla tagbene i Ndap Ane, i wom soñ, i ngim ndap, i homa ba nlighene mim tole i pañ soñ.

 Mut wada nyen a mpot i maéya: Nkwel u ntiba inyu lédés bet ba nimis mut, u ntoñol yom Bibel i niiga inyu bawoga, yak botñem i bitugne. (Yôhanes 11:25; Rôma 5:​12; 2 Pétrô 3:​13) Nkwel u, u nla hôñlaha bôt bilem bilam bi mut nu a nwo, u ti ki bôt makénd i kôna ndéñbe i mut nu.​—2 Samuel 1:​17-​27.

 Hiémbi hi nla tuba hi bak hi niñne i Bibel. (Kôlôsé 3:​16) Nkwel u mal ni masoohe.​​—Filipi 4:​6, 7.

 I kot moni tole njañgi: Di nsaa bé nti minkwel nye ki nye, to inyu minkwel mi maéya, di mboñ bé to njañgi ngéda makoda més.​​—Matéô 10:8.

 I ke i maéya: Bôt ba ta bé mbôgi Yéhôva ba yé nséblak i maéya di ntégbaha i Ndap Ane yés. Kiki makoda més momasôna, bôt bobasôna ba yé nséblaga i maéya més.

 Hiki Mbôgi Yéhôva yon i nkit yomede inoñnaga ni kiñnem yé kiki bitilna bi niiga nye. (1 Timôtéô 1:​19) Ndi to hala, di nyoñ bé ngaba ni maéya ma ma nkiha bé ni matiñ ma Bibel.​​—2 Korintô 6:​14-​17.