መጽሐፍ ቅዱስ “በመጀመሪያ አምላክ ሰማያትንና ምድርን ፈጠረ” ይላል። (ዘፍጥረት 1:1) መጽሐፍ ቅዱስ አምላክ እያንዳንዱን ነገር የፈጠረው እንዴት እንደሆነ በዝርዝር አይገልጽም። በመሆኑም ጽንፈ ዓለማችን የተገኘው በሕዋ ውስጥ በተከሰተ ታላቅ ፍንዳታ (ቢግ ባንግ) አማካኝነት ቢሆን እንኳ ይህ ሐሳብ መጽሐፍ ቅዱስ ከሚናገረው ነገር ጋር አይጋጭም። እንዲያውም ዘፍጥረት 1:1 ይህ ፍንዳታ እንዲከሰት ያደረገው ማን ነው? ለሚለው ጥያቄ መልስ ይሰጣል።

እርግጥ ነው፣ ብዙ የሳይንስ ሊቃውንት ይህ ታላቅ ፍንዳታ ድንገተኛና ምንም ዓላማ የሌለው እንደሆነ ያምናሉ፤ በተጨማሪም በዚህ ፍንዳታ ምክንያት የተለያዩ ንጥረ ነገሮች በራሳቸው አንድ ላይ ተገጣጥመው በጊዜ ሂደት ከዋክብትና ፕላኔቶች እንደተገኙ ይሰማቸዋል። መጽሐፍ ቅዱስ ይህን አመለካከት አይደግፍም፤ ከዚህ ይልቅ ጽንፈ ዓለምን የሠራው አምላክ እንደሆነ ይናገራል፤ አምላክ ጽንፈ ዓለምን የፈጠረው በሕዋ ውስጥ አንድ ዓይነት ፍንዳታ እንዲከሰት በማድረግ ወይም በሌላ መንገድ ሊሆን ይችላል።

“በመጀመሪያ አምላክ ሰማያትንና ምድርን ፈጠረ።”—ዘፍጥረት 1:1

አዎ። መጽሐፍ ቅዱስ አምላክ ሕይወት ያላቸውን ነገሮች የፈጠረው “እንደየወገናቸው” እንደሆነ ይናገራል። (ዘፍጥረት 1:11, 12, 21, 24, 25) ታዲያ በአንድ ወገን ወይም ዝርያ ውስጥ ልዩነት ሊፈጠር ይችላል? አዎ ይችላል። ይሁንና በአንድ ወገን ውስጥ ያሉ ሕያዋን ፍጥረታት ከአካባቢያቸው ጋር ለመላመድ ለውጥ ማድረጋቸው በዝግመተ ለውጥ አማካኝነት ቀስ በቀስ አዲስ ዓይነት ዝርያ እንደሚገኝ ያረጋግጣል? አያረጋግጥም።

ተመራማሪዎች በ1970ዎቹ በጋላፓጎስ ደሴቶች በሚገኙ ፊንች የሚባሉ የአእዋፍ ዝርያዎች ላይ ያካሄዱትን ጥናት እንደ ምሳሌ እንመልከት። ተመራማሪዎቹ ተለቅ ያለ ምንቃር ያላቸው ፊንቾች የአየር ንብረቱ በመለወጡ ምክንያት ከሌሎቹ ይልቅ በሕይወት የመትረፍ አጋጣሚያቸው ሰፋ ያለ እንደነበር አስተዋሉ። አንዳንዶች ይህ ዝግመተ ለውጥን የሚደግፍ ማስረጃ እንደሆነ ይሰማቸዋል። ይሁን እንጂ ይህ የዝግመተ ለውጥ ማስረጃ ነው? ወይስ ከአካባቢያቸው ጋር ለመላመድ የሚያደርጉት ለውጥ? የሚገርመው፣ ከዓመታት በኋላ ትናንሽ ምንቃር ያላቸው ፊንቾች ከሌሎቹ ፊንቾች በልጠው ተገኙ። ይህ ሁኔታ የአንትሮፖሎጂ ፕሮፌሰር የሆኑትን ጄፍሪ ሽዋርዝን የሚከተለው መደምደሚያ ላይ እንዲደርሱ አድርጓቸዋል፦ ከአካባቢው ጋር የመላመድ ችሎታ አንድን ዝርያ ተለዋዋጭ የሆኑ ሁኔታዎችን መቋቋም እንዲችል ይረዳዋል እንጂ “አዲስ ዝርያ እንዲፈጠር አያደርግም።”

መጽሐፍ ቅዱስ ‘ሁሉንም ነገሮች የፈጠረው አምላክ’ እንደሆነ ይናገራል። (ራእይ 4:11) አምላክ የፍጥረት ሥራዎቹን እስኪያጠናቅቅ ድረስ ‘አላረፈም።’ (ዘፍጥረት 2:2) መልእክቱ ግልጽ ነው፦ አምላክ አንድ ውስብስብ ያልሆነ ሕይወት ያለው ነገር ፈጥሮ አላረፈም፤ ወይም ይህ ፍጥረት በሚሊዮኖች በሚቆጠሩ ዓመታት ውስጥ በዝግመተ ለውጥ አማካኝነት ወደተለያዩ የዓሣ፣ የዝንጀሮና የሰው ዝርያዎች እንዲለወጥ አላደረገም። * የማክሮኢቮሉሽን (የትልቅ ለውጥ) አራማጆች መጽሐፍ ቅዱስ ፈጣሪ “ሰማያትን፣ ምድርን፣ ባሕርንና በውስጣቸው ያሉትን ነገሮች ሁሉ” እንደሠራ የሚናገረውን ሐሳብ አይቀበሉም።—ዘፀአት 20:11፤ ራእይ 10:6

“ይሖዋ አምላካችን፣ ሁሉንም ነገሮች ስለፈጠርክ . . . ግርማ፣ ክብርና ኃይል ልትቀበል ይገባሃል።”—ራእይ 4:11

ተጨማሪ ነገር ለማወቅ፦ መጽሐፍ ቅዱስ እንዲህ ይላል፦ “የማይታዩት [የአምላክ ባሕርያት] . . . ዓለም ከተፈጠረበት ጊዜ አንስቶ በግልጽ ይታያሉ፤ ምክንያቱም ባሕርያቱን ከተሠሩት ነገሮች ማስተዋል ይቻላል።” (ሮም 1:20) አምላክ እሱን ከልብ የሚፈልጉትን ጨምሮ ለሁሉም ሰዎች በፍቅር ተነሳስቶ ያዘጋጀላቸው መልካም ነገር አለ፤ በመሆኑም ስለ አምላክ መማር ሕይወት እውነተኛ ትርጉም እንዲኖረው ያደርጋል። (መክብብ 12:13፤ ዕብራውያን 11:6) ተጨማሪ መረጃ ለማግኘት ከፈለግክ www.pr418.com/am የተባለውን ድረ ገጽ መመልከት ወይም በአካባቢህ ያሉትን የይሖዋ ምሥክሮች ማናገር ትችላለህ። የመጽሐፍ ቅዱስ ትምህርቶች > የመጽሐፍ ቅዱስ ጥያቄዎችና መልሶቻቸው የሚለውን ተመልከት።