OFakazi BakaJehova, beqhutshwa ukuthanda uNkulunkulu nomakhelwane, bajabulela ukuxoxa ngeBhayibheli nabo bonke abantu, kuhlanganise nalabo asebake basho ukuthi abathandi ukuxoxa nathi. (Mathewu 22:37-39) Ukuthanda uNkulunkulu kusenza silalele umyalo weNdodana yakhe wokuba “sinikeze ubufakazi obuphelele.” (IzEnzo 10:42; 1 Johane 5:3) Ukuze sikwenze lokhu, siwuletha kaningana umyalezo kaNkulunkulu, njengoba nje abaprofethi baNkulunkulu basendulo benza. (Jeremiya 25:4) Ngenxa yokuthi siyabathanda omakhelwane bethu, sizama ukuxoxa nabo bonke ngomyalezo osindisa ukuphila ‘wezindaba ezinhle zombuso,’ kuhlanganise nalabo ababengenandaba nawo ngaphambili.​—Mathewu 24:14.

 Sivame ukuthola othile othandayo ukuxoxa nathi lapho siphindela. Cabanga ngezizathu ezintathu:

•   Abantu bayathutha.

•   Abanye kulawo makhaya babonisa uthando kulokhu esixoxa ngakho.

•   Abantu bayashintsha. Izenzakalo zomhlaba wonke noma izimo zomuntu ngamunye zenza abanye ‘baqaphele isidingo sabo esingokomoya’ kakhudlwana futhi babe nesifiso sokwazi ngomyalezo weBhayibheli. (Mathewu 5:3) Ngisho nalabo abaphikisayo bangashintsha indlela abazizwa ngayo, njengoba kwenzeka kumphostoli uPawulu.​—1 Thimothewu 1:​13.

 Noma kunjalo, asibaphoqi abantu ukuba balalele umyalezo wethu. (1 Petru 3:​15) Sikholelwa ukuthi umuntu ngamunye kumelwe azinqumele yena endabeni yokukhonza.​—Duteronomi 30:19, 20.