¿Baʼax ka tuklik ken a wuʼuy «táan u taal u xuul»? ¿Ka tuklik wa yaan u xuʼulsaʼal le Luʼum yéetel junpʼéel terremoto, junpʼéel chak ikʼal wa yéetel junpʼéel baʼateltáambal? Yaneʼ ken u yuʼubeʼ ku sajaktal, uláakʼoʼobeʼ chéen ku cheʼejtikoʼob wa mix tech u beetkoʼob u cuentail.

Le Bibliaoʼ juntaatsʼ u yaʼalik: «Bíin taalak u xuul» (Mateo 24:14, Le Tumben Nuptʼan). Tiʼ u xuuleʼ le Bibliaoʼ ku yaʼalik xan «Armagedón» wa «u baʼatelil u noj kʼiinil le Dios yaan tuláakal páajtalil tiʼoʼ» (Apocalipsis 16:14, 16, tsolajil). Baʼaleʼ maʼ bey u kaʼansaʼal teʼ religionoʼoboʼ. Yaʼab máax aʼalikeʼ baʼaloʼob jelaʼantak yéetel kʼaastak kun úuchul tiʼ le Luʼumaʼ. Baʼaleʼ ¿baʼax u kʼáat u yaʼal «u xuul»? Le Bibliaoʼ ku tsolik baʼaxiʼ yéetel ku yáantkoʼon k-ojéelt naatsʼ yanil. Tsʼoʼoleʼ u maas maʼalobileʼ ku yeʼesiktoʼon bix jeʼel k-salvartikbaeʼ. Táanileʼ koʼox ilik baʼax ku yaʼalik le Bibliaoʼ tsʼoʼoleʼ k-ilik jach baʼax u kʼáat u yaʼal «u xuul».

1. MAʼ TUN TÓOKBIL YÓOKʼOL KAAB

   Le Bibliaoʼ ku yaʼalik: «Le luʼumaʼ ta tsʼáaj yóokʼol u chuunpakʼiloʼob utiaʼal mix bikʼin ka péeknak tu kúuchil» (Salmo 104:5). Yaʼab u téenel ku yaʼalik xaneʼ Dioseʼ mix bikʼin ken u xuʼuls le Luʼumaʼ; maʼ ken u chaʼa u xuʼulsaʼal tumen mix máak, mix tumen mix baʼal (Eclesiastés 1:4; Isaías 45:18).

2. TSʼAʼAN U KʼIINIL YÉETEL U YORAIL

   Le Bibliaoʼ ku yaʼalikeʼ Dioseʼ u yéeymaj junpʼéel kʼiin utiaʼal u taasik u xuul. Ku yaʼalik: «Baʼaleʼ u kʼiinil yéetel u yoraileʼ, mix máak u yojel, mix le angeloʼob yanoʼob teʼ kaʼanoʼ, mix le Paaloʼ, chéen le Taataoʼ. Maʼ u xuʼulul a paakateʼex yéetel maʼ a weenleʼex, tumen maʼ a wojleʼex baʼax kʼiin ken kʼuchuk le kʼiin aʼalaʼanoʼ» (Marcos 13:32, 33). Jeʼex k-ilkoʼ Jajal Dios, le Taataoʼ, u yéeymaj «u kʼiinil yéetel u yorail».

3. MAʼ WÍINIK KUN TAASKIʼ, MIX XAN JUNPʼÉEL METEORITO

   ¿Baʼax wa máax kun taasik u xuul? U libroil Apocalipsiseʼ ku yaʼalik: «Ka tin wilaj jeʼekʼab le kaʼanoʼ, yéetel, ¡ileʼex!, juntúul sak tsíimin; le máax natʼmiloʼ ku kʼaabaʼtik Chúukaʼan óolal yéetel Jaaj [...]. Ka tin wilaj le tsʼíitsʼik baʼalcheʼoʼ, bey xan u reyiloʼob yóokʼol kaab yéetel u soldadoʼob, u muchʼmubaʼob baʼateʼel tu contra le máax natʼmil le tsíiminoʼ yéetel tu contra u soldadoʼob» (Apocalipsis 19:11-21). Kex simbólico le baʼax ku yaʼalaʼal teʼelaʼ, séeb u naʼataʼal baʼax u kʼáat u yaʼale: Dioseʼ yaan u túuxtik yaʼab angeloʼob utiaʼal u xuʼulsik u enemigoʼob.

1. U XUUL LE GOBIERNOʼOBOʼ

   Le Bibliaoʼ ku tsolik: «Tu kʼiiniloʼob u méekʼtáanoʼob le [reyoʼoboʼ], u [Diosil] kaʼaneʼ bíin u líiʼs junpʼéel [reino] mix bikʼin bíin xuʼulsaʼakiʼ, bíin pʼáatak  utiaʼal minaʼan u xuul, mix bíin tʼonkíintaʼak tumen mix junpʼéel múuchʼ kaaj, baʼaleʼ yaan u xuʼulsik junpuliʼ tuláakal le uláakʼ [reyoʼoboʼ]» (Daniel 2:44). Jeʼex k-ilkoʼ «u reyiloʼob yóokʼol kaab yéetel u soldadoʼob[eʼ]» yaan u muchʼkubaʼob «baʼateʼel tu contra le máax natʼmil le tsíiminoʼ yéetel tu contra u soldadoʼob», baʼaleʼ yaan u xuʼulsaʼaloʼob tumen u Reino Dios (Apocalipsis 19:19).

2. U XUUL BAʼATELIL, LOOB YÉETEL KʼASAʼANIL

   Dioseʼ yaan «u tsʼáaik xuul tiʼ le baʼateloʼob tuláakal tuʼux yóokʼol kaab[oʼ]» (Salmo 46:9). Le Bibliaoʼ ku yaʼalik xan: «Le máaxoʼob noʼojaʼan u kuxtaloʼob yéetel x-maʼ siʼipileʼ bíin kuxlakoʼob junpuliʼ teʼ luʼumaʼ; baʼaleʼ le loolob máakoʼob yéetel le j-kaʼapʼéel ichoʼoboʼ bíin jóoʼsaʼakoʼob, bíin tojolchʼintaʼakoʼob» (Proverbios 2:21, 22). Dioseʼ ku yaʼalik: «¡Ile!, yaan in túumbenkuntik tuláakal baʼal» (Apocalipsis 21:4, 5).

3. U XUUL LE RELIGIONOʼOB KU TUUSOʼOBOʼ

   Teʼ Bibliaoʼ tsʼíibtaʼan: «Baʼaxoʼob ku [yaʼalik] le [profetaʼoboʼ] chéen tuus; le j-kʼiinoʼoboʼ ku méekʼtáanoʼob jeʼel bix u kʼáatoʼobeʼ. ¡In kaajaleʼ bey utsil tu tʼaanoʼ! Baʼaleʼ, ¿baʼax bíin a beeteʼex le ken kʼuchuk u xuuleʼ?» (Jeremías 5:31). Jesuseʼ tu yaʼalaj: «Teʼ kʼiin jeʼeloʼ yaʼab máakoʼob ken u yaʼaloʼobten: ‹Yuumtsil, Yuumtsil, ¿maʼ wa profetizarnajoʼon ta kʼaabaʼiʼ? ¿Maʼ wa t-jóoʼsaj demonioʼob yéetel t-beetaj yaʼab uláakʼ nukuch baʼaloʼob ta kʼaabaʼiʼ?›. Baʼaleʼ teneʼ yaan in waʼaliktiʼob: ¡Junpuliʼ maʼ in kʼaj óoleʼexiʼ! ¡Náachkuntabaʼex tiʼ teen, kʼaakʼas máakeʼex!» (Mateo 7:21-23.)

4. U XUUL MÁAXOʼOB UTS TU TʼAANOʼOB LOOB YÉETEL KʼASAʼANIL

   Jesucristoeʼ tu yaʼalaj: «Lelaʼ letiʼe baʼax meyajnaj utiaʼal u juzgartaʼal wíinikoʼoboʼ: le sáasiloʼ tsʼoʼok u taal way yóokʼol kaabeʼ, baʼaleʼ le máakoʼoboʼ maʼ tu yaabiltoʼob le sáasiloʼ, baʼaxeʼ tu yaabiltoʼob le éeʼjochʼeʼeniloʼ, tumen le baʼaxoʼob ku beetkoʼob kaʼachoʼ láaj kʼaastak» (Juan 3:19). Le Bibliaoʼ ku yaʼalik bix xuʼulsaʼabik le kʼasaʼan máakoʼob tu kʼiiniloʼob Noeoʼ: «Xuʼulsaʼab tiʼ le úuchben yóokʼol kaab le ka beetaʼab u búulul ich jaʼoʼ. Tu yoʼolal xan u tʼaan Dioseʼ, le kaʼan yéetel le Luʼum yaan bejlaʼaʼ tsʼaʼanoʼob junpáayil utiaʼal u xuʼulsaʼaloʼob yéetel kʼáakʼ tu kʼiinil le juiciooʼ bey xan tu kʼiinil u xuʼulsaʼal tiʼ le kʼasaʼan máakoʼoboʼ» (2 Pedro 3:5-7).

U xuul «yóokʼol kaab» taal tu kʼiiniloʼob Noeoʼ chíikaʼan tiʼ le baʼax kun úuchul «tu kʼiinil le juicio» kun taal maʼ tun xáantaloʼ. ¿Baʼax le yóokʼol kaab xuʼulsaʼaboʼ? Maʼ letiʼe Luʼumaʼ, baʼaxeʼ letiʼe «kʼasaʼan máakoʼoboʼ», u enemigoʼob Dios. Tu kʼiinil le juicio xanoʼ u enemigoʼob Dios kun xuʼulsbil. Baʼaleʼ Dioseʼ yaan u kanáantik u amigoʼob jeʼex tu kanáantil Noé yéetel u láakʼtsiloʼobeʼ (Mateo 24:37-42).

Tukult bukaʼaj jatsʼutsil le kuxtal way Luʼum ken luʼsaʼak tumen Dios le kʼasaʼaniloʼ. Jeʼex k-ilkoʼ ken tʼaanak le Biblia tiʼ u xuuloʼ, táan u tʼaan tiʼ baʼaloʼob maʼalobtak kun úuchul. Baʼaleʼ maʼ xaaneʼ ka tuklik: «¿Yaʼab wa u bin u taal u xuul? ¿Bix jeʼel u páajtal in salvarkinbaeʼ?». Koʼox ilik baʼax ku yaʼalik le Bibliaoʼ.