Jesúseʼ maʼ igual yéetel toʼoniʼ tumen antes u síijil way Luʼumeʼ kajaʼan teʼ kaʼanoʼ (Juan 8:23). Letiʼ yáax beetaʼab tumen Jéeoba. Como mix máak áant u beeteʼ ku yaʼalaʼaltiʼ u juntúuliliʼ Paal Dios. Tsʼoʼoleʼ Jesúseʼ tu yáantaj Jéeoba u beet le u maasil baʼaloʼoboʼ (Juan 1:14). Ku yaʼalaʼal xan tiʼ «le Tʼaanoʼ» tumen ku bisik u tʼaan u Taata tiʼ u maasil. Xok Proverbios 8:22, 23, 30; Colosenses 1:15, 16.

Dioseʼ tu túuxtaj u Hijo way Luʼumeʼ, utiaʼal leloʼ tu chʼaʼaj u kuxtal Jesúseʼ ka tu tsʼáaj tu jobnel wa tu matriz juntúul x-chʼúupal ku kʼaabaʼtik María. Leloʼ ku yeʼesikeʼ u papá Jesúseʼ maʼ juntúul wíinikiʼ (Lucas 1:30-35). Jesúseʼ taal way Luʼum utiaʼal: 1) u kaʼansik u jaajil yoʼolal Dios, 2) u yeʼesik kex yaj baʼax k-muʼyajtikeʼ jeʼel u páajtal k-beetik baʼax u kʼáat Dioseʼ yéetel 3) u tsʼáaik u kuxtal bey «junpʼéel boʼoleʼ». Xok Mateo 20:28.

Juntúul máak secuestrartaʼaneʼ kʼaʼabéet u boʼotaʼal u jáalkʼabtaʼal (Éxodo 21:29, 30). Jéeobaeʼ maʼ u kʼáat kaʼach ka chʼíijik mix ka kíimik máakiʼ, le oʼolal tu yaʼalaj tiʼ Adáneʼ wa maʼ tu yuʼubik tʼaaneʼ yaan u kíimil. K-ilik túuneʼ wa maʼ u kʼebantal kaʼacheʼ bejlaʼa maʼ tu kíimileʼ (Génesis 2:16, 17; 5:5). Le Bibliaoʼ ku yaʼalikeʼ yoʼolal Adáneʼ ook le kíimil «way yóokʼol kaabeʼ». Leloʼ u kʼáat u yaʼaleʼ Adán máans le kʼeban yéetel le kíimil tiʼ tuláakal máakoʼ. Le beetik kʼaʼabéet k-salvartaʼal. Xok Romanos 5:12; 6:23.

 U boʼolil le kʼebanoʼ letiʼe kíimiloʼ. Kéen kíimkoʼoneʼ chéen k-kʼebanoʼob k-boʼotik, maʼ tu páajtal k-boʼotik utiaʼal u maasiliʼ. Le oʼolaleʼ, ¿máax túun ken u boʼot k-salvartaʼal tiʼ le kíimiloʼ? Xok Salmo 49:7-9.

Jesúseʼ mix juntéen kʼebanchaji, letiʼ kaʼacheʼ perfecto. Maʼ kíim utiaʼal u boʼotik u kʼebaniʼ, baʼaxeʼ kíim utiaʼal u boʼotik k-kʼebanoʼob. Dioseʼ tu yeʼesaj jach u yaabiltmoʼon tumen tu túuxtaj u Hijo kíimil t-óolal. Jesús xaneʼ tu yeʼesaj u yaabiltmoʼon tumen tu yuʼubaj u tʼaan u Taata yéetel tu yóotaj u tsʼáa u kuxtal utiaʼal u salvarkoʼon tiʼ le kʼeban yéetel tiʼ le kíimiloʼ. Xok Juan 3:16; Romanos 5:18, 19.

Chaʼant le video ¿Baʼaxten kíim Jesús?

Le ka taal Jesús way Luʼumeʼ tu tsʼakaj kʼojaʼanoʼob, tu kuxkíintaj kimenoʼob yéetel tu yáantaj le máaxoʼob ku sufriroʼoboʼ. Ichil junpʼíit kʼiineʼ bey xan ken u kaʼa beetiloʼ (Mateo 15:30, 31; Juan 5:28). Jesúseʼ kíimi, pero Dioseʼ tu kaʼa kuxkíintaj, tu tsʼáajtiʼ junpʼéel wíinklil utiaʼal u kuxtal teʼ kaʼanoʼ (1 Pedro 3:18). Baʼaleʼ Jesúseʼ maʼ jáan káaj u gobernar way Luʼumeʼ, anchaj u páaʼtik u tsʼaʼabal autoridad tiʼ (Hebreos 10:12, 13). Teʼ kʼiinoʼobaʼ Jesúseʼ táan u gobernar teʼ kaʼanoʼ. U discípuloʼobeʼ táan u tsikbaltikoʼob le meyaj ku beetik Jesúsoʼ. Xok Daniel 7:13, 14; Mateo 24:14.

Yéetel le autoridad tsʼoʼok u tsʼaʼabal tiʼ Jesúsoʼ maʼ tun xáantaleʼ yaan u xuʼulsik le máaxoʼob kʼasaʼanoʼoboʼ. Tuláakal le máakoʼob ku yuʼubikoʼob u tʼaan yéetel yaan u fejoʼob tiʼ Jesúsoʼ yaan u kuxtaloʼob tiʼ junpʼéel kiʼichkelem paraíso way Luʼumeʼ. Xok Salmo 37:9-11.