«Tin chichnileʼ in sukuʼuneʼ jach ku sen jatsʼiken yéetel ku sen ofenderken. Ka tsʼoʼok xan in beeleʼ in suegroʼobeʼ ku sen maltratarkenoʼob yéetel ku yilkenoʼob bey u esclavaʼobeʼ. Tu yoʼolal leloʼ tin tuklaj tak in kíimskinba» (Madhu, a India).

 Le Organización Mundial de la Saludoʼ ku yaʼalikeʼ «cada kʼiin ku máaneʼ maas yaʼab koʼoleloʼob ku maltratartaʼaloʼob tiʼ tuláakal yóokʼol kaab». Ku yaʼalik xaneʼ juntúul tiʼ cada óoxtúul koʼoleloʼobeʼ ku maltratartaʼal wa ku violartaʼal ichil u kuxtal.

 Wa tsʼoʼok u yúuchultech beyoʼ maʼ xaaneʼ saajkech jóokʼol tumen ka tuklikeʼ jeʼel a maltratartaʼaleʼ, jeʼel a ofendertaʼaleʼ wa a violartaʼaleʼ. Yoʼolal le baʼaxoʼob ku yúuchlaʼ maʼ xaaneʼ jeʼel a tuklikeʼ mix máak ku preocuparkuba yoʼolal le koʼoleloʼoboʼ. Chéen baʼaleʼ, ¿kux túun Dios? ¿Baʼax ku tuklik yoʼolal le koʼoleloʼoboʼ?

 Teksto jeʼel u yáantajeʼ: «[Dioseʼ] tu beetaj xiib bey xan koʼolel» (Génesis 1:27).

 Baʼax u kʼáat u yaʼale: Dioseʼ tu beetaj xiib yéetel koʼolel, leloʼ u kʼáat u yaʼaleʼ Dioseʼ u kʼáat ka respetartaʼak tu kaʼatúulal. U kʼáat xaneʼ le íichamtsiloʼ ka «u yaabilt u yatan jeʼex u yaabiltmilubaeʼ», maʼ unaj u ofenderkiʼ mix u maltratarkiʼ (Efesios 5:33; Colosenses 3:19). Lelaʼ jach claro u yeʼesikeʼ Dioseʼ u kʼáat ka kanáantaʼak le koʼoleloʼoboʼ.

 «Tin paalileʼ yaan tiʼ in láakʼtsiloʼobeʼ tu violartenoʼob. Tsʼoʼoleʼ le yaanten 17 añosoʼ, in patróneʼ tu yaʼalajten yaan u luʼsikten meyaj wa maʼ tin aceptartik in chital tu yéetel. Bejlaʼa tsʼoʼok in nojochtaleʼ, in wíicham, in papáʼob yéetel in vecinoʼobeʼ ku mixbaʼalkúuntkenoʼob. Pero le ka tin kʼaj óoltaj Jéeoba, b le Máax beetmil tuláakal baʼaloʼ, tin kaneʼ jach ku respetartik le koʼoleloʼoboʼ. Leloʼ tsʼoʼok u yeʼesikteneʼ u yaabiltmen yéetel jach koʼojen tu táan» (María, Argentina).

 Teksto jeʼel u yáantajeʼ: «Yaan juntúul amigo maas nojoch u yaabilaj ke jach u sukuʼun máak» (Proverbios 18:24).

 Baʼax u kʼáat u yaʼale: Juntúul maʼalob amigoeʼ yaan u yáantkech, maʼ ten u pʼatech ta juunal. Le oʼolal jeʼel u páajtal a tsikbaltiktiʼ jach bix a wuʼuyikabaeʼ.

 «Máan 20 años maʼ tin tsikbaltaj tiʼ mix máak de ke violartaʼabeniʼ. Yoʼolal leloʼ pʼáat maʼ kiʼimak in wóoliʼ yéetel tsaʼayten depresión. Pero le ka tin tsikbaltaj tiʼ juntúul in amigo le baʼax úuchtenoʼ tin wuʼuyaj sáalchaj in kuuch, pʼáaten tranquilail» (Elif, Turquía).

 Teksto jeʼel u yáantajeʼ: «Pʼateʼex tu kʼab Dios tuláakal le kuuch chiʼichnakkúuntikeʼexoʼ, tumen letiʼeʼ jach taak u yáantkeʼex» (1 Pedro 5:7).

 Baʼax u kʼáat u yaʼale: Dioseʼ ku yuʼubik le oraciónoʼob ka beetiktiʼoʼ (Salmo 55:22; 65:2). Letiʼeʼ jach u yaabiltmech yéetel u kʼáat ka a creerteʼ jach koʼoj a tojol.

 «In kʼaj óoltik Jéeobaeʼ letiʼe baʼax áanten utiaʼal in wuʼuyikinba maʼaloboʼ yéetel u kaʼa kiʼimaktal in wóol. In wojel xaneʼ kéen orarnakeneʼ jeʼel u páajtal in waʼaliktiʼ jach bix in wuʼuyikinbaeʼ tumen letiʼeʼ juntúul jach maʼalob amigo yéetel ku naʼatken» (Ana, Belice).

 Teksto jeʼel u yáantajeʼ: «[Jéeoba Dios] yaan a beetik justicia tiʼ le paalaloʼob minaʼan u papáʼoboʼ bey xan tiʼ le máaxoʼob ku beetaʼal u muʼyajoʼoboʼ, utiaʼal maʼ u seguer u sajakkúuntaʼaloʼob tumen le j-kʼeban máakoʼob yanoʼob way luʼumeʼ» (Salmo 10:18).

 Baʼax u kʼáat u yaʼale: Maʼ kun xáantaleʼ Dioseʼ yaan u xuʼulsik tiʼ le injusticiaʼoboʼ. Ichil lelaʼ táakaʼan u xuʼulul u maltratartaʼal le koʼoleloʼoboʼ.

 «Jach ku kiʼimakkúuntik in wóol yéetel ku tsʼáaikten jeetsʼelil in wojéeltik maʼ kun xáantaleʼ Dioseʼ yaan u beetik u xuʼulul u maltratartaʼal le koʼoleloʼoboʼ bey xan le mejen x-chʼúupalaloʼoboʼ» (Roberta, México).

 Utiaʼal a wojéeltik u maasil yoʼolal le esperanza ku yaʼalik le Biblia, yéetel bix k-áantik u maasil u kanoʼob le promesaʼob yaan teʼ Bibliaoʼ Kʼáat ka kaʼansaʼakech yéetel le Bibliaoʼ.

 Descargart wa imprimirt le xookaʼ.