1 Korinfliklarga 1:1-31
1 Allohning irodasi bilan Iso Masihning havoriysi*+ bo‘lishga da’vat etilgan Pavlusdan hamda birodarimiz Sostendan
2 Tangrining Korinfdagi+ jamoatiga. Iso Masihning izdoshlari sifatida muqaddas qilingan+ hamda barcha yerlarda Hazratimiz Iso Masihning ismini+ chaqirib yurganlar bilan birga muqaddas bo‘lishga da’vat etilgan sizlarga yozyapman:
3 Otamiz Xudoning va Hazratimiz Iso Masihning inoyati va tinchligi sizlarga yor bo‘lsin.
4 Tangrim sizlarga Iso Masih orqali inoyat ko‘rsatganini yodda tutib, sizlar uchun hamisha Unga shukrona aytaman.
5 Chunki Masih tufayli sizlar har narsada boyib ketib, Xudo kalomini va’z qilish qobiliyatiga hamda to‘la-to‘kis bilimga ega bo‘ldingizlar+.
6 Masih to‘g‘risidagi shahodat+ esa orangizda mustahkam o‘rnashdi.
7 Natijada Hazratimiz Iso Masihning oshkor bo‘lishini+ intizorlik bilan kutayotib, sizlar birorta in’omdan ham quruq qolmadingizlar.
8 Alloh ham sizlarni oxirigacha qo‘llab-quvvatlab turadi, toki sizlar Hazratimiz Iso Masihning kunida beayb bo‘linglar+.
9 Sizlarni O‘z O‘g‘liga, ya’ni Hazratimiz Iso Masihga sherik qilish uchun da’vat etgan Xudo esa O‘z so‘ziga sodiqdir+.
10 Xullas birodarlarim, Hazratimiz Iso Masihning ismi haqqi sizlarga nasihat qilaman: so‘zlaringizda uyg‘unlik bo‘lsin, orangizda bo‘linishlar yuz bermasin+, aksincha, bir o‘y, bir fikr orqali tamomila yakdil bo‘linglar+.
11 Gap shundaki birodarlarim, Xloisning xonadonidagilardan orangizdagi kelishmovchiliklar haqida xabar topdim.
12 Ya’ni shuni aytmoqchimanki, har biringiz: «Men Pavlusning shogirdiman», «Men esa Apollosning+ shogirdiman», «Men bo‘lsam Kifaning* shogirdiman», «Men esa Masihning shogirdiman»,— deyapsizlar ekan.
13 Demak, Masihning jamoati bo‘lingan ekan-da?! Sizlar uchun ustunga mixlangan Pavlusmidi? Yoki Pavlusning nomidan suvga cho‘mganmisizlar?
14 Xudoga shukurki, men Krisp+ va Gaydan+ boshqa sizlardan hech kimni suvga cho‘mdirganim yo‘q.
15 Shuning uchun mening nomimdan suvga cho‘mganiga hech kim da’vo qilolmaydi.
16 To‘g‘ri, Stefanusning xonadonidagilarni+ ham suvga cho‘mdirganman. Qolganlarga kelsak, yana kimni suvga cho‘mdirganimni eslolmayman.
17 Zero Masih meni suvga cho‘mdirish uchun emas, balki xushxabarni e’lon qilish uchun yuborgan+. U meni gapga usta bo‘lganim uchun emas, aksincha, uning azob ustunida* o‘lganligi ahamiyatsiz bo‘lib qolmasligi uchun yubordi.
18 Chunki azob ustuni haqidagi xabar halok bo‘layotganlar uchun nodonlikdir+, najot topadigan bizlar uchun esa Allohning qudratidan dalolatdir+.
19 Boisi, Muqaddas Yozuvlarda: «Donolarning donoligini yo‘qga chiqaraman, zukkolarning zakovatini inkor etaman»+,— deyilgan.
20 Ushbu zamonaning* donishmandlari qani? Olimlari* qani? Bahschilari qani? Xudo dunyoning donoligi nodonlik ekanini ko‘rsatmadimi?
21 Dunyo o‘zining hikmati+ orqali Xudoni tanib-bilmadi+. Xudo esa boshqalarning nazarida nodonlik hisoblangan+ va’zimiz orqali imonlilarni qutqardi. Ana shu Allohning hikmatidan dalolat beradi.
22 Yahudiylar mo‘jiza talab qilishadi+, yunonlar hikmat izlashadi.
23 Biz esa ustunga mixlangan Masih haqida va’z qilyapmiz. Bu yahudiylar uchun qoqintiradigan tosh, o‘zga xalqlar uchun nodonlikdir+.
24 Ammo da’vat etilgan yahudiylar-u yunonlar uchun Allohning qudrati-yu hikmati Masih orqali namoyon bo‘ldi+.
25 Chunki Xudoning nodonlik deb hisoblangan narsasi, odamlarnikidan ko‘ra hikmatliroqdir. Allohning kuchsizday bo‘lib ko‘ringan narsasi, insonlarnikiga qaraganda qudratliroqdir+.
26 Ey birodarlar, ko‘rib turganingizdek da’vat etilganlardan hammasi ham odamlarning nazarida na donishmand+, na qudratli, na asilzodadir+.
27 Alloh dunyoning donishmandlarini uyaltirish uchun, ularning nazarida nodon bo‘lganlarni tanladi va dunyoning kuchli kishilarini sharmanda qilish uchun, ularning nazarida zaif bo‘lganlarni tanladi+.
28 Tangri mavjud bo‘lganlarni yo‘q qilish uchun, dunyoda keraksiz deb hisoblangan, kamsitilgan va ahamiyatsiz bo‘lganlarni tanladi+.
29 Xudo hech bir kishi Uning oldida maqtanmasligi uchun shunday qildi.
30 Sizlar esa Alloh tufayli Iso Masihning izdoshlari bo‘ldingiz. Masih bizga Tangrining hikmatini namoyon qildi, to‘lov berib bizni xalos etdi+ hamda Allohning nazarida odil+ va muqaddas qildi+.
31 Bu Muqaddas Yozuvlardagi: «Maqtanayotgan kishi Yahova* bilan maqtansin»+,— degan so‘zlar ro‘yobga chiqishi uchun sodir bo‘ldi.