غلط‌فہمی:‏ کچھ لوگوں کا دعویٰ ہے کہ یسوع سیاہ‌فام ہوں گے کیونکہ مکاشفہ میں اُن کے بارے میں بتایا گیا ہے کہ ”‏[‏اُن]‏ کا سر اور بال اُون یا برف جیسے سفید تھے اور .‏.‏.‏ [‏اُن]‏ کے پاؤں بھٹے میں دمکتے پیتل کی مانند تھے ۔“‏—‏مکاشفہ 1:‏14، 15‏۔‏

 حقیقت:‏ مکاشفہ کو ”‏ نشانیوں کے ذریعے ظاہر“‏ کِیا گیا ہے۔ (‏مکاشفہ 1:‏1‏)‏ لہٰذا یسوع کے بالوں اور پاؤں کے بارے میں جو باتیں بتائی گئیں، وہ مجازی تھیں۔ اِن میں یہ ظاہر نہیں کِیا گیا کہ جب یسوع زمین پر تھے تو وہ کیسے دِکھتے تھے۔ اِس کی بجائے اِن میں یہ ظاہر کِیا گیا کہ جب خدا نے اُنہیں مُردوں میں سے زندہ کِیا تو اُن میں کون کون سی خوبیاں تھیں۔ لہٰذا جب مکاشفہ 1:‏14 میں کہا گیا کہ ”‏اُس کا سر اور اُس کے بال اُون اور برف کی طرح سفید تھے“‏ تو اُن کے بالوں کی بناوٹ کی نہیں بلکہ رنگ کی بات کی گئی تھی۔ اُن کے بالوں کے رنگ سے ظاہر ہوتا ہے کہ وہ بہت دانش‌مند ہیں کیونکہ وہ ایک لمبے عرصے سے موجود ہیں۔ (‏مکاشفہ 3:‏14‏)‏ ہم یہ کیسے جانتے ہیں کہ مکاشفہ میں اُن کی بالوں کی بناوٹ کی نہیں بلکہ رنگ کی بات کی گئی ہے؟ کیونکہ اُن کے بالوں کا موازنہ صرف اُون سے نہیں بلکہ برف سے بھی کِیا گیا ہے۔‏

 مکاشفہ کے مطابق یسوع کے پاؤں ”‏بھٹی میں تمتماتے ہوئے خالص تانبے کی طرح تھے۔“‏ (‏مکاشفہ 1:‏15‏)‏ اِس کے علاوہ اُن کا ”‏چہرہ پوری شدت سے چمکنے والے سورج کی طرح تھا۔“‏ (‏مکاشفہ 1:‏16‏)‏ چونکہ کسی بھی قوم یا رنگ‌ونسل سے تعلق رکھنے والے شخص کے چہرے کا رنگ سورج کی طرح نہیں ہو سکتا اِس لیے رُویا میں بتائی جانے والی باتیں مجازی تھیں جن میں یہ ظاہر کِیا گیا تھا کہ مُردوں میں سے زندہ ہونے پر یسوع ’‏ایسی روشنی میں رہنے لگے جہاں کوئی نہیں جا سکتا۔‘‏—‏1-‏تیمُتھیُس 6:‏16‏۔‏

 غلط‌فہمی:‏ یسوع مسیح کمزور اِنسان تھے۔‏

 حقیقت:‏ یسوع مسیح بہت ہی بہادر شخص تھے۔ مثال کے طور پر جب ہتھیاروں سے لیس بِھیڑ اُنہیں گِرفتار کرنے آئی تو اُنہوں نے بڑی دلیری سے اُنہیں بتایا کہ وہ وہی شخص ہیں جنہیں وہ ڈھونڈ رہے ہیں۔ (‏یوحنا 18:‏4-‏8‏)‏ یسوع مسیح جسمانی لحاظ سے کافی طاقت‌ور بھی ہوں گے کیونکہ وہ ایک بڑھئی تھے اور یقیناً اوزاروں کو اِستعمال کرنے کے لیے اُنہیں کافی طاقت لگانی پڑتی تھی۔—‏مرقس 6:‏3‏۔‏

 تو پھر یسوع مسیح کو اپنی سُولی اُٹھانے کے لیے کسی دوسرے کی مدد کی ضرورت کیوں پڑی؟ اور وہ اُن ڈاکوؤں سے پہلے کیوں فوت ہو گئے جنہیں اُن کے ساتھ ہی سُولی دی گئی تھی؟ (‏لُوقا 23:‏26؛‏ یوحنا 19:‏31-‏33‏)‏ دراصل سُولی پر موت سہنے سے پہلے ہی یسوع کے ساتھ کافی کچھ ہوا تھا جس کی وجہ سے وہ بہت تھک گئے تھے۔ وہ پوری رات سوئے نہیں تھے اور اِس کی ایک وجہ یہ تھی کہ وہ شدید پریشانی میں تھے۔ (‏لُوقا 22:‏42-‏44‏)‏ اُس رات یہودیوں نے اُن کے ساتھ بڑا بُرا سلوک کِیا اور صبح کو رومیوں نے اُنہیں بڑی بے‌رحمی سے مارا پیٹا۔ (‏متی 26:‏67، 68؛‏ یوحنا 19:‏1-‏3‏)‏ اِنہی باتوں کی وجہ سے اُن کی موت جلدی ہو گئی ہوگی۔‏