Тимотийға 1-хәт 2:1—15
2 Һәммидин авал, һәрқандақ адәмләр үчүн ялвурушларни, дуаларни, илтимасларни вә шүкүрләр ейтишни җекиләймән,
2 бизгә буниңдин кейинму хатирҗәм һәм теч һаятни Худаға болған пүтүнләй садиқлиқта, һәм җиддийлиқта өткүзүшимиз үчүн, падишалар вә барлиқ мәртивилик әмәлдарлар үчүн дуаларни қилиңлар.
3 Бу Қутқазғучимиз Худаниң алдида яхши һәм лайиқ иштур.
4 У һәрқандақ адәмләрниң қутқузулушини вә һәқиқәтниң тоғра билимигә келишини халайду.
5 Бир Худа һәм Худаниң вә адәмләрниң арисида бир васитичи бар, у — адәм Мәсиһ Әйса.
6 У өзини һәммиси үчүн мувапиқ төләмдәк бәрди, бу тоғрисида өз вақтида гувалиқ берилиши лазим.
7 Мошу гувалиқ паалийити үчүн мән вәзичи һәм әлчи — растини ейтиватимән, алдимаймән — һәқиқәт һәм етиқат ишида башқа хәлиқләрниң устази болуп қоюлдум.
8 Шуңа һәрқандақ җайда әр кишиләр талаш-тартишсиз, ғәзәпсиз, садақәтлиқтә қоллирини көтирип, дуа қилишини халаймән.
9 Шуниңдәк, аялларниңму алаһидә өрүлгән чачлири вә алтун, яки мәрвайит, яки тазиму қиммәт кийим-кечәкләр билән әмәс, бәлки өзлирини кичик пеиллиқ һәм әқилгә мувапиқ пакиз кийим билән зенәтлишини,
10 Пәрвәрдигарни һөрмәтләймән, дегән аялларға охшаш — яхши ишлири билән ясинишини халаймән.
11 Аял киши толуқ баш егиши билән үнсиз тәлим алсун.
12 Йә тәлим беришигә, йә әр кишиниң үстидин башқурушиға аял кишигә рухсәт бәрмәймән, әксичә, үнсиз болсун.
13 Чүнки авал Адәм ата, андин кейин Һава ана яритилған еди.
14 Адәм ата әмәс, бәлки аял киши пүтүнләй ялғанчилиққа берилип, қилмиш қилди.
15 Амма аял киши үчүн бала туғуш һимайә болиду, әгәр пәқәт етиқатта, меһир-муһәббәттә вә сағлам пикирлик муқәддәсликтә туруп қалса.
