Коринтлиқларға 1-хәт 11:1—34
11 Мән Мәсиһни үлгә тутқинимдәк, силәрму мени үлгә тутуңлар.
2 Барлиқ ишларда мени әскә елип, мән силәргә тапшурған дәстүрләрни мәккәм тутқанлиғиңлар үчүн, силәрни махтаймән.
3 Лекин һәрқандақ әр кишигә Мәсиһ — башчи, аял кишигә әр киши — башчи, Мәсиһкә болса Худа — Башчи екәнлигини билишиңларни халаймән.
4 Бешини йепип дуа қиливатқан яки бәшарәт ейтиватқан һәрқандақ әр киши, өз бешини шәрмәндә қилиду,
5 бешини япмай дуа қиливатқан яки бәшарәт ейтиватқан аял киши өз бешини* шәрмәндә қилиду, чүнки бу униң чечини қирип чүширивәткәнгә баравәр*.
6 Чүнки әгәр аял киши бешини япмиса, у чағда чечини қирип чүширивәтсун, лекин аял киши үчүн қисқа қирқилиш яки қирип чүширилиш шәрмәндилик болса, у чағда бешини япсун.
7 Әр киши бешини япмаслиғи керәк, чүнки у Худаға қияс қилинип яритилған еди вә у — Униң шәрипи, аял киши болса — әр кишиниң шәрипидур.
8 Әр киши аял кишидин әмәс, бәлки аял киши әр кишидин
9 вә шундақла әр киши аял киши үчүн яритилған әмәс, бәлки аял киши әр киши үчүндур.
10 Шу сәвәптин аял кишиниң бешида — пәриштиләр үчүн — ериға беқиниш бәлгүси болуши лазим.
11 Амма Һакимдар йолида аял киши әр кишисиз, әр киши аял кишисиз болмас.
12 Һәм аял киши әр кишидин пәйда болғинидәк, әр кишиму аял киши арқилиқ туғулди, амма барлиғини — Худа яратти.
13 Өзәңлар ойлинип көрүңлар: аял кишигә бешини япмай Худаға дуа қилиш тоғриму?
14 Тәбиәт өзи силәрни шуниңға үгәтмәмду, әгәр әр кишиниң чачлири узун болса, униң үчүн бу шәрмәндилик,
15 әгәр аял кишиниң чачлири узун болса, бу униң үчүн шан-шәрәп әмәсму? Чүнки чачлири униңға баш кийим орнида берилгән.
16 Әгәр кимду-бирси башқичә адәтни һимайә қилса, шуни билсунки, йә биздә, йә Худаниң җамаәтлиридә ундақ адәт йоқ.
17 Амма силәргә мошу нәсиһәтләрни бәргәч, силәрни махтимаймән, чүнки силәр яхши нәрсә үчүн әмәс, әксичә, яман нәрсә үчүн жиғилидикәнсиләр.
18 Һәммидин авал, шуни аңлидимки, силәр җамаәткә кәлгәндә, араңларда бөлүнүшләр болидикән һәм мән буниңға қисмән ишинимән.
19 Һалбуки, мақулланған адәмләр араңларда рошән болуши үчүн, араңларда мәзһәпләрму болуши керәк.
20 Силәр җәм болғиниңларда Һакимдарниң кәчки зияпитини йейиш мүмкин әмәс,
21 чүнки силәр зияпәтни башлаштин бурун өзәңларниң тамиғини йәветисиләр вә шундақ қилип, бирси ач, йәнә бирси мәс болуп қалидекән.
22 Йәп-ичишкә өйлириңлар йоқтиму? Яки силәр Худаниң җамаитини көзгә илмамсиләр вә йоқсулларни хиҗаләткә селиватмамсиләр? Силәргә немә десәм болар? Силәрни махтайму? Буниң үчүн махтимаймән.
23 Мән Һакимдаримдин силәргә тапшурған нәрсини алдим: Һакимдар Әйса униңға сатқунлуқ қилиш кечиси нанни елип,
24 шүкүр ейтип, уни уштуп мундақ деди: «Бу силәр үчүн берилидиған мениң тенимни билдүриду. Буни мени әсләш үчүн қилиңлар».
25 Шундақла зияпәт аяқлашқанда қачини елип: «Бу қача мениң қеним асасидики йеңи келишимни билдүриду. Мени әслигәч униңдин ичип, буни һәрқетим қилиңлар»,— деди.
26 Һәрқетим силәр бу нанни йәп һәм бу қачидин ичкәндә, Һакимдаримиз кәлмигичә униң өлүмини җакалаватисиләр.
27 Шуңа ким Һакимдарниң ненини йәп яки қачисидин һөрмәтсиз һалда ичсә, у кишидә Һакимдаримизниң тени һәм қени үчүн гуна болиду.
28 Инсан өзини тәкшүрәп, авал өзиниң лайиқ екәнлигигә көз йәткүзүп, шундин кейинла нандин йәп, қачидин ичсун.
29 Ким бу тәнниң немә екәнлигинини чүшәнмәй йәп-ичсә, у чағда у өзиниң әйивигә йәп-ичкән болиду.
30 Шуңлашқа араңлардин нурғунлири аҗиз һәм ағриқ вә көплири өлүм уйқисида ухлаватиду.
31 Лекин әгәр биз ким екәнлигимизни чүшәнгән болсақ, һөкүм қилинмиған болаттуқ.
32 Биз һөкүм қилиниватқинимиз — бу бизниң мошу дуния билән сотланмишимиз үчүн,— Йәһва бизни җазалаватқини.
33 Шуңа, қериндашлар, силәр мошу зияпәтни йейишкә жиғилғанда, бир-бириңларни күтүңлар.
34 Силәр жиғилип, өзәңларға җаза йәткүзмәс үчүн, әгәр ач болсаңлар, өйүңларда йәп келиңлар. Қалған ишларни барғинимда һәл қилимән.
