Аилиңизниң бәхитлик болуши үчүн бар күчиңизни салсиңизму, көңүл арамиңизни вәйран қилидиған вақиәләр йүз бериши мүмкин (Вәз 9:11). Қийинчилиқлар пәйда болғанда, Худа меһир-муһәббәт билән сизни қоллап-қувәтләйду. Бешиңизға қайғу-һәсрәт чүшкәндә, төвәндә кәлтүрүлгән Муқәддәс китаптики принциплар сизгә вә аилиңизгә ярдәм берәләйду.

МУҚӘДДӘС КИТАПТА НЕМӘ ЙЕЗИЛҒАН? «Пүткүл ғәм-тәшвишлириңларни Униңға тапшуруңлар, чүнки У силәргә ғәмхорлуқ қилмақта» (Петрусниң 1-хети 5:7). Бешиңизға кәлгән синақларға Худа сәвәпчи әмәслигини дайим есиңизда сақлаң (Яқуп 1:13). Худаға йеқинлишиң вә У сизгә чоқум ярдәм бериду (Йәшая 41:10). «Униң алдиға ич-бағриңларни төкүңлар» (Зәбур 62:8).

Шундақла, тәсәлли тепиш үчүн, Муқәддәс китапни һәр күни оқуп, тәтқиқ қилиң. Шу чағда Йәһва Худаниң «бизгә һәммә дәртлиримиздә тәсәлли бериватқанлиғини» һис қилисиз (Коринтлиқларға 2-хәт 1:3, 4; Римлиқларға 15:4). У сизгә «һәрқандақ ой-пикирдин үстүн туридиған Тәңриниң течлиғини» беришкә вәдә қиливатиду (Филипиликләргә 4:6, 7, 13).

ПАЙДИЛИҚ МӘСЛИҺӘТЛӘР

• Хатирҗәмликни вә сағлам пикирликни сақлашта өзүңизгә ярдәм беришини сорап, Алла Йәһваға дуа қилиң.

• Мәсилини һәл қилишниң һәрхил йоллирини қараштуруп чиқиң вә өзүңизгә мувапиқ болғинини таллавелиң.

МУҚӘДДӘС КИТАПТА НЕМӘ ЙЕЗИЛҒАН? «Йорутулғанниң қәлби билимгә еришмәктә; даналар болса, билимгә интилмәктә» (Пәнд-нәсиһәтләр 18:15). Муәмма тоғрилиқ кәңирәк чүшәнчигә егә болуш үчүн, униң тоғрилиқ көпирәк учур елиң. Аилиңизниң һәрбир әзаси һазир немигә муһтаҗ екәнлигини ениқлавелиң. Улар билән сөзлишип көрүң. Диққәт қоюп тиңшаң (Пәнд-нәсиһәтләр 20:5).

Йеқин адимиңиз көз жумғанда, немә қилиш керәк? Қайғу-һәсритиңизни көрситиштин уялмаң. Мошундақ вәзийәттә һәтта «Әйсаниң яшлири төкүлди» (Йоһан 11:35; Вәз 3:4). Шундақла йетәрлик дәриҗидә дәм елип, уйқиңизни қандуруң (Вәз 4:6). Бу сизгә қайғу-һәсрәткә тәқабил туруш үчүн күч-қувәт бериду.

ПАЙДИЛИҚ МӘСЛИҺӘТЛӘР

• Өй-ичиңиз билән иллиқ муамилә қилишқа адәтлиниң. Шу чағда бирәр қайғулуқ хадисә яки қийинчилиқлар пәйда болғанда, улар сизгә бемалал мураҗиәт қилалайду.

• Сизниңкигә охшаш қийинчилиқларни бешидин өткүзгәнләр билән сөһбәтлишип көрүң.

МУҚӘДДӘС КИТАПТА НЕМӘ ЙЕЗИЛҒАН? «Һәқиқий дост һәрдайим саңа муһәббәт көрситәр, һәқиқий қериндаш болса, яман күнүң үчүн дунияға кәлгәндур» (Пәнд-нәсиһәтләр 17:17). Достлириңиз сизгә ярдәм беришкә һәрқачан тәйяр болсиму, лекин қандақ ярдәм беришини билмәй қелиши мүмкин. Немигә муһтаҗ екәнлигиңизни уларға ейтишқа уялмаң (Пәнд-нәсиһәтләр 12:25). Шундақла, Муқәддәс китапни яхши чүшинидиғанларға мураҗиәт қилип, роһий мәдәт сораң. Уларниң Худаниң Сөзигә асасланған мәслиһәтлири сизгә җәзмән ярдәм берәләйду (Яқуп 5:14).

Худаға етиқади күчлүк болған һәм Униң вәдилиригә ишәнгәнләр билән арилишип, һаҗәтлик болған яр-йөләкни тапалайсиз. Илһамға муһтаҗ болғанларға ярдәм берип өзүңизму хелила тәсәлли алисиз. Улар билән Йәһваға вә Униң вәдилиригә болған ишәнчиңиз һәққидә сөзлишиң. Қийин шараитларға учрашқанларға қолуңиздин кәлгиничә ярдәм бериң һәм сизни яхши көридиған вә сизгә ғәмхорлуқ қилидиған адәмләрдин чәтнимәң (Пәнд-нәсиһәтләр 18:1; Коринтлиқларға 1-хәт 15:58).

ПАЙДИЛИҚ МӘСЛИҺӘТЛӘР

• Йеқин достуңиз билән сөзлишиң вә униң ярдимини рәт қилмаң.

• Немигә муһтаҗ екәнлигиңизни очуқ ейтиштин хиҗил болмаң.