1. Wanem samting i bagarapim stret bel bilong Pita?

 PITA i no inap lusim tingting long dispela taim em i lukim Jisas i lukluk long em. Olsem wanem? Em inap lukim olsem Jisas i bel hevi o i no amamas long em? Yumi no inap save; Baibel i tok tasol olsem “Bikpela i tanim na lukluk long Pita.” (Luk 22:61) Tasol taim Jisas i lukluk, Pita i luksave olsem em i bin mekim bikpela popaia tru. Em i save olsem em i bin mekim samting Jisas i bin tok profet long en, em samting Pita i bin tok strong olsem em i no inap mekim—em i givim baksait long Bikman em i laikim tru. Bel bilong Pita i bagarap stret, ating dispela em i wanpela taim nogut tru long laip bilong em.

2. Pita i kisim wanem skul? Olsem wanem stori bilong em bai helpim yumi?

² Tasol dispela i no makim olsem Pita i no inap senisim pasin bilong em. Pita i gat strongpela bilip, olsem na em inap stretim gen popaia bilong em na lainim wanpela bikpela lesen long Jisas. Em pasin bilong fogivim rong. Yumi olgeta i mas lainim dispela pasin, nau yumi ken skelim samting Pita i mekim long dispela taim nogut tru.

3, 4. (a) Pita i givim wanem askim long Jisas? Ating Pita i gat wanem tingting? (b) Jisas i mekim wanem bilong soim olsem pasin bilong planti man long dispela taim i stiaim Pita?

³ Klostu 6-pela mun paslain long dispela, long ples bilong em long Kaperneam, Pita i go long Jisas na askim em: “Bikpela, hamas taim brata bilong mi i ken mekim sin long mi na mi mas fogivim em? Ating inap 7-pela taim?” Ating Pita i ting em i mekim gutpela pasin. Bikos ol bikman bilong lotu long dispela taim i lainim ol man olsem ol i mas fogivim rong inap 3-pela taim tasol! Jisas i tok: “Mi tokim yu, i no 7-pela taim, nogat, yu mas mekim inap 77 taim.”​—Mat. 18:21, 22.

⁴ Yu ting tok bilong Jisas i makim olsem Pita i mas raitim hamas taim ol man i rongim em? Nogat; taim Jisas i senisim namba 7 em Pita i kolim i go long 77, em i laik tok pasin laikim i no gat mak bilong hamas taim man i mas fogivim narapela. (1 Kor. 13:4, 5) Planti man long dispela taim i gat hatpela pasin na pasin bilong tingim  rong, na Jisas i soim olsem dispela pasin i bin stiaim Pita na em i ting man i mas kaunim hamas taim em i fogivim narapela. Tasol God i laik bai man i redi oltaim long fogivim rong.​—Ritim  1 Jon 1:7-9.

5. Wanem taim yumi inap pilim tru dispela pasin bilong fogivim narapela?

⁵ Pita i no tok pait wantaim Jisas. Tasol olsem wanem? Em i pilim tru tok bilong Jisas? Taim yumi yet i luksave olsem yumi laik bai ol narapela i mas fogivim yumi, long dispela kain taim yumi bai pilim tru pasin bilong fogivim narapela. Orait nau yumi ken go bek na stori long ol samting i bin kamap paslain long indai bilong Jisas. Long dispela taim nogut, Pita i mekim planti popaia na Bikman bilong em i fogivim em.

6. Pita i mekim wanem taim Jisas i laik skulim ol aposel long pasin daun? Tasol Jisas i mekim wanem long Pita?

⁶ Em wanpela spesel nait—laspela nait bilong Jisas long i stap long graun. I gat planti samting i stap yet long Jisas i mas skulim ol aposel bilong em—olsem, long mekim pasin daun. Jisas i stap gutpela piksa taim em i wasim lek bilong ol, em wanpela wok ol wokboi nating i save mekim. Pastaim, Pita i tingting planti long samting Jisas i laik mekim. Bihain em i no laik bai Jisas i wasim lek bilong em. Tasol nau em i tokim Jisas long no ken wasim tasol lek bilong em, nogat, em i mas wasim tu han na het bilong em! Jisas i no les kwik long em, tasol long pasin isi em i stori long samting em i mekim na risen na dispela i bikpela samting.​—Jon 13:1-17.

7, 8. (a) Olsem wanem Pita i traim pasin bilong Jisas long i no les kwik? (b) Olsem wanem Jisas i wok yet long soim pasin bilong fogivim narapela?

⁷ Bihain liklik, Pita i traim pasin bilong Jisas long i no les kwik. Ol aposel i kirap tok pait long husat namel long ol i namba wan, na Pita tu i insait long dispela pasin bilong ol man long laik kisim biknem. Tasol Jisas i stretim ol long gutpela pasin na tok amamas long pasin ol i mekim; ol i bin stap gut long Bikman bilong ol. Tasol em i tok profet olsem olgeta bilong ol bai lusim em. Pita i tok em bai stap wantaim Jisas maski ol man inap kilim em i dai. Tasol Jisas i tok profet olsem, paslain long kakaruk i krai 2-pela taim long dispela nait, Pita bai tok inap 3-pela taim olsem em i no save long Bikman bilong em. Pita i tok em i no inap mekim olsem, na tu, em i tok em bai stap gut long Jisas winim ol narapela aposel!​—Mat. 26:31-35; Mak 14:27-31; Luk 22:24-28; Jon 13:36-38.

⁸ Yu ting Jisas bai les kwik long Pita? Nogat, long dispela taim bilong hevi, Jisas i wok yet long tingim ol gutpela pasin bilong ol aposel bilong em. Em i save Pita bai i no stap gut long em, tasol em i tok: “Mi beten strong bilong helpim yu bai bilip bilong yu i no ken pundaun. Na yu, taim yu kam bek, strongim ol brata bilong yu.”  (Luk 22:32) Jisas i soim olsem em i bilip long Pita bai kamap strong gen na kirap mekim wok bilong God. Em gutpela pasin tru bilong fogivim man!

9, 10. (a) Long gaden Getsemani, Pita i kisim wanem tok bilong stretim em? (b) Samting i painim Pita inap helpim yumi long tingim wanem samting?

⁹ Bihain, long gaden Getsemani, Jisas i mas stretim Pita planti taim. Jisas i tokim em, na tu, Jems na Jon, long was i stap taim Em i beten. Bel bilong Jisas i bagarap stret na em i nidim helpim, tasol Pita na ol narapela i wok yet long slip. Tok Jisas i mekim i soim olsem em i pilim hevi bilong ol na i fogivim ol, em i tok: “Tru tumas, bel bilong man i redi long mekim olgeta samting, tasol bodi i no gat strong.”​—Mak 14:32-41.

¹⁰ I no longtaim, bikpela lain man i kam, ol i holim ol bombom na ol bainat na stik. Nau em i taim bilong tingting gut na mekim samting. Tasol Pita i kirap kwik long mekim samting, em i kisim bainat na katim na rausim wanpela yau bilong Malkus, em wanpela wokboi bilong hetpris. Long pasin isi Jisas i stretim Pita, oraitim yau bilong wokboi, na i kamapim stiatok i soim olsem i no stret long pait, em dispela tok i stiaim ol disaipel bilong Jisas i kam inap long nau. (Mat. 26:47-55; Luk 22:47-51; Jon 18:10, 11) Pita i bin mekim planti popaia na Bikman bilong em i fogivim em. Stori bilong em i kirapim yumi long tingim olsem planti taim yumi save popaia. (Ritim Jems 3:2.) Husat bilong yumi i no nidim God long fogivim em long olgeta de? Long Pita yet, i gat sampela samting moa bai painim em long dispela nait. Na dispela i nogut moa.

11, 12. (a) Olsem wanem Pita i soim olsem em i gat strongpela bel bihain long ol man i arestim Jisas? (b) Olsem wanem Pita i soim olsem em yet i no inapim tok bilong em?

¹¹ Jisas i tokim bikpela lain man olsem sapos ol i kam bilong painim em, ol i mas larim ol aposel i go. Pita i lukluk tasol taim ol dispela man i holim Jisas. Bihain Pita i ranawe, ol narapela aposel tu i mekim olsem.

¹² Pita na Jon i ranawe na ating ol i go stop klostu long haus bilong hetpris bilong bipo, em Anas, em ples we ol man i kisim Jisas i go fes long en bilong sutim ol askim long em. Taim ol man i kisim Jisas i go long narapela hap, Pita na Jon i bihainim ol, tasol ol “i stap longwe liklik.” (Mat. 26:58; Jon 18:12, 13) Pita i no man bilong pret. I klia tru olsem em i gat strongpela bel long bihainim ol man i kisim Jisas. Ol dispela man i holim ol bainat na stik, na Pita i bin katim yau bilong wanpela bilong ol. Long dispela taim tu, yumi lukim Pita i no soim dispela gutpela pasin laikim olsem em yet i bin tok long en—redi long i dai wantaim Bikman bilong em sapos em i mas mekim olsem.​—Mak 14:31.

13. Wanem wanpela rot tasol bilong bihainim gut Krais?

 ¹³ Olsem Pita, planti man “i stap longwe liklik” taim ol i bihainim Krais—long pasin ol narapela i no inap lukim. Tasol bihain Pita yet i tok, wanpela rot tasol bilong bihainim gut Krais em yumi mas stap klostu tru long Em, bihainim pasin bilong Em long olgeta taim maski wanem samting i kamap.​—Ritim 1 Pita 2:21.

14. Pita i mekim wanem taim ol man i go kam na sutim tok long Jisas long dispela nait?

¹⁴ Pita i was gut na i bihainim ol man i kisim Jisas i go, na em i kamap long geit bilong wanpela bikpela haus long Jerusalem. Em haus bilong Kaiafas, em wanpela hetpris i gat planti mani na bikpela namba. Ol kain haus olsem i raunim ples bung, na i gat geit long fran. Pita i kamap long geit, tasol ol i no larim em i go insait. Jon, husat i save long hetpris, i stap insait pinis long banis na em i kam na tokim meri bilong was long geit long larim Pita i kam insait. I luk olsem Pita i no stap klostu long Jon; na em i no traim long i go insait long haus na sanap klostu long Bikman bilong em. Em i stap long ples bung insait long banis, we nait i kol so sampela sleiv na wokboi i hatim skin klostu long paia, na lukluk long ol man i go i kam na sutim tok giaman long Jisas long kot i kamap insait long haus.​—Mak 14:54-57; Jon 18:15, 16, 18.

15, 16. Stori long hau tok profet bilong Jisas olsem 3-pela taim Pita bai tok em i no save long em i bin kamap tru.

¹⁵ Paia i lait, na meri i bin larim Pita i kam insait long banis inap lukim gut Pita. Em i luksave long Pita. Em i sutim tok olsem: “Yu tu i bin stap wantaim dispela Jisas bilong Galili!” Pita i kirap nogut, na tok em i no save long Jisas—em i tok em i no kliagut long meri i toktok long wanem samting. Pita i go sanap klostu long geit, em i no laik bai ol man i luksave long em, tasol narapela meri i lukim em na i mekim wankain tok olsem: “Dispela man i bin stap wantaim Jisas dispela Nasarin.” Pita i mekim tok tru antap: “Mi no save long dispela man!” (Mat. 26:69-72; Mak 14:66-68) Ating bihain long dispela namba tu taim Pita i tok em i no save long Jisas, em i harim kakaruk i krai, tasol ol samting i pulim tingting bilong em na em i no tingim tok profet Jisas i bin mekim sampela aua tasol paslain.

¹⁶ Bihain liklik, Pita i mekim yet ol samting na bai ol man i no ken luksave long em. Tasol wanpela lain i sanap insait long ples bung, ol i kam. Wanpela bilong ol em i wanblut bilong Malkus, dispela sleiv Pita i bin katim yau bilong em. Em i tokim Pita: “Mi bin lukim yu i stap wantaim em long gaden, a?” Pita i laik kirapim ol long bilip olsem tok bilong ol i no stret. So em i tok tru antap, na tok bagarapim i ken painim em sapos em i giaman. Dispela em namba 3 taim Pita i tok em i no save long Jisas. Em mekim dispela tok na wantu kakaruk i krai—em namba 2 krai bilong kakaruk Pita i harim long dispela nait.​—Jon 18:26, 27; Mak 14:71, 72.

17, 18. (a) Pita i mekim wanem taim em i luksave olsem em i mekim bikpela popaia long Bikman bilong em? (b) Ating Pita inap kisim wanem kain tingting?

 ¹⁷ Nau tasol Jisas i kam ausait long veranda na lukluk i go daun long ples bung. Long dispela taim stret Jisas i lukluk long Pita, na Pita i lukim em, olsem yumi stori pinis long kirap bilong dispela sapta. Nau Pita i luksave olsem em i mekim bikpela popaia long Bikman bilong em. Pita i lusim ples bung, em i bel hevi tru long bel i kotim em. Em i wokabaut i go long ol rot bilong taun, mun i wok long i go daun na i givim lait long em. Aiwara i pulap long ai. Em i no inap lukim gut ol samting. Bel bilong em i bagarap stret na em i krai nogut tru.​—Mak 14:72; Luk 22:61, 62.

¹⁸ Bihain long man i mekim kain bikpela popaia olsem, em i isi tru long ting sin bilong em i bikpela tru na God i no inap fogivim em. Ating Pita inap ting olsem Jisas i no inap fogivim em. Yu ting Jisas inap fogivim em?

19. Pita i pilim olsem wanem long popaia bilong em? Hau na yumi save olsem em i no larim bel hevi i daunim em?

¹⁹ I hatwok long piksaim long tingting bikpela bel hevi Pita i pilim taim tulait i bruk na ol samting i kamap long dispela de. Ating em i kros long em yet taim Jisas i dai long dispela apinun bihain long em i karim bikpela pen inap planti aua. Pita i mas pilim nogut stret long tingim olsem em i mekim na bel hevi bilong Bikman i go bikpela moa long dispela laspela de bilong Em long i stap laip olsem man. Tasol maski bel hevi bilong Pita i bikpela tru, em i no larim bel hevi i daunim em olgeta. Yumi save long dispela, long wanem, Baibel i tok i no longtaim na em i bung gen wantaim ol narapela disaipel. (Luk 24:33) Ating olgeta aposel i bel hevi long pasin ol i bin mekim long dispela nait bilong bikpela hevi, na ol i mekim isi bel bilong narapela narapela.

20. Yumi inap kisim wanem skul long wanpela gutpela disisen bilong Pita?

²⁰ Nau yumi lukim olsem Pita i mekim wanpela gutpela disisen. Taim wanpela wokman bilong God i pundaun, maski em i mekim bikpela popaia, em i bikpela samting long em i tingting strong long kirap gen na stretim pasin bilong em. (Ritim Provep 24:16.) Pita i soim pasin bilong bilip tru taim em i bung wantaim ol narapela disaipel maski em i bel hevi. Taim bel hevi i daunim man, ating em i  gat laik long stap wanpis, tasol dispela inap bagarapim em. (Prov. 18:1) Em i savetingting long i stap klostu long ol wanbilip na kisim strong gen long mekim wok bilong God.​—Hib. 10:24, 25.

21. Pita i stap wantaim ol narapela disaipel bilong Jisas, olsem na em i harim wanem nius?

²¹ Pita i stap wantaim ol narapela disaipel bilong Jisas, olsem na em i kirap nogut long harim dispela toksave olsem bodi bilong Jisas i no stap moa long matmat. Pita na Jon i ran i go long matmat we ol man i bin putim Jisas na pasim dua bilong matmat. Jon, ating em i yangpela long Pita, em i kamap pastaim long matmat. Taim em i lukim dua bilong matmat i op i stap, em i gat tupela tingting. Tasol Pita i no olsem. Maski em i sotwin, em i go stret insait long matmat. Matmat i stap nating!​—Jon 20:3-9.

22. Wai na Pita i no bel hevi moa na em i no gat tupela tingting?

²² Olsem wanem? Pita i bilip olsem Jisas i kirap bek pinis? Pastaim Pita i no bilip, maski ol dispela bilipmeri i tok ol ensel i bin kam na tokim ol long Jisas i kirap bek pinis. (Luk 23:55–24:11) Tasol long apinun, Pita i no bel hevi moa na em i no gat tupela tingting. Jisas i stap laip, nau em i wanpela strongpela spirit! Em i kamap long olgeta aposel bilong em. Tasol pastaim em i kamap long Pita wanpela. Ol aposel i tok long dispela de olsem: “Tru tumas, Bikpela i kirap bek pinis na em i kamap long Saimon!” (Luk 24:34) Bihain, aposel Pol tu i stori long dispela narakain de em Jisas “i kamap long Sifas, na bihain em i kamap long ol 12-pela aposel.” (1 Kor. 15:5) Sifas na Saimon em ol narapela nem bilong Pita. Jisas i bin kamap long em long dispela de—long taim Pita i stap wanpis.

23. Bilong wanem ol Kristen long nau husat i mekim bikpela popaia i mas tingim stori bilong Pita?

²³ Baibel i no stori long wanem samting i kamap namel long Jisas na Pita taim ol i bung. Em samting i stap namel long Jisas na Pita. Yumi ken piksaim Pita i amamas long lukim Bikman em i laikim tumas i stap laip gen na rot i op long em i kamapim olsem em i sori na tanim bel. Em i gat bikpela laik tru long Jisas i mas fogivim em. Na yumi ken save olsem Jisas i fogivim em tru. Ol Kristen long nau husat i mekim sin, ol i mas tingim stori bilong Pita. Maski yumi mekim bikpela popaia, yumi no ken ting God i no inap fogivim yumi. Jisas i bihainim stret pasin bilong Papa bilong em, husat “bai fogivim” olgeta sin.​—Ais. 55:7.

24, 25. (a) Stori long samting i kamap long nait taim Pita i painim pis long Raunwara Galili. (b) Pita i mekim wanem taim Jisas i wokim mirakel long neks moning?

²⁴ Jisas i tokim ol aposel bilong em long i go long Galili we ol bai bungim em gen. Taim ol i kam kamap, Pita i go painim pis long  Raunwara Galili. Sampela narapela i go wantaim em. Pita i stap gen long dispela raunwara we bipo em i bin lusim bikpela hap taim long painim pis. Pairap bilong bot, nois bilong ol weiv i bruk, na strongpela umben long han bilong em, ating ol dispela samting i mekim isi bel bilong em. Tasol long dispela nait ol i no kisim wanpela pis.​—Mat. 26:32; Jon 21:1-3.

²⁵ Taim tulait i bruk, wanpela man i sanap long nambis na i tokim ol long tromoi umben bilong ol long narapela sait bilong bot. Ol i bihainim dispela tok na pulim planti pis tru inap 153! Pita i save long dispela man. Em i kalap long bot i go daun long wara na swim i go long nambis. Long nambis, Jisas i givim ol pis i kuk pinis long  paia long ol gutpela pren bilong em. Tingting bilong em i stap moa long Pita.​—Jon 21:4-14.

26, 27. (a) Jisas i givim rot long Pita 3-pela taim long mekim wanem? (b) Jisas i mekim wanem bilong soim olsem em i fogivim Pita?

²⁶ Jisas i askim Pita sapos em i laikim Bikman bilong em “winim ol dispela samting”—em i poin long ol dispela pis ol i bin pulim. Olsem wanem? Long bel bilong Pita, pasin bilong laikim wok bisnis bilong kisim pis bai pait wantaim pasin bilong laikim Jisas? Inap 3-pela taim Pita i bin tok em i no save long Bikman bilong em, na nau Jisas i givim rot long em long tokaut inap 3-pela taim long ai bilong ol pren bilong em, olsem em i laikim tru Jisas. Taim Pita i mekim olsem, Jisas i tokim em long rot bilong kamapim dispela pasin laikim: em i mas putim wok bilong God i stap namba wan samting long laip bilong em, givim kaikai, strongim, na lukautim ol sipsip bilong Krais, em ol gutpela disaipel bilong Em.​—Luk 22:32; Jon 21:15-17.

²⁷ Long dispela rot, Jisas i kamapim klia olsem Pita inap mekim yet gutpela wok bilong em na bilong Papa bilong em. Pita bai mekim bikpela wok insait long kongrigesen aninit long wok bos bilong Krais. Dispela i kamapim klia olsem Jisas i fogivim tru Pita! Tru tumas, Pita i pilim tru long bel dispela pasin marimari.

28. Pita i mekim wanem bilong inapim nem bilong em?

²⁸ Pita i stap gut long wok bilong em inap planti yia. Em i strongim ol narapela disaipel, olsem Jisas i bin tokim em long mekim long dispela nait Em i dai. Pita i mekim pasin helpim na pasin isi taim em i lukautim na givim kaikai long ol disaipel bilong Krais. Dispela man ol i kolim Saimon i inapim nem Jisas i givim long em—Pita, o Ston—em i no surik, em i stap strong, na mekim ol samting bilong helpim kongrigesen. Ol dispela samting i stap ples klia long tupela pas Pita i bin raitim na i stap long Baibel. Ol dispela pas i soim tu olsem Pita i no lusim tingting long skul em i kisim long Jisas long pasin bilong fogivim rong.​—Ritim 1 Pita 3:8, 9; 4:8.

29. Hau bai yumi bihainim bilip bilong Pita na pasin marimari bilong Bikman bilong em?

²⁹ Yumi tu i ken kisim skul long dispela pasin. Olsem wanem? Long olgeta de yumi save askim God long fogivim ol rong bilong yumi? Yumi amamas olsem God i fogivim yumi na yumi bilip long strong bilong em long mekim yumi kamap klin? Na yumi save fogivim ol narapela? Sapos yumi mekim olsem, bai yumi bihainim bilip bilong Pita—na pasin marimari bilong Bikman bilong em.