Banakristo basyoma kuti Jesu wakafwida zibi zyabantu. (1 Petro 3:18) Nokuba boobo, nzinji ziyandika kutegwa tukafwutuke kutali buyo kusyoma muli Jesu kuti ngo Mufwutuli. Madaimona alizyi kuti Jesu “Mwana wa Leza,” pele ayoonyonyoonwa, ikutali kufwutuka.—Luka 4:41; Juda 6.

•  Ncinzi ncondeelede kucita kutegwa ndikafwutuke?

•  Mbuti kujatikizya “Mupailo wa Sizibi”?

•  Ino “Mupailo wa Sizibi” wakazwa kuli?

•   Mweelede kusyoma kuti Jesu wakaaba buumi bwakwe akaambo kazibi zyesu. (Milimo 16:30, 31; 1 Johane 2:2) Eeci cilabikkilizya akusyoma kuti Jesu wakaliko ncobeni akuti zibalo zyoonse zyamu Bbaibbele izyaamba nguwe zililuzi.

•   Amwiiye cini ncoliyiisya Bbaibbele. (2 Timoteyo 3:15) Bbaibbele lyaamba kuti mwaapostolo Paulo a Sila bakaambila mulindizi wantolongo kuti: “Kosyoma Mwami Jesu, eelyo ulafwutulwa.” Mpoonya bakatalika kumuyiisya “jwi lya Jehova” a mulindizi wantolongo. (Milimo 16:31, 32) Eeci citondezya kuti kutegwa mulindizi wantolongo atalike kusyoma muli Jesu, wakeelede kusaanguna kumvwisya njiisyo zyantalisyo zili mu Jwi lya Leza. Wakali kuyandika luzyibo lwini-lwini luyeeme a Magwalo.—1 Timoteyo 2:3, 4.

•   Mweelede kweempwa. (Milimo 3:19) Icimbi, mweelede kweempwa naa kuusa, kujatikizya zintu zibi zyakali mumoyo wanu alimwi nzyomwakacita kaindi. Kweempwa kwanu kuyoolibonya kubantu mwaakuleka milimo mibi iimunyemya Leza, akucita “milimo yeendelana akweempwa” ooko.—Milimo 26:20.

•   Mweelede kubbapatizyigwa. (Matayo 28:19) Jesu wakaamba kuti aabo ibayanda kuba basikwiiya bakwe beelede kubbapatizyigwa. Mulindizi wantolongo iwaambidwe kale wakabbapatizyigwa. (Milimo 16:33) Mbubwenya buyo, mwaapostolo Petro naakamana kuyiisya nkamu mpati yabantu kasimpe kajatikizya Jesu, “aabo ibakatambula majwi aakwe camoyo woonse bakabbapatizyigwa.”—Milimo 2:40, 41.

•   Mweelede kutobela malailile aa Jesu. (Bahebrayo 5:9) Aabo ‘ibatobela zintu zyoonse’ Jesu nzyaakalailila balatondezya oobo kwiinda muzintu nzyobacita mubuumi kuti mbaasikumutobela. (Matayo 28:20) Baba “basikucita caamba jwi lya Leza, ikutali basikumvwa buyo pe.”—Jakobo 1:22.

•   Mweelede kuliyumya kusikila kumamanino. (Marko 13:13) Basikwiiya ba Jesu ‘bayandika kuliyumya’ kutegwa bakafwutuke. (Bahebrayo 10:36) Mucikozyanyo, mwaapostolo Paulo wakazumanana kutobela njiisyo zya Jesu cakumaninina akusyomeka kuli Leza, alimwi wakaliyumya kuzwa buzuba mbwaakaba Munakristo kusikila naakafwa.—1 Bakorinto 9:27.

 Muzikombelo zimwi bantu balapaila mipailo mbuli yakuti “Mupailo wa Sizibi” awakuti “Mupailo Walufwutuko.” Mubwini, aabo ibapaila boobo balazumina kuti mbaasizibi akusyoma kuti Jesu wakafwida zibi zyabo. Kunze lyaboobo, balamulomba Jesu kuti anjile mumoyo wabo naa buumi bwabo. Pele Bbaibbele kunyina mpolyaamba naa kukulwaizya kupaila “Mupailo wa Sizibi” wakwiinzya buyo mulawo.

 Bantu bamwi bayeeya kuti muntu amana kupaila “Mupailo wa Sizibi,” ncisinizyo cakuti uyoofwutuka. Pele kunyina muntu uuyoofwutuka akaambo buyo kakuti ulapaila. Mbotuli bantu batalondokede, lyoonse tulabisya. (1 Johane 1:8) Nkakaambo kaako Jesu ncaakayiisya basikumutobela kupaila lyoonse kulomba kulekelelwa zibi. (Luka 11:2, 4) Kuyungizya waawo, Banakristo bamwi ibakali munzila iitola kulufwutuko bakasweekelwa coolwe eeco akaambo kakuti bakaleya naa bakaleka kubelekela Leza.—Bahebrayo 6:4-6; 2 Petro 2:20, 21.

 Basyaazibwene mumakani aakaindi balakazyanya kujatikizya mbowakatalika “Mupailo wa Sizibi.” Bamwi baamba kuti cilengwa eeci cakatalika ciindi ca Zikombelo zyaci Protesitanti. Bamwi basyoma kuti bantu bakatalika kupaila “Mupailo wa Sizibi” ciindi nokwakali kubambwa zikombelo zipya kuma 1700 a 1800. Kufwumbwa naa cili buti, cilengwa eeci kunyina mpocikulwaizyigwa mu Magwalo, mubwini cilakazyanya ancoliyiisya Bbaibbele.