1 Johane 2:1-29
2 Nobana bangu bayandwa, ndimulembela zintu eezyi kutegwa mutabisyi. Pele, ikuti umwi wabisya, tulijisi mugwasyi* kuli Taata, Jesu Kristo,+ imululami.+
2 Alimwi walo ncipaizyo cakumanya zibi zyesu+ akutuyanzanya a Leza, pele ikutali buyo zyesu zilikke, pele azyanyika yoonse.+
3 Lino oobu mbombubo mbotuzyiba kuti tulimuzyi kabotu, ikuti naa twazumanana kubamba milawo yakwe.
4 Ooyo waamba kuti, “Ndilimuzyi kabotu,” nokuba boobo tabambi milawo yakwe, mubeji alimwi kasimpe takako pe mumuntu ooyo.
5 Pele kufwumbwa muntu uubamba jwi lyakwe, luyando ndwajisi muntu ooyo kuli Leza lwalondolwa ncobeni.+ Oobu mbotuzyiba kuti tulikamantene anguwe.+
6 Ooyo waamba kuti lyoonse ulikamantene anguwe weelede kuzumanana kweenda mbubonya mbwaakeenda walo.+
7 Nobayandwa, tandimulembeli mulawo mupya pe, pele mulawo wakaindi ooyo ngomwajisi kuzwa kumatalikilo.+ Imulawo wakaindi ooyu ndijwi eelyo ndimwakamvwa.
8 Pele lino ndimulembela mulawo mupya, iwamasimpe kujatikizya nguwe alimwi andinywe, nkaambo mudima uyaabumana eelyo mumuni wini-wini watalika kale kumweka.+
9 Ooyo waamba kuti uli mumumuni pele kwamana boobo kasulaika+ munyina, ucili mumudima.+
10 Ooyo uuyanda munyina ulazumanana kuba mumumuni,+ alimwi mulinguwe munyina cilebyo.
11 Pele ooyo uusulaika munyina uli mumudima alimwi weenda mumudima,+ alimwi takuzyi pe nkwaya+ nkaambo mudima woofwaazya meso aakwe.
12 Ndilembela ndinywe, nobana bangu bayandwa, nkaambo mwalekelelwa zibi zyanu akaambo kazina lyakwe.+
13 Ndilembela ndinywe nomatata, nkaambo mulimuzyi kabotu ooyo uuliko kuzwa kumatalikilo. Ndilembela ndinywe nobalombwana, nkaambo mwamuzunda ooyo imubi.+ Ndilembela ndinywe nobana baniini, nkaambo mulimuzyi kabotu Taata.+
14 Ndilembela ndinywe nomatata, nkaambo mulimuzyi kabotu ooyo uuliko kuzwa kumatalikilo. Ndilembela ndinywe nobalombwana, nkaambo muli bayumu+ alimwi jwi lya Leza molili mulindinywe ciindi coonse+ alimwi mwamuzunda ooyo imubi.+
15 Mutayandi nyika noziba zintu zili munyika.+ Ikuti naa muntu kayanda nyika, nkokuti iluyando lwa Taata taluko pe mulinguwe;+
16 nkaambo zintu zyoonse zili munyika—zisusi zyanyama+ alimwi azisusi zyameso+ amambonwa akaambo kazintu nzyajisi muntu*—tazizwi kuli Taata pe, pele zizwa munyika.
17 Kunze lyaboobo, inyika ilamana antoomwe azisusi zyanjiyo,+ pele ooyo uucita kuyanda kwa Leza unooliko lyoonse mane kukabe kutamani.+
18 Nobana baniini, ecino nciindi camamanino, alimwi mbubonya mbomwakamvwa kuti sikulwana Kristo ulaboola,+ noliba lino kuli basikulwana Kristo banji ibalibonya kale,+ eeco cituzyibya kuti ecino nciindi camamanino.
19 Bakazwa akati kesu, pele tiibakali bamwi besu;*+ nkaambo ikuti nobakali bamwi besu, nobakazumanana kuba andiswe. Pele bakazwa ikutegwa kulibonye caantangalala kuti tabali boonse pe ibategwa mbamwi besu.+
20 Alimwi nywebo mwakananikwa kuli yooyo uusalala+ alimwi nyoonse mulaaluzyibo.
21 Tandimulembeli boobu akaambo kakuti tamukazyi kasimpe pe,+ pele nkaambo mulikazyi, alimwi nkaambo kunyina bubeji buzwa mukasimpe.+
22 Ino nguni mubeji kunze lyayooyo uukaka kuti Jesu ngu Kristo?+ Ooyu ngonguwe sikulwana Kristo,+ ooyo uukaka Taata alimwi a Mwana.
23 Muntu uuli woonse uukaka Mwana tamujisi awalo Taata.+ Pele kufwumbwa muntu uuzumina Mwana+ ulimujisi awalo Taata.+
24 Lino nywebo, eeco ncomwakamvwa kumatalikilo ceelede kuzumanana mulindinywe.+ Ikuti naa eeco ncomwakamvwa kumatalikilo cazumanana mulindinywe, nkokuti alimwi munookamantene a Mwana alimwi a Taata.
25 Kunze lyaboobo, eeci ncecintu ncaakatusyomezya walo mwini, ibuumi butamani.+
26 Ndimulembela zintu eezyi kujatikizya baabo ibasola kumweena.
27 Lino nywebo, ikunanikwa nkomwakatambula kuzwa kulinguwe+ kulazumanana mulindinywe, alimwi tamuyandiki muntu uuli woonse wakumuyiisya; pele kunanikwa ooku ikuzwa kulinguwe nkokumuyiisya zintu zyoonse,+ alimwi nkwamasimpe, takuli kwakubeja pe. Mbubonya mbokwamuyiisya, amuzumanane kukamantana anguwe.+
28 Aboobo nobana bangu bayandwa, amuzumanane kukamantana anguwe ikutegwa aakuyubununwa tukacikonzye kwaamba cakutayoowa,+ tutakausyigwi nsoni akuzwa kulinguwe kuciindi cakubako kwakwe.
29 Ikuti naa kamuzyi kuti uliluleme, nkokuti mulizyi kuti muntu woonse uucita bululami wakazyalwa kuzwa kulinguwe.+
Bupanduluzi buyungizyidwe
^ Naa “sikutwiiminina.”
^ Naa “akulikankaizya akaambo kazintu nzyajisi muntu.”
^ Naa “tiibakali kuzulilwa kulindiswe.”
