Inzya, akaambo kakuti Leza uyanda kuti bantu kabaswaangana kutegwa bakombe. Bbaibbele lyaamba kuti: “Katubikkilana maano ikutegwa tuyumizyanye kutondezya luyando akucita milimo mibotu, tutanooleki kuswaangana antoomwe.”​—Bahebrayo 10:24, 25, bupanduluzi buyungizyidwe.

 Jesu wakatondezya kuti basikumutobela bayoobamba mbunga iikamantene naakaamba kuti: “Eeci nceciyoozyibya bantu boonse kuti muli basikwiiya bangu, ikuti kamujisi luyando akati kanu.” (Johane 13:35) Kutondezya luyando oolu, basikwiiya ba Kristo bakeelede kunooswaangana abakombinyina. Bakali kuyooba mumbungano mwalo mobakali kunooswaangana lyoonse kutegwa bakombe. (1 Bakorinto 16:19) Antoomwe, bakali kuyooba ciinga cabakwesu canyika yoonse.​—1 Petro 2:​17.

Nzinji ziyandika kunze buyo aakuzulilwa kucikombelo cimwi

 Nokuba kuti Bbaibbele litondezya kuti bantu beelede kuswaangana kutegwa baiye zya Leza, taliyiisyi kuti muntu ulakonzya kumukkomanisya Leza kwiinda mukuzulilwa kucikombelo cimwi. Kutegwa cikkomaninwe a Leza, cikombelo nkwaunka muntu ceelede kubujatikizya buumi bwakwe abuzuba. Mucikozyanyo, Bbaibbele lyaamba kuti: “Ibukombi busalala alimwi butasofweede mumeso aa Leza wesu alimwi Taata mboobu: ikulanganya bamucaala abamukabafwu mumapenzi aabo, alimwi akulibamba katutakwe kabala kali koonse kamunyika.”​—Jakobo 1:​27.