1 Bakorinto 16:1-24
16 Lino kujatikizya makani aakuyobolola mali aakugwasya basalali,+ amutobele malailile ngondakapa mbungano zyaku Galatiya.
2 Mubuzuba bwakusaanguna bwansondo imwi aimwi, umwi aumwi wanu abikke cimwi cintu ambali kweelana anzyajisi, kutegwa kutakabi kuyobolola mali ndaakusika.
3 Pele ndaakusika ooko, ndiyootuma baalumi mbomuyoozuminizya mumagwalo aanu+ ikutola cipego canu caluse ku Jerusalemu.
4 Pele ikuti kakuyandika kuti andime ndikaunke, tuyakuunka limwi.
5 Pele ndiyooboola kulindinywe ndaakuzwa ku Makedoniya, nkaambo ndiyakwiinda ku Makedoniya;+
6 alimwi ambweni ndiyookkala-kkala andinywe naa mane kusikila mupeyo ukamane, kutegwa mukandisindikile musinzo uuli mboubede ooko nkondiyakuunka.
7 Nkaambo tandiyandi kumubona lino kwakaindi kaniini buyo nendiinda, nkaambo ndiyanda kuyookkala andinywe kwaciindi cili mbocibede,+ ikuti naa Jehova* wazumizya.
8 Pele ndilakkala mu Efeso+ kusikila ciindi ca Pobwe lya Pentekoste,
9 nkaambo ndajaludwa mulyango mupati uutola kumulimo,+ pele kuli basikukazya banji.
10 Lino ikuti naa Timoteyo+ asike, amubone kuti mwamubamba kabotu kutegwa atayoowi anooli akati kanu, nkaambo ubeleka mulimo wa Jehova*+ mbubonya mbuli ndime.
11 Aboobo kutabi muntu uumunyansya pe. Amumusindikile muluumuno, kutegwa aboole kulindime, nkaambo ndilamulindila antoomwe abakwesu.
12 Lino kujatikizya mukwesu Apolo,+ ndakamukombelezya kapati kuti aboole ooko kulindinywe antoomwe abakwesu. Tanaakayanda pe kuti aboole lino, pele uyooboola aakuba aciindi.
13 Amupakamane,+ amwiime nji mulusyomo,+ amuzumanane kucita mbuli baalumi,*+ amuyume.+
14 Amucite zintu zyoonse caluyando.+
15 Lino bakwesu ndimukulwaizya kuti: Mulizyi kuti baŋanda ya Sitefana njemicelo mitaanzi yaku Akaya akuti bakalyaaba beni kukutaukila basalali.
16 Andinywe amuzumanane kulibombya kubantu bali boobo alimwi akuli boonse bamusangana akubeleka canguzu mumulimo.+
17 Pele ndilikkomene akaambo kakubako kwa Sitefana,+ Fortunato alimwi a Akayiko, nkaambo banjila mubusena bwanu.
18 Nkaambo batontozya muuya wangu alimwi awanu. Aboobo amubalemeke bantu bali boobo.
19 Imbungano zyaku Asiya zyamwaanzya. Akula a Purisika antoomwe ambungano iiswaanganina muŋanda yabo+ bamwaanzya kapati mu Mwami.
20 Bakwesu boonse bamwaanzya. Kamwaanzyanya akumyontana kusalala.
21 Mebo nde Paulo, ndamulembela mooni wangu ooyu ajanza lyangu ndemwini.
22 Ikuti muntu katamuyandi Mwami, asinganizyigwe. O Mwami wesu, koboola!
23 Iluzyalo lwa Mwami Jesu alube andinywe.
24 Luyando lwangu alube andinywe nyoonse nomukamantene a Kristo Jesu.
Bupanduluzi buyungizyidwe
^ Amubone Makani Aayungizyidwe A5.
^ Amubone Makani Aayungizyidwe A5.
^ Naa “amube basicamba.”
