Moganetsakeresete ga se motho a le mongwe fela kgotsa mokgatlho mongwe ka gonne Baebele ya re go na le “baganetsakeresete ba le bantsi.” (1 Johane 2:18) Go na le moo, lefoko “moganetsakeresete” le ranotswe go tswa mo lefokong la Segerika le le kayang “go nna kgatlhanong le (kgotsa mo boemong jwa ga) Keresete,” le kaya mongwe le mongwe yo o dirang dilo tse di latelang:

• Ga a dumele gore Jesu ke Keresete (Mesia) kgotsa gore ke Morwa Modimo.—1 Johane 2:22.

• O kgatlhanong le Keresete, Motlodiwa wa Modimo.—Pesalema 2:1, 2; Luke 11:23.

• O itira Keresete.—Mathaio 24:24.

• O bogisa balatedi ba ga Keresete, e re ka Jesu a tsaya motho yo o bogisang batho ba gagwe a mmogisa le ene.—Ditiro 9:5.

• O iphaka gore ke Mokeresete mme ka fa letlhakoreng le lengwe a dira ditiro tsa tlolomolao kgotsa a tsietsa.—Mathaio 7:22, 23; 2 Bakorintha 11:13.

Baebele ga e tlhalose fela gore batho ba ba dirang dilo tseno ba bontsha gore ba ganetsa Keresete, gape e ba bitsa botlhe e re ke “baganetsakeresete.” (2 Johane 7) Baganetsakeresete ba ile ba simolola go nna gone fa e sa le ka motlha wa baaposetoloi go tla go fitlha le gompieno. Baebele e ile ya bolelelapele gore ba tla nna gone.—1 Johane 4:3.

• Ba ruta maaka ka Jesu. (Mathaio 24:9, 11) Ka sekai, batho ba ba rutang thuto ya Tharonngwe kgotsa ba ba rutang gore Jesu ke Modimo Mothatayotlhe, tota ba ganetsana le se Jesu a neng a se bua fa a ne a re: “Rara o mogolo bogolo go nna.”—Johane 14:28.

• Baganetsakeresete ga ba dumele se Jesu a neng a se bua malebana le kafa Bogosi Jwa Modimo bo dirang ka gone. Ka sekai, baeteledipele bangwe ba dikereke ba re Keresete o dirisa dipuso tsa batho go diragatsa maikaelelo a gagwe. Le fa go ntse jalo, seno ga se dumalane le se Jesu a neng a se bua fa a ne a re: “Bogosi jwa me ga se karolo ya lefatshe leno.”—Johane 18:36.

• Ba re Jesu ke Morena wa bone mme ga ba ikobele ditaelo tsa gagwe go akaretsa le taelo ya gore ba rere dikgang tse di molemo tsa Bogosi.—Mathaio 28:19, 20; Luke 6:46; Ditiro 10:42.