LEHONA 4
Ko Ai Iehu Keliho?
1. Na kamata vēhea te olaga o Iehu?
He ā nā uiga o Iehu e faigofie ai ke fakalatalata atu ki ei?—MATAIO 11:29; MALEKO 10:13-16.
E hē vē ko iē tahi tino, ko Iehu na ola i te lagi ko he tino agaga ka ko heki fānau mai ia i luga o te lalolagi. (Ioane 8:23) Na kavea ia ma foafoaga muamua a te Atua, ma na fehoahoani ia i te fai o iē tahi mea. Kua na ko ia te na faia hako e Ieova ma ko teia kua tonu ai te taku ko ia ko te Ataliki “tokatahi” o te Atua. (Ioane 1:14) Na kaukauna Iehu ko te Hui Vagana o te Atua, kua takua ko ia ko “te Kupu.”—Faitau te Fataoto 8:22, 23, 30; Kolohe 1:15, 16.
2. Aiheā na hau ai Iehu ki te lalolagi?
Na uga mai e te Atua tona Ataliki ki te lalolagi e ala i te fakaliliu tona ola mai te lagi ki te manava o te taupou Iutaia e igoa ki a Malia. Teia lā ko Iehu e hēai hona tamana fakatetagata. (Luka 1:30-35) Na hau Iehu ki te lalolagi ke (1) akoako te kupu moni e uiga ki te Atua, (2) tuku mai te fakatakitakiga i te auala e fai ai te finagalo o te Atua e tuha lava pe faigatā o tatou tulaga, ma (3) fōki mai tona ola lelei katoatoa ke fai ma “togiola.”—Faitau te Mataio 20:28.
3. Aiheā e manakomia ai e ki tatou te togiola?
Ko te togiola ko he tau e totogi ke fakahaoloto ai he tino mai te fakamataku o te oti. (Ehoto 21:29, 30) Ko te ola matua ma te oti nae hē ko he vaega tēnā o te fakamoemoe a te Atua mo nā tino uma. E iloa vēhea e ki tatou? Na taku e te Atua ki te tamāloa muamua, ko Atamu, e oti ia kāfai e fai e ia te mea e taku mai e te Tuhi Paia ko te “agahala.” Teia lā kana hē agahala ia Atamu, vēnei ake na heki oti. (Kenehe 2:16, 17; 5:5) E tuha ai ma te Tuhi Paia, na “ulu” mai te oti ki te lolalagi o nā tino uma kui mai ia Atamu. Teia lā, kua pēhi mai te fānau a Atamu i te agahala ma ko te fakahalaga ko te oti. E manakomia e ki tatou he togiola ke fakahaoloto ai ki tatou mai te fakahalaga oti teia na tuku fakaholo mai ia Atamu.—Faitau te Loma 5:12; 6:23.
Ko ai e mafai oi totogi te togiola ke haoloto mai ai ki tatou mai te oti? Kāfai ki tatou e feoti, kua totogi a tatou hala mo a tatou agahala. E hē mafai e he tino hē lelei katoatoa oi totogi nā agahala a iē tahi.—Faitau te Halamo 49:7-9.
4. Aiheā na oti ai ia Iehu?
E hē tutuha ma ki tatou, nae lelei katoatoa ia Iehu. Teia lā na heki tatau ke oti ai Iehu mo ni ana agahala auā na heki agahala. I lo teia, na oti ia Iehu mo nā agahala a iē tahi tino. Na fakailoa atu e te Atua tona alofa uiga kehe mo nā tino uma i te uga mai o tona Ataliki ke oti mo ki tatou. Na fakaalia foki e Iehu tona alofa mo ki tatou i te uhitaki ki tona Tamana ma kaumai tona ola ke totogi ai a tatou agahala.—Faitau te Ioane 3:16; Loma 5:18, 19.
Matamata ki te vitiō Aiheā Na Maliu ai ia Iehu?
5. He ā ta Iehu e fai i te taimi nei?
Ka koi luga o te lalolagi, na fakamalōlō e Iehu na tauale, toe fakatutū nā tino oti, ma fakahao mai nā tino i nā puapuaga. Na fakahino mai e ia te mea ka fai e ia i te lumanaki mo nā tino uma e uhiuhitaki. (Mataio 15:30, 31; Ioane 5:28) Mulimuli ake i te oti o Iehu, na toe fakafoki ia e te Atua ki te ola ko he tino agaga. (1 Petelu 3:18) Na fakatalitali Iehu i te itu taumatau o te Atua ke pa ki te taimi e kavatu ai ki ei e Ieova te malohi ke pule ai ko ia he Tupu i luga o te lalolagi uma. (Epelu 10:12, 13) Nei la kua nofo Tupu Iehu i te lagi, ko ona hoko foki ka fakahilahila atu te tala lelei ki te lalolagi uma.—Faitau te Tanielu 7:13, 14; Mataio 24:14.
Kua toeitiiti, fakaaogā e Iehu tona malohi i te kavea ma Tupu ke kaumai ai te ikuga ki na puapuaga uma ma ki latou na mafua ai. Ko ki latou uma e fakatuatua ma uhiuhitaki ki a Iehu ka maua te ola i he lalolagi palataiho.—Faitau te Halamo 37:9-11.