Faamaumauga a Ioane 3:1-36
3 E iai se tagata o le ʻau Faresaio e igoa iā Nikotemo,+ o ia o se taʻitaʻi Iutaia.
2 Ua sau o ia iā Iesu i le pō+ ma faapea mai: “Le Aʻoaʻo e,*+ ua matou iloa o oe o le faiaʻoga, e te sau mai i le Atua. Auā e leai se tasi e mafai ona faia nei faailoga+ ua e faia, seʻi vaganā ua faatasi le Atua ma ia.”+
3 Ona tali atu lea o Iesu iā te ia: “E moni, e moni, ou te fai atu iā te oe, afai e lē toe fanau mai*+ se tasi, e lē mafai ona ia iloa le Malo o le Atua.”+
4 Ona faapea mai lea o Nikotemo iā te ia: “E faapefea ona toe fanau mai se tagata ua toeaina? E mafai ea ona toe ofi o ia i le manava o lona tinā, ma toe fanau mai ai?”
5 Ua tali atu Iesu: “E moni, e moni, ou te fai atu iā te oe, afai e lē toe fanau mai se tasi i le vai+ ma le agaga,+ e lē ulu atu o ia i le Malo o le Atua.
6 O lē ua fanau mai i le tino, o le tino lea. A o lē ua fanau mai i le agaga, o le agaga lea.
7 Aua e te ofo i loʻu fai atu: E tatau ona toe fanau mai outou.
8 E agi le matagi i le itulagi e manaʻo i ai, ma e te faalogo atu o agi, ae e te lē iloa le itulagi o loo sau ai ma agaʻi atu i ai. E faapena foʻi i latou uma o ē e fananau i le agaga.”+
9 Ona tali mai lea o Nikotemo iā te ia: “E faapefea ona tutupu nei mea?”
10 Ua tali atu Iesu: “O oe o le faiaʻoga o Isaraelu, ae e te lē iloa ea nei mea?
11 E moni, e moni, ou te fai atu iā te oe, ua matou iloa mea ua matou tautatala ai, ma molimau foʻi i mea ua matou vāai i ai, ae e tou te lē taliaina la matou molimau.
12 Pe afai ua ou taʻu atu iā te outou mea a le lalolagi ae tou te lē talitonu i ai, e faapefea la ona outou talitonu, pe a ou taʻu atu iā te outou mea o i le lagi?
13 E leai foʻi se tasi na alu aʻe i le lagi,+ e na o lē na alu ifo mai i le lagi,+ o le Atalii lea o le tagata.
14 E pei ona siitia i luga e Mose o le gata i le toafa,+ e faapena foʻi ona tatau ona siitia i luga le Atalii o le tagata,+
15 ina ia maua ai e tagata uma e talitonu iā te ia le ola e faavavau.+
16 “Ona o le alofa tele o le Atua i le lalolagi, na ia foaʻi mai ai lona Atalii e toʻatasi,+ ina ia lē fano tagata uma e faatuatua iā te ia, ae ia maua le ola e faavavau.+
17 Auā e leʻi auina mai e le Atua lona Atalii ina ia faamasinoina le lalolagi, ae ina ia faaolaina le lalolagi e ala iā te ia.+
18 E lē faamasinoina se tasi e faatuatua iā te ia.+ Ae e faamasinoina le tagata e lē faatuatua iā te ia, auā ua lē faatuatua o ia i le igoa o le Atalii e toʻatasi o le Atua.+
19 O le mea lea ua faamasinoina ai le lalolagi, auā ua oo mai le malamalama i le lalolagi,+ ae ua naunau tagata i le pōuliuli nai lo o le malamalama, auā e leaga a latou amio.
20 E ʻinoʻino i le malamalama lē ua faia mea e sili ona leaga, e lē sau foʻi o ia i le malamalama, neʻi aʻoaʻia o ia ona o* lana amio.
21 Ae e sau i le malamalama+ lē e faia le mea tonu, ina ia iloa ai ua ōgatusa lana amio ma le finagalo o le Atua.”
22 Mulimuli ane, ona ō atu ai lea o Iesu ma ona soo i nuu maotua i Iutaia, ma nonofo ai i inā mo sina taimi ma faia ai ni papatisoga.+
23 Ua faia foʻi e Ioane ni papatisoga i Ainona e lata i Salima, auā e tele ai vai i inā,+ ma ua gasolo ane tagata iā te ia ina ia papatisoina;+
24 auā o le taimi lea e leʻi lokaina ai Ioane i le falepuipui.+
25 Ona tupu ai lea o se finauga i le vā o soo o Ioane ma se tagata Iutaia, e uiga i le faamamāina.
26 O lea, ua latou ō atu ai iā Ioane ma faapea atu: “Le Aʻoaʻo e,* o le tagata sa lua faatasi i le isi itu o Ioritana, lea foʻi na e molimau e faatatau i ai,+ o loo ia faia papatisoga, ma ua gasolo atu tagata uma iā te ia.”
27 Ona tali mai lea o Ioane: “E lē maua e se tagata se mea e tasi, seʻiloga ua foaʻiina mai iā te ia mai i le lagi.
28 O lenā tou te molimau, na ou fai atu, ‘E lē o aʻu o le Keriso,+ ae na auina mai aʻu e muamua iā te ia.’+
29 O le alii faaipoipo, o ia e ana le tamaʻitaʻi faaipoipo.+ Peitaʻi, pe a tū le uō sili ma lagona atu le leo o le alii faaipoipo, ona matuā olioli ai lea o le uō sili. O lea la, ua atoatoa ai foʻi loʻu olioli.
30 E tatau ona faateleina pea o ia, a o aʻu nei, e tatau ona faaitiitia pea.”
31 O lē e maliu mai i lugā,+ e pule o ia i isi uma. A o le tagata o le lalolagi, e mai i le lalolagi lava ia, ma e tautala o ia i mea a le lalolagi. O lē e maliu mai i le lagi, e pule o ia i isi uma.+
32 E molimau o ia e faatatau i mea uma ua ia silasila ma faafofoga i ai,+ ae e lē talia e se tagata lana molimau.+
33 O lē na te taliaina lana molimau, ua ia faamaonia o le Atua e faamaoni lava ia.+
34 Auā o lē na auina mai e le Atua, e fetalai o ia i afioga a le Atua,+ ma e matuā foaʻi atu* e le Atua le agaga.
35 E alofa le Tamā i lona Alo,+ ma ua ia tuuina atu mea uma i lona aao.+
36 O lē e faatuatua i le Alo e maua e ia le ola e faavavau.+ A o le tagata e lē usiusitaʻi i le Alo, e lē maua e ia le ola,+ ae tumau pea le toʻasā o le Atua iā te ia.+
Faamatalaga Pito i Lalo
^ Po o le “Rapi e.” Tagaʻi i le Uiga o Upu.
^ Pe atonu “afai e lē fanau mai i lugā.”
^ Po o le “neʻi faaalialia.”
^ Po o le “Rapi e.” Tagaʻi i le Uiga o Upu.
^ Po o le “e lē foaʻi faatatauina.”
