O le Tusi Muamua a Peteru 3:1-22
3 Ia faapea foʻi outou avā, ia gauaʻi atu i a outou tane,+ ma afai e lē usiusitaʻi nisi i le upu, e mafai ona maua i latou i le amiolelei a a latou avā e aunoa ma se upu,+
2 auā ua latou vāaitino i a outou amioga mamā+ ma le matuā faaaloalo.
3 Aua neʻi faia a outou teuga e tusa ai ma le vaaiga a tagata, o le fili lea o le lauulu ma teuteu i auro+ po o le oofu i ofu taugatā,
4 ae o le tagata lilo i totonu, ia teuteu i le mea e lē pala o le agaga agamalu ma le filemu,+ o le mea tautele lava lea i le silafaga a le Atua.
5 Auā sa faapea foʻi ona teuteu e fafine paia i latou lava i aso ua mavae, o ē na faamoemoe i le Atua, na gauaʻi atu i latou i a latou tane,
6 e pei ona usiusitaʻi o Sara iā Aperaamo, ma sa ia taʻua o ia o le alii.+ E avea foʻi outou ma ana fanau, pe afai e tou te faia pea mea lelei ma lē fefefe i se mea e faamataʻu mai.+
7 Ia faapea outou tane, ia faaauau ona nonofo faatasi ma i latou e tusa ma le poto.* Ia āva i fafine+ e pei o se ipu e sili ona vaivai, auā o i latou foʻi o suli faatasi ma outou+ i le meaalofa foaʻifua o le ola, ina ia lē faalavelavea ai a outou tatalo.
8 O lea la, ia autasi outou uma i o outou manatu,+ ia tigā alofa le tasi i le isi, ia iā te outou le alofa faaleuso, ia māfana lo outou alofa,+ ma ia lotomaulalo.+
9 Aua le taui atu le leaga i le leaga,+ po o le upuleaga atu i ē e upuleaga mai.+ Nai lo o lea, ia outou faamanuia atu,+ auā o le mea lava lea na valaauina ai outou ina ia outou maua se faamanuiaga.
10 Auā “o lē e naunau i le ola ma iloa aso lelei, ia leoleo lona laulaufaiva mai i mea leaga+ ma ona laugutu mai i le tautala i mea taufaasesē.
11 Ia liliuese o ia mai i mea leaga+ ma faia mea lelei;+ ia saʻili e ia le filemu ma tausisi i ai.+
12 Auā o loo silasila mai fofoga o Ieova* i ē e amiotonu, e faafofoga mai foʻi ona taliga i la latou talosaga,+ ae e faasagatau atu fofoga o Ieova* i ē o faia mea leaga.”+
13 O ai foʻi le tagata e agaleaga iā te outou pe afai e tou te maelega i mea lelei?+
14 Ae e tusa lava pe e tou te puapuagatia ona o le amiotonu, e fiafia lava outou.+ Peitaʻi, aua tou te fefefe i mea e latou te fefefe ai,* aua foʻi neʻi outou popole.+
15 Ae ia faapaiaina le Keriso le Alii i o outou loto, ma ia nofosauni pea e tali atu i luma o tagata uma e fesili mai iā te outou i le māfuaaga o lo outou faamoemoe, ae ia faia faapea ma le agamalu+ ma le matuā faaaloalo lava.+
16 Ia taofimau i se lotofuatiaifo lelei,+ o lea e tusa po o ā tala leaga e faia e tagata e faatatau iā te outou, ae e faamāina i latou+ ona o a outou amioga lelei o ni soo o Keriso.+
17 Auā e sili ona lelei lo outou mafatia ona o le faia o mea lelei,+ pe afai o le finagalo lea o le Atua, nai lo o lo outou faia o mea leaga.+
18 Auā e na o le faatasi lava ona maliu o Keriso mo agasala,+ o le tagata amiotonu mo ē amiolētonu,+ ina ia taʻitaʻiina e ia outou i le Atua.+ Na fasiotia o ia i le tino,+ ae na toe faaola mai i le agaga.+
19 Ina ua iai o ia i lenā tulaga, na ia maliu atu ma talaʻi i agaga i le falepuipui,+
20 o ē na lē usiusitaʻi a o faatalitali ma le onosaʻi le Atua i aso o Noa,+ a o fausia le vaa+ lea na faasaoina ai mai i le vai ni nai tagata, e na o le toʻavalu lava.+
21 Ua fai lenā mea ma faatusa o le papatisoga lea ua faaolaina ai nei outou (e lē o le aveesea o palapala o le tino, a o le talosaga i le Atua mo se lotofuatiaifo lelei),+ e ala i le toe faatūina mai o Iesu Keriso.
22 Ua afio o ia i le lagi ma o loo i le itu taumatau o le Atua,+ ma ua faia e le Atua ina ia gauaʻi atu agelu, ma pule ma ē malolosi iā te ia.+
Faamatalaga Pito i Lalo
^ Po o le “manatu mamafa iā i latou; malamalama iā i latou.”
^ Pe atonu “aua tou te fefefe i a latou faamataʻuga.”
