Ko te Mālō o te Atua ko he mālō fakatelagi. Ka hui tulaga ki nā mālō uma ma ka faia te finagalo o te Atua i te lagi ma i luga o te lalolagi. E lelei nā tala e uiga ki te Mālō o te Atua. Toeitiiti fakamalie e te Mālō o te Atua nā manakoga o nā tagata mo he mālō lelei. Ka fai ke kau fakatahi nā tino uma e nonofo i luga o te lalolagi.​—Faitau te Tanielu 2:​44; Mataio 6:​9, 10; 24:14.

Ko he mālō e tatau oi i ei he tupu. Na tōfia e Ieova tona Ataliki, ko Iehu Keliho, ke fai ma Tupu o Tona Mālō.​—Faitau te Fakaaliga 11:15.

Matamata ki te vitiō He ā te Mālō o te Atua?

Kua talafeagai te kavea o te Ataliki o te Atua ma Tupu auā ko ia e agalelei, ma ko ia e mautu mo te mea hako. (Mataio 11:28-30) E hē gata i tēnā ko ia e lava tona malohi ke fehoahoani ai ki nā tino uma auā ko ia ka pule mai te lagi ki luga o te lalolagi. Mulimuli ake, i tona toetū, na fanake ia ki te lagi ma nofo fakatalitali i te itu taumatau o Ieova. (Epelu 10:12, 13) Mulimuli ake, ka fōki atu e te Atua ki a te ia te malohi ke kamata ai tana pule.​—Faitau te Tanielu 7:​13, 14.

He vaega e takua ko “te kau paia” ka pule fakatahi ma Iehu i te lagi. (Tanielu 7:​27) Ko te vaega muamua o te kau paia na filifili e Iehu ko ona apohitolo fakamāoni. Koi fakaauau ke pa mai ki te taimi nei e filifili e Ieova nā tamāloloa ma fafine fakamāoni ma kavea ma te kau paia. E vē ko Iehu, na toe fakatutū ki latou i ni tino agaga.​—Faitau te Ioane 14:​1-3; 1 Kolinito 15:42-​44.

 E tokafia nā tino e olo ki te lagi? Na takua e Iehu ki latou ko te “lafu māmoe tokaitiiti.” (Luka 12:32) Ko te latou numela mulimuli ake 144,000. Ka pule ki latou ki luga o te lalolagi ma Iehu.​—Faitau te Fakaaliga 14:1.

Na kamata i te 1914 te pulega o te Mālō o te Atua. * Ko te gaoioiga muamua a Iehu i te kavea o ia ma Tupu ko te togi mai o Hatani ma ana temoni ki te lalolagi. Na ita ia Hatani ma kamata ai fakatupu nā fakalavelave i te lalolagi kātoa. (Fakaaliga 12:​7-​10, 12) Taluai, kua fakatupu nā puapuagā ki tagata uma. Ko nā taua, oge, tauale pēhi, ma mafuie ko ni vaega o te “fakailoga” teia kua toeitiiti pule katoatoa te Mālō i nā faiga a te lalolagi nei.​—Faitau te Luka 21:​7, 10, 11, 31.

E ala i te galuega talaki i te lalolagi kātoa, kua tuku fakatahi e te Mālō o te Atua he kaifenua lahi o nā tino mai nā fenua uma. E fia miliona o nā tino lotomaulalo kua kavea ki latou ma tagatāfenua o te Mālō o te Atua e kave ai Iehu ma Tupu. E puipui ki latou e te Mālō o te Atua kae fakaumatia nā faiga mea kino o tēnei lalolagi. Ko teia ko ki latou uma e fia maua nā aogā mai te Mālō o te Atua e tatau ke akoako ma kavea ki latou ma ni tagatāfenua uhiuhitaki ki a Iehu.​—Faitau te Fakaaliga 7:​9, 14, 16, 17.

I te vaitaimi o te 1,000 tauhaga, ka fakataunuku e te Mālō te fuafuaga muamua a te Atua mo tagata uma. Ka kavea te lalolagi kātoa ma palataiho. Mulimuli ake, ka toe fōki atu e Iehu te Mālō ki tona Tamana. (1 Kolinito 15:24-​26) E kē iloa he tino e fofou koe ki ei ke fakamatala atu te uiga o te Mālō o te Atua?​—Faitau te Halamo 37:10, 11, 29.