Faamaumauga a Ioane 8:12-59
8 12 Ona toe fetalai atu lea o Iesu iā i latou e faapea: “O aʻu o le malamalama o le lalolagi.+ O lē e mulimuli mai iā te aʻu, e lē savali lava o ia i le pōuliuli, ae maua e ia le malamalama+ o le ola.”
13 Ua faapea mai le ʻau Faresaio iā te ia: “Ua e molimau iā te oe lava; ma e lē moni lau molimau.”
14 Ua tali atu Iesu iā i latou: “E tusa po ou te molimau iā te aʻu lava, ae e moni laʻu molimau, auā ua ou iloa le mea ou te sau ai, ma le mea ou te alu atu i ai.+ A o outou, tou te lē iloa le mea ou te sau ai, ma le mea ou te alu atu i ai.
15 Ua outou faamasino e tusa ma tapulaa a tagata;*+ a o aʻu, ou te lē faamasinoina lava se tasi.
16 Ae afai ou te faamasino, e moni lava laʻu faamasinoga auā e lē na o aʻu, ae o loo ma faatasi ma le Tamā na auina mai aʻu.+
17 Ua tusia foʻi i la outou Tulafono: ‘E moni le molimau a tagata e toʻalua.’+
18 A o aʻu, ua ou molimau iā te aʻu lava, ma o le Tamā na auina mai aʻu, o loo molimau foʻi iā te aʻu.”+
19 Ona latou faapea mai lea iā te ia: “O fea o iai lou Tamā?” Ua tali atu Iesu: “Tou te lē iloa aʻu ma loʻu Tamā.+ Ana outou iloa aʻu, semanū ua outou iloa foʻi loʻu Tamā.”+
20 Ua fetalai o ia i nei upu i le mea e teu ai oloa,+ a o aʻoaʻo atu o ia i le malumalu. Ae e leai se tasi ua oo lona lima iā te ia, auā e leʻi oo i lona taimi.*+
21 Ua toe fetalai atu foʻi o ia iā i latou: “O le a ou alu, ma o le a outou saʻili mai iā te aʻu, ae o le a outou feoti i la outou agasala.+ E lē mafai ona outou ō mai i le mea ou te alu i ai.”+
22 Ona faapea ane lea o tagata Iutaia: “Po o le a pule o ia i lona ola? Auā ua ia fai mai, ‘E lē mafai ona outou ō mai i le mea ou te alu i ai.’”
23 Ua fetalai atili atu o ia iā i latou: “O outou e mai i lalo nei; a o aʻu e mai i lugā.+ O outou e mai i lenei lalolagi; a o aʻu ou te lē mai i lenei lalolagi.
24 O le mea lea ou te fai atu ai: O le a outou feoti i a outou agasala. Auā afai tou te lē talitonu o aʻu o ia, o le a outou feoti lava i a outou agasala.”
25 Ona latou fai mai lea iā te ia: “O ai ea oe?” Ua tali atu Iesu: “E maʻimau le taimi ou te talanoa atu ai iā te outou.
26 E tele mea ou te fia fai atu ai e faatatau iā te outou, ma faia i ai ni faaiʻuga. Ae o le mea moni, o Lē na auina mai aʻu, e faamaoni o ia, ma o mea foʻi na ou faalogo ai mai iā te ia, ua ou tautala atu ai i le lalolagi.”+
27 E latou te leʻi malamalama o loo fetalai o ia e faatatau i le Tamā.
28 Ona fetalai atu lea o Iesu: “Pe a outou siitia i luga le Atalii o le tagata,+ ona outou iloa ai lea o aʻu lava o ia,+ ma ou te lē faia se mea i loʻu lava loto;+ ae e pei ona aʻoaʻo mai e le Tamā iā te aʻu, o mea ia ou te tautala atu ai.
29 O loo ma faatasi ma Lē na auina mai aʻu; ma e na te leʻi tuua aʻu na o aʻu, auā ou te faia pea mea e fiafia i ai lona finagalo.”+
30 A o fetalai o ia i nei mea, e toʻatele ua faatuatua ai iā te ia.
31 Ona fetalai atu lea o Iesu i tagata Iutaia ua talitonu iā te ia: “O outou o oʻu soo moni pe a outou tumau i aʻu upu,
32 ma o le a iloa e outou le upu moni,+ e tuusaʻoloto foʻi outou e le upu moni.”+
33 Ua latou tali mai iā te ia: “O i matou o le fanau a Aperaamo, ma e leʻi faia lava i matou ma pologa a se tagata. Aiseā la ua e fai mai ai, ‘E tuusaʻoloto outou’?”
34 Ua tali atu Iesu iā i latou: “E moni, e moni, ou te fai atu iā te outou, o lē na te faia le agasala, o le pologa lea a le agasala.+
35 E lē tumau foʻi e faavavau le pologa i se aiga; ae e tumau e faavavau le atalii.
36 O le mea lea, afai e tuusaʻoloto outou e le Atalii, ona outou saʻoloto moni ai lea.
37 Ou te iloa o outou o le fanau a Aperaamo. Ae o loo outou lamalama e fasioti aʻu, ona tou te lē taliaina aʻu upu.
38 Ua ou tautala i mea na ou vaai i ai a o ma faatasi ma loʻu Tamā,+ ae ua outou faia mea ua outou faalogo ai mai i lo outou tamā.”
39 Ona latou tali mai lea iā te ia: “O lo matou tamā o Aperaamo.” Ua fetalai atu Iesu: “Pe ana faapea o outou o le fanau a Aperaamo,+ semanū e tou te faia galuega a Aperaamo.
40 A o lenei ua outou lamalama e fasioti iā te aʻu, o le tagata ua taʻu atu iā te outou le upu moni ua ou faalogo ai mai i le Atua.+ O le mea lenā e leʻi faia e Aperaamo.
41 O loo outou faia galuega a lo outou tamā.” Ua latou fai mai iā te ia: “E matou te leʻi fananau mai ona o feusuaʻiga lē mamā;* e toʻatasi lo matou Tamā, o le Atua lea.”
42 Ua fetalai atu Iesu iā i latou: “Afai o le Atua lo outou Tamā, semanū la tou te alolofa iā te aʻu,+ auā ua ou sau mai i le Atua, ma ua ou iai i inei. Ou te leʻi sau i loʻu lava loto, a o Ia na auina mai aʻu.+
43 Aiseā ua outou lē malamalama ai i mea ua ou fai atu ai? Auā tou te lē faalogo i aʻu upu.
44 O outou e mai i lo outou tamā le Tiapolo, ma ua outou mananaʻo foʻi e faia mea e tuʻinanau i ai lo outou tamā.+ O ia o le fasioti tagata talu le amataga,+ ma e leʻi tumau lava o ia i le upu moni, auā e lē o i totonu iā te ia le upu moni. Pe a tautala o ia i tala pepelo, e tautala o ia e tusa ma lona lava manatu, auā o ia o sē e pepelo ma le tamā o le pepelo.+
45 Peitaʻi, ua ou tautala i le mea moni, ae tou te lē talitonu iā te aʻu.
46 O ai se tasi o outou na te taʻusalaina aʻu i se agasala ua ou faia? Afai ua ou tautala i le mea moni, aiseā ua outou lē talitonu mai ai iā te aʻu?
47 O lē e mai i le Atua, e faalogo i afioga a le Atua.+ O le mea lea ua outou lē faalogo ai, auā e lē mai i le Atua outou.”+
48 Ua tali mai tagata Iutaia iā te ia: “Pe e lē saʻo ea la matou tala, ʻO oe o le Samaria+ ma ua iā te oe se temoni’?”+
49 Ua tali atu Iesu: “E lē o iā te aʻu se temoni, peitaʻi ou te āva i loʻu Tamā, ae tou te lē āva iā te aʻu.
50 Ou te lē o saʻili e faamamaluina aʻu;+ ae e iai Lē o loo saʻili e faamamaluina aʻu, ma o ia foʻi o le faamasino.
51 E moni, e moni, ou te fai atu iā te outou, e lē oo lava le oti i lē e tausi i mea ua ou aʻoaʻoina atu.”+
52 Ua fai mai tagata Iutaia iā te ia: “Ua matou iloa nei ua iā te oe le temoni. Ua maliu Aperaamo faapea foʻi ma le ʻauperofeta, ae ua e fai mai, ‘E lē oo lava le oti i lē e tausi i mea ua ou aʻoaʻoina atu.’
53 Pe e sili ea oe i lo matou tamā o Aperaamo, o lē ua maliu? Ua maliliu foʻi le ʻauperofeta. A o ai la oe?”
54 Ua tali atu Iesu: “Afai ou te faamamaluina aʻu lava, e lē aogā la lenā mamalu. A o loʻu Tamā o lē ua outou fai mai o lo outou Atua, o ia lea ua faamamaluina aʻu.+
55 Ae ua outou lē iloa o ia.+ A o aʻu, ou te iloa o ia.+ Afai ou te fai atu ou te lē iloa o ia, ua ou pepelo la e pei o outou. Peitaʻi, ou te iloa o ia ma ua ou tausi i lana afioga.
56 Na matuā olioli lo outou tamā o Aperaamo i le faamoemoe e vaai i mea o le a ou faia, ma na ia vaai i ai ma olioli ai.”+
57 Ona fai mai lea o tagata Iutaia iā te ia: “E leʻi atoa se 50 o ou tausaga, ae po ua e vaai ea iā Aperaamo?”
58 Ae ua faapea atu Iesu iā i latou: “E moni, e moni, ou te fai atu iā te outou, a o leʻi iai Aperaamo, ae ua leva ona ou iai.”+
59 Ona latou fetagofi ai lea i maa e fetogi iā te ia, ae ua lafi Iesu ma alu ese mai i le malumalu.
Faamatalaga Pito i Lalo
^ Ele., “tusa ma le tino.”
^ Ele., “itula.”
^ O le upu Eleni, o le por·nei′a. Tagaʻi i le Uiga o Upu.
