Nahana ka sena: Ha Julia a itjheba ka seiponeng, o ipona a le motenya. O batla ho fokotsa boima ba mmele, le hoja batswadi le metswalle ya hae ba mo bolella hore ha a motenya.

Morao tjena, Julia o se a nahana ho nka mehato e feteletseng hore a fokotse mmele. O batla ho itima dijo ka matsatsi a seng makae . . .

Haeba e ne e le wena, o ne o tla etsang?

Ha ho phoso ho kgathatseha ka tsela eo o shebahalang ka yona. Ha e le hantle, Bibele e bua ka banna le basadi ba neng ba le batle, ba akarelletsang Sara, Ragele, Abigaile, Josefa le Davida. E boetse e re mosadi e mong ya neng a bitswa Abishage “o ne a le motle ka ho fetisisa.”—1 Marena 1:4.

Leha ho le jwalo, batjha ba bangata ba kgathatseha haholo ka tsela eo ba shebahalang ka yona. Sena se ka ba bakela mathata. Nahana ka sena:

• Patlisisong e nngwe, banana ba ka etsang diphesente tse 58 ba ne ba nahana hore ba nonne, athe ba nonneng, ke ba etsang diphesente tse 17 feela.

• Patlisisong e nngwe teng, basadi ba etsang diphesente tse 45 ba neng ba le basesaane haholo, ba ne ba nahana hore ba nonne!

• Batjha ba bangata ba neng ba leka ho fokotsa mmele ba ile ba qetella ba tshwerwe ke anorexia, e leng lefu le kotsi le bakwang ke ho itima dijo.

 Haeba o na le matshwao a anorexia kapa bothata le ha e le bofe ba ho se je hantle, kopa thuso. O ka bua le motswadi kapa motho e mong e moholo eo o mo tshepang. Bibele e re: “Motswalle wa nnete o lerato ka dinako tsohle, mme ke morabo motho ya tswaletsweng ha ho e na le mahlomola.”—Liproverbia 17:17.

Ha e le hantle, tsela eo motho a itshwarang ka yona e etsa hore a ratehe. Ka mohlala, nahana ka mora wa Morena Davida, Absalome. Bibele e re ka yena:

“Ho ne ho se monna e motle hakaalo . . . hoo a roriswang haholo hakaalo. O ne a se na sekodi.”—2 Samuele 14:25.

Empa mohlankana enwa o ne a ikgohomosa, a rata maemo a bile a le bolotsana! Ka hoo, Bibele ha e bue hantle ka Absalome, ho e na le hoo, e re o ne a sa tshepahale a bile a tletse lehloyo.

Ke ka hoo Bibele e re eletsang tjena:

“Le ikapese botho bo botjha.”—Bakolose 3:10.

‘Le se ke la dumella mokgabo wa lona hore e be wa ka ntle, empa e ke e be motho ya ka sephiring wa pelo.’—1 Petrose 3:3, 4.

Le hoja ho se letho le phoso ka ho batla ho shebahala hantle, ntho ya bohlokwa ka ho fetisisa ke boitshwaro ba hao. Ha o itswhere hantle, batho ba tla o rata, ho feta feela ha o e na le mmele o motle! Ngwanana e mong ya bitswang Phylicia o ile a re: “Le hoja botle bo ka hapa mahlo a batho, boitswharo ba hao bo botle ke bona boo batho ba tla dula ba bo hopola.”

Na ha o rate tsela eo o shebahalang ka yona?

Na o kile wa nahana ho etsa opereishene hore o lokise karolo e itseng mmeleng wa hao kapa ho itima dijo ka ho feteletseng e le hore o ntlafatse tsela eo o shebahalang ka yona?

Keng eo o neng o ka e tjhentjha mmeleng wa hao haeba o ne o ka kgona? (E tshwaye.)

• BOLELELE

• BOIMA BA MMELE

• MORIRI

• SEBOPEHO SA MMELE

• SEFAHLEHO

• MMALA WA LETLALO

Haeba o arabile dipotso tse pedi tse ka hodimo ka e, kapa o tshwaile dintho tse tharo kapa ho feta tseo o ka ratang ho di tjhentjha, nahana ka sena: E ka nna yaba batho ba bang ha ba bone o le mobe jwalo ka ha o nahana. Ho bonolo hore motho a fetelletse dintho kapa a kgathatsehe haholo ka tsela eo a shebahalang ka yona.—1 Samuele 16:7.