Kulandzisa KwaMatewu 10:1-42
10 Ngako wabita bafundzi bakhe labangu-12, wabaniketa emandla ekukhipha emadimoni,+ newekwelapha tonkhe tinhlobo tekugula netifo.
2 Nankha emabito alabaphostoli labangu-12:+ Wekucala bekunguSimoni lobitwa ngekutsi nguPhetro,+ na-Andreya+ umnakabo; Jakobe indvodzana yaZebedi nemnakabo longuJohane;+
3 Filiphu naBhatalomewu;+ Tomase+ naMatewu+ umtselisi; Jakobe indvodzana ya-Alfiyose; naThadiyosi;
4 Simoni lobekakhutsele; naJudasi Skariyothi lowagcine atsengise Jesu.+
5 Jesu wabatfuma laba labangu-12,+ watsi: “Ningayi kubantfu betive, futsi ningangeni kunobe nguliphi lidolobha laseSamariya,+
6 kodvwa yanini kubantfu baka-Israyeli labanjengetimvu letilahlekile.+
7 Njengobe nihamba, niboshumayela nitsi: ‘UMbuso wemazulu sewusondzele.’+
8 Yelaphani labagulako,+ nivuse labafile, nihlambulule labanebulephelo, nikhiphe nemadimoni. Niphiwe mahhala, nani phanini mahhala.
9 Ningayiphatsi imali yeligolide, yelisiliva nobe yelitfusi,*+
10 nobe kudla, nobe timphahla letimbili, nobe tincabule, nobe intfonga,+ ngobe sisebenti sifanelwe kunikwa kudla.+
11 “Kunobe nguliphi lidolobha nobe lidolobhana leningena kulo, funani bantfu labatimisele kunemukela, bese nihlala nabo nize nihambe.+
12 Naningena emtini, babingeleleni labakulowo muti.
13 Nangabe banemukela, batawusitakala ekuvakasheni kwenu,+ kodvwa nangabe banganemukeli, ngeke basitakale.
14 Nangabe kute lonemukelako nobe lonilalelako, naniphuma kulowo muti nobe kulelo dolobha, nibotsintsitsa lutfuli etinyaweni tenu.+
15 Ngicinisile ngitsi kini: Kuyawuba ncono ngeSodoma nangeGomora+ ngeLilanga Lekwehlulelwa kunalelo dolobha.
16 “Nginitfuma njengetimvu emkhatsini wetimphisi; ngako-ke, caphelani njengetinyoka kepha nibe msulwa njengematuba.+
17 Nibocaphela, ngobe bantfu bayonifaka etinkantolo+ futsi banibhambabule+ emasinagogeni abo.+
18 Niyawumiswa embikwebabusi nasembikwemakhosi+ ngenca yami, kuze kube bufakazi kubo nasetiveni.+
19 Nanobe kunjalo, nabanimangalela ningakhatsateki ngekutsi niyawutsini nangekutsi niyawukhuluma kanjani, ngobe loko leniyawukusho niyawunikwa kona ngaleso sikhatsi,+
20 ngobe akusini leniyawukhuluma, kodvwa ngumoya waBabe wenu lotanisita kutsi nikhulume.+
21 Ngetulu kwaloko, umuntfu uyawunikela umnakabo kutsi abulawe, kanjalo nababe anikele umntfwana wakhe, nebantfwana bayawuvukela batali babo futsi banikele ngabo kutsi babulawe.+
22 Niyawutondvwa bantfu bonkhe ngenca yelibito lami,+ kodvwa loyo loyawucinisela* kuze kube sekugcineni utawusindziswa.+
23 Nabaniphatsa kabi kulelinye lidolobha balekelani kulelinye,+ ngobe ngicinisile ngitsi kini: Ngeke niwacedze onkhe emadolobha aka-Israyeli ingakefiki iNdvodzana yemuntfu.
24 “Umfundzi akamengci umfundzisi wakhe, futsi kute inceku lengetulu kwenkhosi yayo.+
25 Kwenele ngemfundzi kutsi afanane nemfundzisi wakhe, nenceku kutsi ifanane nenkhosi yayo.+ Nangabe bantfu babita umnikati wemuti ngekutsi nguBhelzebhule,*+ kangakanani-ke ngalabo labahlala endlini yakhe?
26 Ngako ningabesabi labo bantfu, ngobe kute lokumbonyiwe lokungeke kwembulwe, nalokufihliwe lokungeke kwatiwe.+
27 Lenginitjela kona nasisodvwa kutjeleni bonkhe bantfu, nalenginitjela kona ekusitsekeni kumemeteleni etikwetindlu.+
28 Ningabesabi labo lababulala umtimba kodvwa babe bangeke bawubulale umphefumulo;*+ kodvwa yesabani loyo longabhubhisa kokubili umphefumulo nemtimba eGehena.*+
29 Bojolwane lababili abatsengiswa yini ngasenti munye lomncane?* Nome kunjalo, ngisho munye wabo angawela emhlabatsini, Babe wenu ngeke ahlale angamboni.+
30 Kodvwa-ke kini kubalwe tonkhe tinwele letisetinhloko tenu.
31 Ngako-ke ningesabi, nine nibaluleke kwendlula bojolwane labanyenti.+
32 “Nobe ngubani lovuma embikwebantfu+ kutsi ungumfundzi wami, nami ngitamvuma embikwaBabe losemazulwini.+
33 Kodvwa nobe ngubani longiphikako embikwebantfu, nami ngiyawumphika embikwaBabe losemazulwini.+
34 Ningacabangi kutsi ngitele kutewuletsa kuthula emhlabeni; angiketeli kutewuletsa kuthula, kodvwa ngitewuletsa inkemba.+
35 Ngobe ngitele kutewuhlukanisa: Indvodzana imelane nababe wayo, indvodzakati imelane namake wayo, makoti amelane namaketala.+
36 Titsa temuntfu kuyawuba bantfu bemndeni.
37 Lotsandza babe wakhe nobe make wakhe kwengca mine akangifaneli, naloyo lotsandza indvodzana yakhe nobe indvodzakati yakhe kwengca mine akangifaneli.+
38 Nobe ngubani longavumi kuhlushwa* futsi angilandzele, akangifaneli.+
39 Lowetama kusindzisa kuphila kwakhe uyawulahlekelwa ngiko, kodvwa lolahlekelwa kuphila kwakhe ngenca yami uyawukutfola.*+
40 “Lowemukela nine uyangemukela nami, nalongemukelako wemukela Loyo longitfumile.+
41 Lowemukela umphrofethi ngobe angumphrofethi, uyawutfola umvuzo wemphrofethi,+ naloyo lowemukela umuntfu lolungile ngobe nje alungile, uyawutfola umvuzo wemuntfu lolungile.
42 Nobe ngubani lopha lomunye walaba labancane emanti ekunatsa ngobe angumfundzi, ngicinisile ngitsi kini: Ngeke alahlekelwe ngumvuzo wakhe.”+
Imibhalo lengentansi
^ Nobe “Ningayiphatsi imali yeligolide, yelisiliva nobe yelitfusi etikhwameni tenu temali.”
^ Nobe “locinisela.”
^ Lesi sicu lesisetjentiswa kuSathane, loyindvuna yemadimoni nobe umholi wawo.
^ Nobe “kuphila,” lokusho ematsemba ekuphindze uphile.
^ Fundza Tinchazelo Temagama.
^ NgesiGriki kutsi, “ngeli-assarion.” Fundza Sandzisanchazo B14.
^ Nobe “kutsatsa lugodvo.” Fundza Tinchazelo Temagama.
^ Nobe “uyawuphindze aphile.”
