Kulandzisa KwaMakho 12:1-44
-
Umfanekiso webalimi labababulali (1-12)
-
Nkulunkulu naKhesari (13-17)
-
Umbuto lomayelana nekuvuswa kwalabafile (18-27)
-
Imitsetfo lemibili lemikhulu (28-34)
-
Khristu uyindvodzana yaDavide yini? (35-37a)
-
Secwayiso lesimayelana netati temtsetfo (37b-40)
-
Tinhlavu letimbili temali temfelokati lophuyile (41-44)
12 Wacala kukhuluma nabo asebentisa imifanekiso watsi: “Umuntfu lotsite walima insimu yemagilebisi,+ wayibiyela, futsi wagubha litje lekuhlutela liwayini, waphindze wakha nembhoshongo;+ ngemuva kwaloko wayicashisela balimi wase uyahamba uya eveni lelikhashane.+
2 Nasekufika sikhatsi sekuvuna, watfumela sisebenti sakhe kulabalimi kutsi siyolandza titselo talensimu.
3 Kodvwa basibamba lesisebenti basishaya, basijikisa silengisa tandla.
4 Waphindze watfumela lesinye sisebenti, naso basibhobota inhloko futsi bahlekisa ngaso.+
5 Wase utfumela nalesinye, sona basibulala, futsi watfumela naletinye letinyenti, letinye tato batishaya kantsi letinye batibulala.
6 Ekugcineni besekusele indvodzana yakhe layitsandzako.+ Wayitfumela kulabalimi watsi: ‘Batayihlonipha lendvodzana yami.’
7 Kodvwa labalimi bakhuluma bodvwa batsi: ‘Lena ngiyo indlalifa.+ Wotani sitoyibulala, futsi lifa litawuba letfu.’
8 Ngako bayibamba bayibulala, babese bayihudvulela ngephandle kwalensimu.+
9 Yini-ke letawentiwa ngulomnikati walensimu? Utawufike ababulale labalimi, bese utsatsa lensimu uyiniketa labanye.+
10 Anizange niwufundze yini lombhalo lotsi: ‘Litje lelaliwe bakhi seligucuke laba litje leliyinhloko.*+
11 Lelitje livela kuJehova,* futsi liyasikhanga’?”+
12 Tati temtsetfo nebaphristi labakhulu bebafuna lisu lekumbamba,* kodvwa besaba lesicumbi sebantfu, ngobe bebabona kutsi ngalomfanekiso usho bona. Ngako bamshiya bahamba.+
13 Babese batfumela labanye bebaFarisi nemalunga elicembu laHerodi kuze bamgibe ngaloko lakushoko.+
14 Nabefika batsi kuye: “Mfundzisi, siyakwati kutsi ukhuluma liciniso nekutsi awutsengi emehlo emuntfu, futsi awubuki loko umuntfu langiko ngephandle, kodvwa ufundzisa indlela yaNkulunkulu ngeliciniso. Kuvumelekile* yini kutsi sikhiphe umtselo kuKhesari?
15 Kufanele yini vele sitsele?” Wakubona kutentisa kwabo, ngako watsi kubo: “Ningilingelani? Aseningikhombise denariyo.”*
16 Bamniketa, wabese uyababuta watsi: “Sabani lesitfombe nalelibito lelilapha?” Bona batsi kuye: “KwaKhesari.”
17 Ngako Jesu watsi kubo: “Nikani Khesari+ lokukwakhe, kodvwa ninike Nkulunkulu lokukwakhe.”+ Nabeva loku bamangala kakhulu.
18 Kwefika baSadusi, bona lebebatsi labafile ngeke bavuswe,+ bambuta batsi:+
19 “Mfundzisi, Mosi wabhala kutsi nangabe indvodza ifa futsi ishiye umfati wayo ete bantfwana, umnakabo kufanele angene lomfati, kuze atewutalela umufi bantfwana.+
20 Manje-ke bekunetelamani letingu-7, futsi lendvodzana yekucala yatsatsa umfati yase iyafa ite bantfwana.
21 Umnakabo wamngena lomfati, kodvwa naye wafa ete bantfwana, kwenteka lokufanako nakuwesitsatfu.
22 Bonkhe bongu-7 bafa bete bantfwana. Ekugcineni lomfati naye wafa.
23 Ngako-ke nasekuvuswa labafile, lomfati utawuba wabani? Ngobe ube ngumfati wabo bonkhe.”
24 Jesu watsi kubo: “Nidukile, ngobe aniyati imiBhalo kanye nemandla aNkulunkulu.+
25 Nasekuvuswa labafile, labadvuna ngeke batsatse bafati nalabasikati ngeke bashade, kodvwa batawufana netingilosi tasemazulwini.+
26 Mayelana nekuvuswa kwalabafile, anifundzanga yini encwadzini yaMosi, endzabeni yesihlahla lesivutsako, kutsi Nkulunkulu watsi kuye: ‘Mine nginguNkulunkulu wa-Abrahama, wa-Isaka newaJakobe’?+
27 Yena unguNkulunkulu walabaphilako, hhayi walabafile. Nine niduke kakhulu.”+
28 Lesinye sati semtsetfo sefika futsi sabeva baphikisana. Sesibonile kutsi Jesu ubaphendvule kahle, sambuta satsi: “Ngumuphi umtsetfo lomkhulu kakhulu* kunayo yonkhe?”+
29 Jesu wasiphendvula watsi: “Wekucala utsi: ‘Lalelani ma-Israyeli, Jehova* Nkulunkulu wetfu nguye yedvwa longuJehova,*
30 ngako kufanele utsandze Jehova* Nkulunkulu wakho ngayo yonkhe inhlitiyo yakho, nangawo wonkhe umphefumulo* wakho, nangayo yonkhe ingcondvo yakho, nangawo onkhe emandla akho.’+
31 Wesibili utsi: ‘Kufanele utsandze makhelwane wakho njengobe utitsandza wena.’+ Kute lomunye umtsetfo lomkhulu kunalena.”
32 Lesati semtsetfo satsi kuye: “Mfundzisi, usho kahle nawutsi: ‘Nkulunkulu nguye yedvwa, futsi kute lomunye ngaphandle kwakhe,’+
33 nekutsi kumtsandza ngayo yonkhe inhlitiyo yami, ngayo yonkhe ingcondvo yami, nangawo onkhe emandla ami, kanye nekutsandza makhelwane wami njengobe ngititsandza mine kubaluleke kakhulu kunayo yonkhe iminikelo yekushiswa lephelele kanye nemihlatjelo.”+
34 Jesu wabona kutsi lesati siphendvule ngekuhlakanipha, wase utsi kuso: “Awukho khashane nekungena eMbusweni waNkulunkulu.” Ngako kute lowaphindze waba nesibindzi sekumbuta.+
35 Kodvwa njengobe Jesu achubeka nekufundzisa ethempelini, watsi: “Kungani tati temtsetfo titsi Khristu uyindvodzana yaDavide?+
36 Ngesikhatsi achutjwa ngumoya longcwele,+ Davide ngekwakhe watsi: ‘Jehova* watsi eNkhosini yami: “Hlala ngesekudla sami kuze kube ngulapho titsa takho ngitibeka ngephansi kwetinyawo takho.”’+
37 Davide ngekwakhe umbita ngekutsi yiNkhosi, kungenteka njani-ke kutsi abe yindvodzana yakhe?”+
Lesicumbi sebantfu sasimlalele futsi sijabulile.
38 Wachubeka afundzisa atsi: “Caphelani tati temtsetfo letitsandza kuhamba tigcoke tingubo letindze, letifuna kubingelelwa etimakethe,+
39 futsi letitsandza tihlalo letingembili* emasinagogeni kanye netindzawo letincono emadzilini.+
40 Titsatsa tindlu* tebafelokati, tenta nemithantazo lemidze kuze tibonwe bantfu.* Ngako titawujeziswa kamatima.”*
41 Wabese uhlala macondzana nemabhokisi emnikelo,+ wabuka bantfu lebebafaka imali kulamabhokisi. Labanyenti labanjingile bebafaka imali lenyenti.+
42 Kwefika umfelokati lophuyile wafaka tinhlavu letimbili temali lebetitelinani lelincane kakhulu.*+
43 Wabita bafundzi bakhe, watsi kubo: “Ngicinisile ngitsi kini: Lomfelokati lophuyile ufake lokunyenti kwendlula bonkhe labo lebebafaka imali kulamabhokisi emnikelo.+
44 Ngobe bonkhe labanye bafake labakutsetse kulokunyenti labanako, kodvwa yena nanobe aphuyile, ufake konkhe lanako nalebekaphila ngako.”+
Imibhalo lengentansi
^ NgesiGriki kutsi, “leliyinhloko lelisekoneni.”
^ Fundza Sandzisanchazo A5.
^ Nobe “lekumbopha.”
^ Nobe “Kukahle.”
^ Fundza Sandzisanchazo B14.
^ Nobe “lobaluleke kakhulu.”
^ Fundza Sandzisanchazo A5.
^ Fundza Sandzisanchazo A5.
^ Fundza Sandzisanchazo A5.
^ Fundza Tinchazelo Temagama.
^ Fundza Sandzisanchazo A5.
^ Nobe “letincono.”
^ Nobe “tintfo.”
^ Nobe “tibukise.”
^ Nobe “kabuhlungu.”
^ NgesiGriki kutsi, “ema-lephithoni lamabili lakha li-quadrani.” Fundza Sandzisanchazo B14.
