Kulandzisa KwaLukha 22:1-71
-
Baphristi bakha lisu lekubulala Jesu (1-6)
-
Emalungiselelo eliPhasika lekugcina (7-13)
-
Kucaliswa kweSidlo seNkhosi Sakusihlwa (14-20)
-
“Loyo lotangitsengisa ukanye nami lapha etafuleni” (21-23)
-
Kuba nekuphikisana lokumatima emkhatsini wabo mayelana nekutsi ngubani lomkhulu kunabo bonkhe (24-27)
-
Sivumelwane saJesu sembuso (28-30)
-
Kukhulunywa ngekutsi Phetro utawuphika Jesu (31-34)
-
Lokwenta kubaluleke kuhlala ulungele; tinkemba letimbili (35-38)
-
Jesu uyathantaza eNtsabeni Yemincumo (39-46)
-
Jesu uyaboshwa (47-53)
-
Phetro uyamphika Jesu (54-62)
-
Kuhlekiswa ngaJesu embikwebantfu (63-65)
-
Kutekwa licala embikweNkantolo YemaJuda (66-71)
22 UMkhosi Wesinkhwa Lesite Imvubelo, lokutsiwa liPhasika,+ besewusondzele.+
2 Baphristi labakhulu netati temtsetfo bebafuna indlela lekahle yekubulala Jesu,+ kodvwa bebesaba bantfu.+
3 Judasi Skariyothi, lobekangulomunye webaphostoli labangu-12 wabese ungenwa nguSathane,+
4 futsi wahamba waya kulabaphristi labakhulu nasetindvuneni telithempeli wakhuluma nabo ngekutsi bekangamtsengisa njani kubo.+
5 Bajabula kakhulu nabeva loku, base bavumelana ngekutsi batamnika imali yelisiliva.+
6 Ngako wavuma, futsi wafuna litfuba lelikahle lekumtsengisa kubo, singekho sicumbi sebantfu.
7 Lefika lilanga lekucala leMkhosi Wesinkhwa Lesite Imvubelo, lebekulilanga lebekufanele kunikelwe ngalo ngesilwane seliPhasika.+
8 Ngako Jesu watfuma Phetro kanye naJohane, watsi kubo: “Hambani niyosilungisela liPhasika.”+
9 Batsi kuye: “Ufuna sikulungisele kuphi?”
10 Watsi kubo: “Naningena edolobheni nitawuhlangana nendvodza lephetse imbita yemanti. Niboyilandzela, niye lapho itawungena khona.+
11 Nibotsi kumnikati walomuti: ‘UMfundzisi utsi: “Liphi likamelo letivakashi lengingadlela kulo liPhasika ngikanye nebafundzi bami?”’
12 Lendvodza itanikhombisa likamelo lelikhulu lelingetulu, futsi lelilungiswe kahle. Nibosilungisela lapho-ke.”
13 Ngako bahamba batfola kunjengobe bekashito, base balungiselela liPhasika.
14 Satsi nasifika sikhatsi, wahlala etafuleni nebaphostoli bakhe.+
15 Wabese utsi kubo: “Bengisolo ngifisa kakhulu kudla nani leliPhasika ngisengakahlushwa,
16 ngobe ngitsi kini: Ngeke ngiphindze ngilidle tize tigcwaliseke tonkhe tintfo eMbusweni waNkulunkulu.”
17 Wemukela indzebe, wabonga wase utsi: “Tsatsani ninatse kuyo nonkhe,
18 ngobe ngiyanitjela ngitsi: Ngeke ngiphindze ngilinatse leliwayini kuze kufike uMbuso waNkulunkulu.”
19 Wase utsatsa sinkhwa,+ wabonga, wasihlephula futsi wabanika sona, watsi: “Loku kumelela umtimba wami+ lotawunikelwa ngenca yenu.+ Chubekani nikwenta, ningikhumbula.”+
20 Ngemuva kwekutsi babe nesidlo, wenta kanjalo nangendzebe, watsi: “Lendzebe imelela sivumelwane lesisha+ lesentiwe ngengati yami,+ letawucitfwa ngenca yenu.+
21 “Kodvwa loyo lotangitsengisa ukanye nami lapha etafuleni.+
22 INdvodzana yemuntfu itakufa njengobe kwashiwo;+ kodvwa maye kuloyo muntfu lotayitsengisa!”+
23 Ngako bacala kubutana bodvwa kutsi ngubani vele emkhatsini wabo lobekatawenta loku.+
24 Ngetulu kwaloko, kwase kuba nekuphikisana lokumatima emkhatsini wabo mayelana nekutsi ngubani lomkhulu kunabo bonkhe.+
25 Kodvwa Jesu watsi kubo: “Babusi betive batenta emakhosi, futsi labo labanetikhundla babitwa ngekutsi Benti Balokuhle.+
26 Nine akukafaneli nibe njalo.+ Kodvwa loyo lomkhulu emkhatsini wenu kufanele abe njengalomncane kunani nonkhe,+ naloyo loniholako kufanele abe njengesisebenti.
27 Ngubani lomkhulu kuloyo lohleti etafuleni nakuloyo losebentako? Akusiye yini loyo lohleti etafuleni? Kodvwa mine ngikanye nani njengesisebenti senu.+
28 “Nine benisolo ninami kuko konkhe+ kuhlupheka kwami,+
29 ngako ngenta sivumelwane nani njengobe nje naBabe enta sivumelwane sembuso nami,+
30 kuze nidle futsi ninatse etafuleni leliseMbusweni wami,+ niphindze nihlale etihlalweni tebukhosi+ khona nitowehlulela tive letingu-12 taka-Israyeli.+
31 “Simoni, Simoni, Sathane unifuna nonkhe kuze atewunela njengakolo.+
32 Kodvwa ngikuncusele kutsi kukholwa kwakho kungapheli,+ ngako-ke nasewubuyile kimi, ubocinisa bomnakenu.”+
33 Phetro watsi kuye: “Nkhosi, ngikulungele kuboshwa nekufa kanye nawe.”+
34 Kodvwa Jesu watsi: “Phetro, ngitsi kuwe, lamuhla kutawutsi lichudze lingakakhali utawube sewungiphike katsatfu.”+
35 Waphindze watsi kubo: “Ngesikhatsi nginitfuma kutsi nihambe ningakaphatsi sipatji nobe sikhwama sekudla nobe tincabule,+ kukhona yini lenakweswela?” Bona batsi: “Cha kute.”
36 Wase utsi kubo: “Kodvwa nyalo ngitsi loyo lonesipatji akasiphatse, nalonesikhwama sekudla akasiphatse, naloyo lote inkemba akatsengise ingubo yakhe yangetulu kuze atsenge inkemba.
37 Ngobe ngiyanitjela ngitsi loko lokwabhalwa kufanele kugcwaliseke kimi, kutsi: ‘Utawubalwa kanye nebantfu lababi.’+ Ngako letintfo letimayelana nami setiyagcwaliseka.”+
38 Batsi kuye: “Nkhosi, sinetinkemba letimbili.” Yena watsi: “Tenele.”
39 Nakaphuma, waya eNtsabeni Yemincumo njengobe bekahlale enta, futsi bafundzi bakhe bamlandzela.+
40 Nakefika lapho, watsi kubo: “Chubekani nithantaza kuze ningangeni ekulingweni.”+
41 Wase uyabashiya, wahamba libangana,* wafike waguca phansi wathantaza,
42 watsi: “Babe, nangabe utsandza, yendlulise lendzebe kimi. Kodvwa akwenteke intsandvo yakho, hhayi intsandvo yami.”+
43 Wabese ubona ingilosi levela ezulwini, futsi yamcinisa.+
44 Kodvwa bekalusizi kakhulu, ngako wachubeka ajula kakhulu emthantazweni,+ kangangekutsi umjuluko wakhe waba njengematfonsi engati lawela emhlabatsini.
45 Ngemuva kwekuthantaza, waya kubafundzi bakhe, wabakhandza balele ngenca yelusizi.+
46 Ngako watsi kubo: “Nileleleni? Vukani futsi nichubeke nithantaza kuze ningangeni ekulingweni.”+
47 Watsi asakhuluma, kweta sicumbi sebantfu lebesiholwa nguJudasi, lobekangulomunye webaphostoli labangu-12. Judasi weta kuJesu wamanga.+
48 Kodvwa Jesu watsi kuye: “Judasi, iNdvodzana yemuntfu uyitsengisa ngekuyanga?”
49 Ngesikhatsi labo lebebanaJesu babona loko lobekutawenteka batsi: “Nkhosi, sibahlasele yini ngaletinkemba tetfu?”
50 Lomunye wabo wavele washaya sisebenti semphristi lophakeme, wasisusa indlebe yangesekudla.+
51 Kodvwa Jesu waphendvula watsi: “Sekwenele.” Wase utsintsa lendlebe yalesisebenti, waselapha.
52 Jesu wakhuluma nebaphristi labakhulu, tindvuna telithempeli, nemadvodza lamadzala labebete kutombamba, watsi: “Nite kimi niphetse tinkemba netindvuku shengatsi nitobamba sigebengu?+
53 Ngesikhatsi ngisesenani ethempelini malanga onkhe,+ anizange ningibambe.+ Kodvwa lesi sesikhatsi senu, nesikhatsi sekutsi bumnyama bube nemandla.”+
54 Ngako bambopha base bayamtsatsa+ bamyisa endlini yemphristi lophakeme; kodvwa Phetro bekalandzela akhashane.+
55 Ngesikhatsi bantfu babasa umlilo ebaleni futsi bahlala ndzawonye, Phetro naye bekahleti nabo.+
56 Kodvwa lenye intfombatana yambona ahleti ngasemlilweni, yambukisisa yase itsi: “Nalona bekahamba naye.”
57 Yena waphika, watsi: “Angimati lomuntfu.”
58 Ngemuva kwesikhashana, lomunye umuntfu wambona wase utsi: “Nawe futsi ungulomunye wabo.” Kodvwa Phetro watsi: “Ndvodza, angisuye.”+
59 Kwatsi ngemuva kwesikhatsi lesingaba li-awa, lenye indvodza yasho ngekuciniseka yatsi: “Vele nayo lendvodza beyinaloJesu, ngobe ecinisweni yaseGalile!”
60 Kodvwa Phetro watsi: “Ndvodza, angikwati loko lokhuluma ngako.” Ngekushesha nje asakhuluma, lichudze lakhala.
61 Ngako iNkhosi yagucuka yabuka Phetro, futsi wase uyawakhumbula emavi iNkhosi lebeyiwashito kuye nayitsi: “Lamuhla, kutawutsi lichudze lingakakhali, utawube sewungiphike katsatfu.”+
62 Ngako waphumela ngephandle wakhala kabuhlungu.
63 Lamadvodza lebekabophe Jesu acala kuhlekisa ngaye,+ amshaya,+
64 futsi ngemuva kwekummbonya buso, bekasolo ambuta atsi: “Phrofetha-ke! Ngubani lokushayile?”
65 Achubeka asho letinye tintfo letinyenti amhlambalata.
66 Kwatsi nakusa, licembu lemadvodza lamadzala, lokufaka ekhatsi baphristi labakhulu kanye netati temtsetfo, lahlangana+ futsi lamyisa eNkantolo YemaJuda, latsi kuye:
67 “Sitjele kutsi unguKhristu yini.”+ Kodvwa yena watsi: “Ngisho nobe nginganitjela, ngeke ningikholwe.
68 Ngisho nobe nginganibuta, ngeke nize ningiphendvule.
69 Kodvwa kusukela nyalo, iNdvodzana yemuntfu+ itawuhlala ngesekudla saNkulunkulu lonemandla.”+
70 Nabeva loku, bonkhe batsi: “Pho ungiyo yini iNdvodzana yaNkulunkulu?” Watsi kubo: “Nine senivele nishito kutsi ngingiyo.”
71 Ngako batsi: “Sisabudzingelani-ke lobunye bufakazi? Ngobe sesitivele tsine matfupha akusho ngemlomo wakhe.”+
Imibhalo lengentansi
^ Nobe “libanga lelingaba ngangemjikijelo.”
